«ءساتتى قادام» رەسپۋبليكالىق جوباسى اياسىندا جۇزەگە اسادى
شىعىس وڭىرىندە «نۇر وتان» پارتياسىنىڭ «ءساتتى قادام» اكتسياسى ساتىمەن جۇزەگە اسىپ كەلەدى. اتالعان جوبا اياسىندا جوعارى نەمەسە ارنايى وقۋ ورىندارىن تامامداعان جەتىم جانە اتا-انا قامقورلىعىنسىز قالعان بالالار جۇمىسقا ورنالاستىرىلۋدا. كەشە د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىندە جاسوتاندىقتار وڭىردەگى بىرقاتار ءىرى كاسىپورىنداردىڭ جەتەكشىلەرىمەن باس قوستى. كەزدەسۋگە جوعارى جانە ارنايى وقۋ ورىندارىندا وقيتىن 50-دەن استام جەتىم جانە اتا-انا قامقورلىعىنسىز قالعان بالالار قاتىستى. جيىن بارىسىندا «ءساتتى قادام» جوباسى اياسىندا جوعارى جانە ارنايى وقۋ ورىندارىن ءتامامدايتىن تۇلەكتەردى جۇمىسقا ورنالاستىرۋ جانە قولداۋ كورسەتۋ, سونىمەن قاتار مەملەكەتتىك مەكەمەلەر مەن ۇلكەن كاسىپورىنداردا جۇمىس ىستەيتىن جاستارمەن بايلانىس ورناتۋ ءۇشىن كاسىپورىن باسشىلارىمەن كەلىسىمشارت بەكىتىلدى.
– «نۇر وتان» پارتياسىنىڭ نەگىزگى باسىمدىقتارىنىڭ ءبىرى – الەۋمەتتىك ساياساتتى ءجۇزەگە اسىرۋ. ەلباسى جاستاردىڭ جۇمىسقا ورنالاسۋى ءۇشىن مەملەكەتتىك مەكەمەلەر مەن ءتۇرلى كاسىپورىنداردا العاشقى تاجىريبەنى جيناقتاپ, ءبىلىمىن ەڭبەكپەن ۇشتاۋىنا قولداۋ كورسەتۋ جونىندە ۇنەمى ايتىپ كەلەدى. وسى ارقىلى ەكى ماسەلەنىڭ الدىن الۋعا بولادى. ياعني, جاستاردىڭ اراسىندا جۇمىسسىزدىقتىڭ وسۋىنە جول بەرمەۋ جانە جاس قازاقستاندىقتاردى ەل ەكونوميكاسىن جاڭعىرتۋعا تارتۋ. «ءساتتى قادام» جوباسى وسى ماسەلەلەردىڭ شەشىمىن قاراستىرادى, – دەدى پارتيانىڭ «جاس وتان» جاستار قاناتى وبلىستىق فيليالىنىڭ ءتورايىمى مارجان باقىت.
ونىڭ ايتۋىنشا, جوبا اياسىندا مەملەكەتتىك ورگاندار مەن ۇلتتىق كومپانيالاردا جاس مامانداردىڭ تاجىريبەدەن ءوتۋىن ۇيىمداستىرۋ, جوعارى جانە كاسىپتىك-تەحنيكالىق ءبىلىم العان جەتىم بالالاردى جۇمىسقا ورنالاستىرۋ, جاستاردىڭ جۇمىسپەن قامتىلۋى تۋرالى شىنايى جاعدايدى باقىلاۋ جانە مونيتورينگ جاساۋ سىندى ماڭىزدى مىندەتتەر قاراستىرىلعان.
بۇگىندە بۇل جوبانى جۇزەگە اسىرۋعا شىعىسقازاقستاندىق كاسىپورىندار ۇلكەن قولداۋ كورسەتىپ وتىر. اتاپ ايتقاندا, كەزدەسۋ بارىسىندا «جاس وتان» جاستار قاناتىنىڭ وبلىستىق فيليالىنىڭ جەتەكشىسى مارجان باقىت «ءۇلبى مەتاللۋرگيالىق زاۋىتى» اق جاستار بىرلەستىگىنىڭ توراعاسى ميحايل بايتەرياكوۆپەن, «شىعىس-ءسۇت» جشس باس ديرەكتورى سەيىلجان سايلاۋباەۆپەن, «ورەول» جشس ديرەكتورى سەرگەي كوروتينمەن جانە «وسكەمەن قاعاز فابريكاسى» جشس ديرەكتورى ەرلان جارمۇحامەتوۆپەن ءوزارا ارىپتەستىكتى دامىتۋ جونىندەگى مەموراندۋمعا قول قويدى.
– ءبىزدىڭ نەگىزگى مىندەتىمىز «ءساتتى قادام» جوباسى شەڭبەرىندە جاستار ساياساتىن جۇزەگە اسىرۋ, جاستار قوزعالىسىن دامىتۋعا باعىتتالعان باعدارلامالار مەن جوبالاردى جۇزەگە اسىرۋ شەڭبەرىندە ارىپتەستىك ورناتۋ, قوعامنىڭ بارلىق سالاسىن جاستاردى شىعارماشىلىق, ءمادەني, رۋحاني جانە زياتكەرلىك تۇرعىدان دامىتۋعا تارتۋ بولماق, – دەيدى شىعىسقازاقستاندىق جاسوتاندىقتار.
اتالعان باعدارلاما اياسىندا جەتىم جانە اتا-انا قامقورلىعىنسىز قالعان بالالاردى جۇمىسپەن قامتۋ ماسەلەسىن 2016-2018 جىلدار ارالىعىندا تولىعىمەن شەشۋ كوزدەلگەن.
دۋمان اناش,
«ەگەمەن قازاقستان».
وسكەمەن.