قازاقستان رەسپۋبليكاسى ورتالىق سايلاۋ كوميسسياسىنىڭ كەشەگى وتىرىسىندا وسك «بىرلىك» ساياسي پارتياسىنىڭ پارتيالىق ءتىزىمىن تىركەدى. قاۋلى جوباسىمەن كوميسسيانىڭ حاتشىسى باقىت مەلدەشوۆ تانىستىردى.
«سىزدەردىڭ نازارلارىڭىزعا «بىرلىك» ساياسي پارتياسىنىڭ پارتيالىق ءتىزىمىن تىركەۋ تۋرالى قاۋلى جوباسى ۇسىنىلىپ وتىر. قۇجات بويىنشا «بىرلىك» ساياسي پارتياسىنىڭ پارتيالىق ءتىزىمى ءتىركەلەدى. تىركەلگەن پارلامەنت ءماجىلىسىنىڭ دەپۋتاتتىعىنا كانديداتتارعا كۋالىك بەرىلەدى. كانديداتتاردىڭ سانى – 8», – دەدى باقىت مەلدەشوۆ.
ونىڭ حاباردار ەتكەنىندەي, پارتيالىق تىزىمگە ەنگىزىلگەن ازاماتتاردىڭ قر-نىڭ «سايلاۋ تۋرالى» زاڭناماسىنا سايكەستىگى ەلىمىزدىڭ ىشكى ىستەر مينيسترلىگى مەن باس پروكۋراتۋراسى ارقىلى تەكسەرىلگەن. اتالعان ۆەدومستۆولار بەرگەن اقپاراتتارعا سايكەس, پارتيالىق تىزىمدەگى ازاماتتاردىڭ بارلىعىنىڭ دا زاڭعا سايكەستىگى انىقتالعان. كانديداتتاردىڭ جانە ولاردىڭ جۇبايلارىنىڭ تابىسى جانە مۇلكى تۋرالى دەكلاراتسيالارى سالىق ورگاندارىنىڭ انىقتامالارىمەن راستالعان.
وسك مۇشەلەرى قاۋلى جوباسىن ءبىراۋىزدان ماقۇلدادى جانە «بىرلىك» ساياسي پارتياسىنىڭ اتاۋى داۋىس بەرۋ بيۋللەتەنىنە ەنگىزىلەتىن بولىپ شەشىم قابىلداندى. بۇدان سوڭ ورتسايلاۋكوم باسشىسى قۋاندىق تۇرعانقۇلوۆ وسك-نىڭ وتىرىسىنا قاتىسقان «بىرلىك» ساياسي پارتياسى توراعاسىنىڭ ورىنباسارلارى ت. قۋانىشەۆقا جانە ب. بايقاداموۆقا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتاردىڭ كۋالىكتەرىن تاپسىردى, سونداي-اق, «بىرلىك» پارتياسىنىڭ پارتيالىق تىزىمىنە ەنگىزىلگەن ءماجىلىس دەپۋتاتتىعىنا بارلىق كانديداتتاردىڭ كۋالىكتەرىن بەردى.
اتاپ وتەيىك, 2016 جىلعى 12 اقپانداعى جاعداي بويىنشا ورتسايلاۋكومعا ۇسىنىلعان 6 پارتيالىق ءتىزىمنىڭ بارلىعى تىركەلدى. ولار – «نۇر وتان» پارتياسىنىڭ, «اق جول» قدپ-نىڭ, «اۋىل» حدپپ-نىڭ, قكحپ-نىڭ, جسدپ-نىڭ ءجانە «بىرلىك» سپ-نىڭ پارتيالىق تىزىمدەرى.
ورتالىق سايلاۋ كوميسسياسىنىڭ كەشەگى وتىرىسىندا, سونداي-اق, «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحات دەپۋتاتتارىنىڭ كەزەكتى سايلاۋىنا حالىقارالىق ۇيىمنىڭ بايقاۋشىلارىن اككرەديتتەۋ تۋرالى» قاۋلى دا قابىلداندى. وسك مۇشەسى تاتيانا وحلوپكوۆانىڭ ايتۋىنشا, اتالعان قاۋلىعا سايكەس قازاقستان رەسپۋبليكاسى ورتالىق سايلاۋ كوميسسياسى جانىنان قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا ەقىۇ/دياقب ميسسياسىنىڭ العاشقى 12 بايقاۋشىسى اككرەديتتەلگەن. سونىمەن قاتار, «سايلاۋ تۋرالى» زاڭنىڭ 12-بابىنا جانە 19-بابىنىڭ 8-تارماعىنا سايكەس ورتسايلاۋكوم زاڭنامادا بەلگىلەنگەن تاپرتىپپەن سايلانعانعا دەيىن جامبىل وبلىستىق سايلاۋ كوميسسياسىنىڭ شىعىپ قالعان مۇشەسىنىڭ ورنىنا س.ماديەۆانى تاعايىندادى.
ءاليسۇلتان قۇلانباي,
«ەگەمەن قازاقستان».
سۋرەتتى تۇسىرگەن
ەرلان وماروۆ.