الماتىدا «اۋىل» پارتياسى جۋرناليستەردى جيناپ, 2015 جىلعى قوعامدىق قابىلداۋ جۇمىستارىنىڭ ناتيجەلەرى تۋرالى جاريالادى. وتكەن جىلدىڭ قىركۇيەك ايىندا «پاتريوتتار» پارتياسىمەن بىرىككەن «اۋىل» حالىقتىق-دەموكراتيالىق پاتريوتتىق پارتياسى سودان بەرى جۇمىسىن شيراتا ءتۇستى.
– وسىعان وراي كەز كەلگەن ازامات ءوزىن مازالاعان ماسەلەسى مەن ۇسىنىستارىن بىزگە كەلىپ, سۇراقتارىنا تولىققاندى جاۋاپ الۋعا مۇمكىندىگى بار. نەمەسە بىزگە تەلەفون ارقىلى دا حابارلاسا الادى. ودان بولەك, پارتيانىڭ رەسمي سايتىندا (www.auyl.kz) ونلاين قوعامدىق قابىلداۋ ءبولىمى بار. وعان دا بۇگىنگى تاڭدا تۇرعىنداردىڭ ءوتىنىشى كوپتەپ تۇسۋدە. ونىڭ ىشىندە ءبىزدى قۋانتاتىنى – «اۋىل» پارتياسىن قولداپ, ءبىزدىڭ پارتيانىڭ قاتارىنا قابىلداۋ تۋرالى ءوتىنىشتەر كوبەيۋدە. اۋىلدىڭ الەۋمەتتىك, ەكونوميكالىق جاعدايىن جاقسارتۋ, جەر رەسۋرستارى مەن اۋىل شارۋاشىلىعىنا ارنالعان جەرلەردى ءتيىمدى پايدالانۋ ارقىلى ەكولوگيالىق تازا ءونىم الۋ تۋرالى جانە جەكە ماسەلەلەرگە ارنالعان حاتتار دا بار. سونىمەن بىرگە, جۇمىسقا ورنالاستىرۋ تۋرالى وتىنىشتەر مەن ەڭبەك قۇقىقتارىنىڭ بۇزىلۋىنا قاتىستى ارىز-شاعىمدار باسىم, – دەدى بريفينگتە «اۋىل» حدپپ الماتى قالالىق فيليالىنىڭ توراعاسى ابدۋللا ساپاروۆ.
سونىمەن, وتكەن جىلدان بەرى الماتى قالاسى بويىنشا پارتياعا ءوز شاعىمدارىمەن 40-قا جۋىق ازامات كەلگەن. ونىڭ ىشىندە حالىقتىڭ الەۋمەتتىك جاعدايى تۋرالى, بيزنەسكە كومەكتەسۋ, جۇمىسقا ورنالاستىرۋ, پاتەر الۋ ءۇشىن تىزىمگە تۇرۋعا, ەمدەلۋگە كومەكتەسۋ, دۇكەندەردە ساتىلىپ جاتقان تاۋارلار ساپاسىنىڭ تومەندىگى نەمەسە قولدانۋ مەرزىمىنىڭ ءوتىپ كەتكەنى تۋرالى ماسەلەلەر بار.
ماسەلەن, وسى شاعىمداردىڭ ىشىندە پارتيانىڭ ارالاسۋىمەن ونەر مايتالمانى, زەينەتكەر ءماريام قاپەسوۆانىڭ قىستاعى سۋىقتا ءۇيدى جىلىتاتىن پەشىنىڭ ىستەن شىعىپ قالۋى, نەمەسە قونىمدى باعامەن ەكولوگيالىق تازا ءونىمدى ساتىپ وتىرعان وتىز ارەنداتوردىڭ پاۆيلوندارىنان ورىنسىز شىعارىلۋى, سول سياقتى باسقا دا ماسەلەلەر دەر كەزىندە شەشىمىن تاپقان.
پارتيا «جۇمىسپەن قامتۋ-2020» باعدارلاماسىنىڭ ورىندالۋ بارىسىن قاداعالاۋ ماقساتىندا دا قوعامدىق باقىلاۋ جۇمىستارىن جۇرگىزىپ وتىرعانى ايتىلدى.
بۇل ماڭىزدى مىندەتتەردى ءتيىمدى جۇزەگە اسىرۋ ءۇشىن «اۋىل» پارتياسى وتكەن جىلدىڭ 8 جەلتوقسانى كۇنى قازاقستان رەسپۋبليكاسىنىڭ كاسىپوداقتار فەدەراتسياسىمەن ءوزارا تۇسىنىستىك جانە ىنتىماقتاستىق تۋرالى مەموراندۋمدى بەكىتكەن. بۇل قۇجات پارتيا باعدارلاماسىن جۇزەگە اسىرۋدا جانە ەڭبەك قارىم-قاتىناستارى سالاسىندا قوعامدىق باقىلاۋ ورناتۋ جۇيەسىن قۇرۋدا ۇلكەن ماڭىزعا يە.
ايناش ەسالي.
«ەگەمەن قازاقستان».
الماتى.