زەرەندى اۋدانىنداعى «ۆيكتوروۆكا» جشس ۇنەمشىلدىك قوزعالىسىن ورىستەتۋدە. ماسەلەن, شارۋاشىلىق پولشادان ساتىپ الىنعان بۋ قازاندىعى ارقىلى شىعىن كولەمىن ەداۋىر ازايتىپ, قورشاعان ورتانىڭ تازالىعىن قامتاماسىز ەتۋدە.
بۇل قازاندىقتىڭ وزىندىك ەرەكشەلىگىن اتاپ كورسەتكىمىز كەلەدى. ونى قولدانۋ قاراپايىم ءارى ءتيىمدى بولىپ شىقتى. كەڭسە, تەحنيكا تۇراقتارىنا, ماشينا-تراكتور شەبەرحاناسى مەن الەۋمەتتىك نىساندارعا جىلۋ بەرەتىن بۋ قازاندىعىندا كومىردىڭ ورنىنا زىعىر سابانى جاعىلادى. ساباندى جاعۋ ءۇشىن تامىزىقتىڭ دا قاجەتى جوق. سىرەڭكە تۇتاتساڭ بولدى, لاپ ەتە قالادى. قاقپاعى جابىلعاننان سوڭ پەشتەگى وراما 2 ساعات بويى شوقتانىپ جاتادى. ايازدى كۇندەرى تاۋلىگىنە 12 زىعىر وراماسى جاعىلسا, 20 گرادۋسقا دەيىنگى سۋىق كۇندەرى 8 وراما جەتىپ جاتىر.
– سىيىمدىلىعى 25 تەكشە مەتر قازاندىقتاعى سۋ اۋەلى قايناتىلادى, – دەيدى جشس ديرەكتورى ۆيكتور اندريۋحين. – ول ارنايى سورعىش ارقىلى جىلۋ جۇيەسىنە جىبەرىلەدى. قىزۋ مولشەرى كومپيۋتەر ارقىلى رەتتەلىپ وتىرادى. بۇرىنعى بۋ قازاندىعىندا تاۋلىگىنە قۇنى 30 مىڭ تەڭگەگە باعالانعان 2-3 توننا كومىر جاعىلاتىن. ال, زىعىر سابانىنىڭ ءبىر وراماسىنا جۇمسالاتىن شىعىن 900 تەڭگەنى قۇرايدى. قاراپايىم ەسەپكە جۇگىنسەك, قازىر تاۋلىگىنە 9 مىڭ تەڭگەگە باعالانعان زىعىر ورامالارى جاعىلادى. ياعني, بۇرىنعى جىلدارى جۇمسالاتىن قارجىنىڭ 60-70 پايىزى ۇنەمدەلۋدە. ءبىز كوپتەن بەرى مايلى داقىلداردى وسىرۋمەن اينالىسامىز. زىعىردىڭ سابانى ۆيكتوروۆكا مەن كراسيلوۆكا سەلولارىنىڭ ىرگەسىندە مولىنان مايالانعان.
باقبەرگەن امالبەك,
«ەگەمەن قازاقستان».
اقمولا وبلىسى,
زەرەندى اۋدانى.