احمەت جۇبانوۆ – ۇلى دالانىڭ اۋەزدىك شەجىرە-مۇراسىن تۇپنۇسقا تۇرىندە ۇرپاعىنا جەتكىزىپ, رۋحاني تىرەگىنە اينالدىرعان زامانا دارابوزى. بۇل جاننىڭ وسكەن-ونگەن ورتاسىنا, رۋحاني-ۇستامدىق قاعيداسىنا, ماقسات-ارمانىنا, جان الەمىنە, ۇنەمى الىس-تارتىستا وتكەن ءومىر جولىنا تەرەڭىرەك ءۇڭىلىپ, وي تولقىتساق.
قازان توڭكەرىسى, كەڭەستىك سوتسياليزم قۇرىلىمى قازاق حالقىنا شەكسىز ازاپ اكەلگەنى تاريحتان بەلگىلى. قولدان جاسالعان اشارشىلىق قاسىرەتىنەن 3 ميلليونعا جۋىق ادام قۇربان بولسا, ارتىنان ەلىم, جەرىم دەپ ەڭىرەپ تۋعان ۇلت زيالىلارى اتىلدى. وسىناۋ قاندى زاماندا مەيلىنشە جەمىستى دە جەڭىستى ەڭبەك ەتكەن اقاڭنىڭ باسىنان 1953 جىلدىڭ ساۋىرىنە دەيىن ءولىمنىڭ قارا بۇلتى سەيىلگەن ەمەس. «فەوداليزمنىڭ قۇندىلىقتارىن ۋاعىزداۋ اسپاپتارى» دومبىرا مەن قوبىزدان وركەستر قۇرىپ, «بارىمتاشى-ۇرى» قۇرمانعازىنى حالقىنىڭ ارداقتى پەرزەنتى ەتكەن «اسقىنعان ۇلتشىل», 1938 جىلى «حالىق جاۋى» اتانىپ اتىلعان تۋعان اعاسى قۇدايبەرگەننىڭ تاعدىرىن كەشۋگە از-اق قالدى. قازاقستان كومپوزيتورلار وداعىنىڭ قولجازبا قورىندا 1966 جىلى احمەت قۋان ۇلىنىڭ ءوز قولىمەن جازعان ءومىربايانى ساقتالىپتى. ءبىز سونىڭ ىزىمەن ءجۇرىپ, سونداعى كەيبىر وقيعالارعا كەڭىرەك ۇڭىلسەك...
احمەت 1906 جىلعى 29 ساۋىردە بۇرىنعى ورال وبلىسى, تەمىر ۇيەزى تەمىر-ورقاش بولىسىنداعى قۋسۋاقتام مەكەنىنىڭ №8 اۋىلىندا (قازىرگى اقتوبە وبلىسى تەمىر اۋدانى) قۋان جۇبانوۆتىڭ شاڭىراعىندا دۇنيەگە كەلدى. قۋان بالالارىن وقۋ-ءبىلىم ارناسىنا بەت بۇرعىزىپ, ساۋاتتى بولۋىن قالادى. احمەت قازاق جەرىنە كوشىپ كەلگەن پەرەسەلەندەرمەن ارالاسىپ, ورىس ءتىلىن دە ايتارلىقتاي مەڭگەردى. احمەت ءوزىن مۋزىكاعا باۋلىپ, باعىت بەرگەن العاشقى ۇستازى رەتىندە قۇسايىن اجىعاليەۆتىڭ ەسىمىن ۇلكەن ىلتيپاتپەن اتايدى. «ول ءبىلىمدار, سكريپكادا, ماندولينادا, بالالايكادا, دومبىرادا وينايتىن, نوتالىق ساۋاتى بار, يگى ىستەرگە نيەتتەنگەن ادام بولاتىن», دەيدى. سونىمەن قاتار بالا احمەتتىڭ ادەبيەت پەن عىلىم الەمىنە قۇلشىنىسىن وياتقان ۋفا مەدرەسەسىنىڭ شاكىرتتەرى – اعاسى قۇدايبەرگەن مەن ونىڭ دوسى جيەنعالي تىلەپبەرگەنوۆتىڭ ەسىمى ەرەكشە اتالادى. ولار جازعى كانيكۋل كەزىندە اۋىلعا كەلىپ, بالالاردىڭ ساۋاتىن اشادى.
1919 جىلى اقتوبە وبلىسىندا سۇزەك اۋرۋى تارالىپ, حالىق قىناداي قىرىلادى. بۇل تراگەديا جۇبانوۆتار شاڭىراعىن قاتتى تەڭسەلتەدى. اكەسى قۋان وسى دەرتتەن كوز جۇمادى. اكەدەن ايىرىلعان وتباسىنىڭ بار تاعدىرى 13 جاسار احمەتكە جۇكتەلەدى. ول ءۇش اۋىلدىڭ كەڭەس حاتشىسى قىزمەتىن اتقارىپ, تىرشىلىك قامى ءۇشىن ەڭبەككە ەرتە جەگىلەدى. ونىڭ ومىرىندەگى ەلەۋلى قۇبىلىس – 1928 جىلى اقتوبە قالاسىندا پارتاكتيۆ كۋرسىندا وقىعان كەزىندە بولادى. ۆارشاۆا كونسەرۆاتورياسىنىڭ تۇلەگى, سكريپكاشى پەتر چەرنيۋك سولفەدجيو, گارمونيا, مۋزىكا تەورياسى پاندەرىنەن, سكريپكادا ويناۋ ساباقتارىنان جۇيەلى ءتالىم بەرەدى. بۇعان قوسا, بولاشاق كومپوزيتور ماتەماتيكا, فيزيكا, حيميا, ورىس ءتىلى مەن ادەبيەتىن, تاريح پاندەرىن ءوز بەتىمەن وقىپ, ەمتيحاندى ەكستەرنمەن تاپسىرىپ, ورتا مەكتەپتى بىتىرەدى.
جەتى جاس ۇلكەندىگى بار قۇدايبەرگەننىڭ احمەتكە دەگەن ىقىلاس-نيەتى, ىقپالى ەرەكشە بولادى. ول 1929 جىلى لەنينگراد قالاسىندا ا.ەنۋكيدزە اتىنداعى شىعىس تىلدەرى ينستيتۋتىنىڭ اسپيرانتۋراسىندا وقىپ ءجۇرىپ, احمەتتى قولىنان جەتەكتەپ, وسىنداعى كونسەرۆاتوريانىڭ گوبوي اسپابىنا, پروفەسسور پاۆەل نيماننىڭ سىنىبىنا تۇسىرەدى. ۇشقىر ويلى, قۇشتار سەزىمدى اقاڭا بۇل جەردە ورىس مۋزىكا ونەرىنىڭ نەبىر اتاقتى عالىم-ۇستازدارى ءدارىس بەرەدى. نيمان كونسەرۆاتورياداعى قىزمەتىنە قوسا, لەنينگرادتاعى اتاقتى اندرەەۆ اتىنداعى ورىس حالىق اسپاپتارى وركەسترىنىڭ كوركەمدىك جەتەكشىسى ءارى باس ديريجەرى ەدى. ستۋدەنت احمەت وسى وركەستردىڭ رەپەتيتسيالارىنا ۇزبەي قاتىسىپ, ونداعى دىبىستىق-ينتوناتسيالىق يىرىمدەر قۇدىرەتىن, وركەستردەگى ءار اسپاپتىڭ ءوزارا قاۋىشۋ سىڭىمدىلىگىن, گارمونيالىق, پوليفونيالىق دامىتۋ تاسىلدەرىن, مۋزىكالىق قاقتىعىس دراماتۋرگياسىن, دىبىستاردىڭ سان الۋان ارتيكۋلياتسيالارىن اسقان قۇشتارلىقپەن بويىنا سىڭىرەدى.
كونسەرۆاتوريادا وقىعان 1929–1932 جىلدار احمەت ءومىرىنىڭ ەڭ ساۋلەلى, باقىتتى, جايماشۋاق كەزەڭى بولادى. ول مۇنداعى تاريحي-لينگۆيستيكالىق ينستيتۋتىنىڭ تۇراقتى تىڭداۋشىسى رەتىندە كسرو عىلىم اكادەمياسىنىڭ فونوارحيۆىندەگى ماتەريالدارمەن جۇمىس ىستەۋ مۇمكىندىگىنە قول جەتكىزىپ, مۋزىكالىق شىعارمالاردى نوتاعا دالمە-ءدال ءتۇسىرۋ تەحنيكاسىن جەتىك مەڭگەرەدى. مۋزىكالىق عىلىمعا, ونىڭ ىشىندە فولكلورعا دەگەن احمەتتىڭ كوڭىل حوشى وسى كەزدەن باس-تاۋ الدى. بەس جىلدىق كونسەرۆاتوريانى ءتورت جىلدا ۇزدىك تامامداعان احمەتكە وسىنداعى ونەرتانۋ اكادەمياسىنىڭ اسپيرانتۋراسىنا جولداما بەرىلىپ, ول نەمىس, فرانتسۋز تىلدەرىن قۇلشىنىسپەن مەڭگەرە باستايدى. احمەتتىڭ اسىل ارمانىنىڭ ءبىرى قازاق جاستارىنا جاپپاي مۋزىكالىق ءبىلىم بەرۋ ەدى. وسى ماقساتتا 1932 جىلى «مۋزىكا الىپپەسى» وقۋ قۇرالىن جارىققا شىعارادى. بۇل قازاق تىلىندەگى تۇڭعىش مۋزىكا وقۋلىعى ەدى.
1933 جىلى احمەتتىڭ تالاپ-تىلەگىنە ساي ۇكىمەتتىڭ قاۋلىسى شىعىپ, الماتىداعى قازاقتىڭ ۇلتتىق مۋزىكالىق تەاتر تەحنيكۋمىنىڭ ماتەريالدىق-تەحنيكالىق بازاسى ايتارلىقتاي نىعايتىلدى. شاكىرتتەر سانى كوبەيتىلىپ, ولارعا ستيپەنديا بەكىتىلدى. مۋزىكالىق-ەكسپەريمەنتالدىق شەبەرحانا, حالىق مۋزىكاسىن جيناۋ, نوتاعا ءتۇسىرۋ كابينەتى اشىلدى. ۇستازدىق قىزمەتكە كومپوزيتورلار ەۆگەني برۋسيلوۆسكي, لاتيف حاميدي, بوريس ەرزاكوۆيچ, مۋزىكالىق اسپاپتار جاساۋ شەبەرلەرى بوريس جانە مانۋيل رومانەنكولار شاقىرىلدى. امىرە قاشاۋباەۆ, ماناربەك ەرجانوۆ, يسا بايزاقوۆ, ماحامبەت بوكەيحانوۆ, لۇقپان مۇحيتوۆ, عانبار مەدەتوۆ ورىنداۋلارىندا حالىق اندەرى مەن كۇيلەرى نوتاعا ءتۇسىرىلدى.
تەحنيكۋم جانىنان دومبىرا مەن قوبىز سىنىبى اشىلدى. بۇعان دەيىن دومبىرا – «فەوداليزمنىڭ يدەيالىق قارۋى», قوبىز «شامانيزم اپيىنى» سانالىپ, شاكىرتتەرگە تەك ەۋروپالىق اسپاپتاردى عانا ۇيرەتۋ ءتارتىبى بولاتىن. احمەت قۋان ۇلى دومبىرا مەن قوبىزدا وينايتىن 17 وقۋشىدان انسامبل قۇرىپ, رەپەرتۋارىنا ۇتىمدى دا ۇتقىر شىعارمالاردى ەنگىزدى. ونى وقۋ-اعارتۋ حالىق كوميسسارياتى باسشىلارىنا كورسەتىپ, بۇل باعىتىنىڭ ومىرشەڭ ەكەنىنە كوزىن جەتكىزدى. اقاڭنىڭ ەندىگى ماقساتى حالىق اسپاپتارى وركەسترىن قۇرۋ ەدى. 1934 جىلعى ماۋسىم ايىندا بۇل ويى دا ىسكە استى. جاڭا ۇجىم بۇكىلقازاقستاندىق حالىق ونەرى سلەتىندە حالىق كۇيلەرى «كەڭەس», «قاراباس», «بي كۇيى», «ايجان قىز», «بالقۇراي» مەن سەگىز سەرىنىڭ «قارعاش» اندەرىن ورىنداپ, وركەستردىڭ ۇلت ونەرىنە اۋاداي قاجەت ەكەنىن دالەلدەدى. سوندىقتان 1934 جىلدىڭ 25 ماۋسىمى الماتى مۋزىكالىق-دراما تەحنيكۋمى جانىندا قۇرىلعان قازتسيك اتىنداعى وركەستردىڭ مۇراگەرى – قۇرمانعازى اتىنداعى ۇلتتىق اكادەميالىق حالىق اسپاپتارى وركەسترىنىڭ قۇرىلعان كۇنى سانالادى. 1935 جىلى وسى حالىق اسپاپتارى وركەسترى قازاقستانداعى العاشقى كونتسەرتتىك ۇيىم – فيلارمونيانىڭ قۇرامىنا ەندى دە, ونىڭ ديرەكتورى بولىپ احمەت جۇبانوۆ تاعايىندالدى.
1936 جىلعى مامىر ايىندا ماسكەۋدە قازاقستاننىڭ مادەنيەتى مەن ونەرىنىڭ ءبىرىنشى دەكاداسى ءوتتى. دەكادا كەزىندە ە.برۋسيلوۆسكيدىڭ «قىز جىبەك», «جالبىر» وپەرالارى كورسەتىلىپ, «كسرو حالىق ءارتىسى» اتاعىنا يە بولعان كۇلاش بايسەيىتوۆا «قازاق بۇلب ۇلى» اتاندى. احمەت جۇبانوۆتىڭ باسقارۋىنداعى قۇرامىندا 40 ورىنداۋشىسى بار قازتسيك اتىنداعى حالىق اسپاپتارى وركەسترى قۇرمانعازىنىڭ «سارىارقا», «اداي», «سەرپەر», «بالبىراۋىن», «كوبىك شاشقان», داۋلەتكەرەيدىڭ «قوسالقا» كۇيلەرى, حالىق ءانى «قىزىل بيداي» (جامال وماروۆا) ورىنداپ, قازاق مۋزىكاسىن ۇلكەن تەاتر ساحناسىنان پاش ەتتى. احمەتكە «قۇرمەت بەلگىسى» وردەنى مەن «ەڭبەك سىڭىرگەن ءارتىس» اتاعى بەرىلدى. وسى جىلى ونىڭ «حالىق كومپوزيتورى قۇرمانعازى» عىلىمي-زەرتتەۋ ەڭبەگى جارىق كوردى. وسىدان باستاپ قۇرمانعازى تاقىرىبى اقاڭ شىعارماشىلىعىنىڭ تۇپقازىعىنا, كۇرە تامىرىنا اينالدى. 1944 جىلى قازاق حالىق اسپاپتارى وركەسترىنە, 1945 جىلى الماتى مەملەكەتتىك كونسەرۆاتورياسىنا قۇرمانعازىنىڭ ەسىمى بەرىلدى. سونداي-اق حاميت ەرعاليەۆتىڭ ليبرەتتوسى بويىنشا ءۇش اكتىلى «قۇرمانعازى» وپەراسى جازىلدى. سونىمەن قاتار احمەت جۇبانوۆ كومپوزيتور لاتيف حاميديمەن بىرلەسىپ, مۇحتار اۋەزوۆتىڭ ليبرەتتوسىنا جازىلعان ۇلتتىق وپەرامىزدىڭ كلاسسيكالىق ۇلگىسى سانالاتىن ءتورت اكتىلى «اباي» تۋىندىسىن ومىرگە اكەلدى. كومپوزيتورلار «ابايدى» 1944 جىلى قازان ايىندا تولىق ءبىتىرىپ, وسى جىلدىڭ 24 قاراشاسىندا وپەرا تەاترىنىڭ ساحناسىنان كورسەتتى. سول سەبەپتى وسى كۇندى ۇلتتىق وپەرانىڭ تۋعان كۇنى دەپ ەسەپتەيمىز. لاتيف ءحاميديدىڭ جان دوسى اقاڭا دەگەن شەكسىز ادالدىعى, دوستىعى ەرەكشە ەدى. «بۇرىنعى وتكەن باتىرلاردىڭ, بيلەردىڭ, حانداردىڭ, ءانشى-كۇيشى, جىراۋلاردىڭ بويىنداعى بار اسىل قاسيەت ءبىر اقاڭنىڭ بويىنان تابىلاتىن», دەيتىن. احمەت ارقىلى قازاق ەلىن, قازاق جەرىن, ونىڭ ءداستۇرلى مۋزىكاسىن جانىنداي جاقسى كورىپ, وسى مەكەندە جانى, مۇراسى قالاتىنىن تەبىرەنە تولعايتىن.
«اباي» وپەراسى تەاتردىڭ كوركەمدىك كەڭەسىندە تالقىلانعان كەزدە بولعان مىنا ءبىر ۋاقيعانى لاتەكەڭ ماعان قىزىقتى ەتىپ ايتقان ەدى. «مۇحتار اۋەزوۆ, عابيت مۇسىرەپوۆ, ۆاسيلي ۆەليكانوۆ, قانىبەك پەن كۇلاش بايسەيىتوۆتەر, قۇرمانبەك جانداربەكوۆ, باسقا دا ونەر قايراتكەرلەرى ءبىراۋىزدان قولداپ, «ابايدى» قابىلداۋ كەرەكتىگىن ايتىپ, داۋىسقا سالعان كەزدە, بۇعان دەيىن اۋزىن اشپاي وتىرعان برۋسيلوۆسكي ءسوز الىپ, «وپەرا جانرىنىڭ ءتيىستى كومپونەنتتەرى سىزدەر جازعان وپەرانىڭ 13-اكتىسىندە ىسكە اسادى», دەپ كەلتە قايىردى. مەن اڭ-تاڭ بولىپ: «احا, وپەرادا 13 اكتى بولمايدى عوي», – دەسەم, «لاتيف, ۇندەمە, ارتىنان تۇسىندىرەمىن», – دەدى سىبىرلاپ. كوپشىلىكتىڭ قولداۋىمەن «اباي» وپەراسى ساحناعا قويىلاتىن بولدى. كوڭىلىمىز كوكتەم كۇنىندەي جادىراپ, جۇرەگىمىز اتشا تۋلاپ, تەاتردىڭ جانىنداعى ساياباقتىڭ ورىندىعىنا كەلىپ جايعاسقاننان سوڭ اقاڭنان برۋسيلوۆسكيدىڭ جۇمباق ءسوزىنىڭ ماعىناسىن سۇرادىم. ول بىلاي دەدى: ء«اي, لاتيف, سەن قالاي تۇسىنبەيسىڭ؟ ول وپەرا جازۋ سەندەردىڭ قاي جورىقتارىڭ, قولدارىڭنان كەلگەن ەمەس, كەلمەيدى دە! قولىڭ كوتەرە المايتىن شوقپاردى بەلىڭە قىستىرما دەگەنى عوي». مىنە, وسى «اباي» وپەراسىنىڭ ساحناداعى ءومىرى 80 جىلدان استى. بۇل تۋىندى قانشاما تىڭدارمان ۇرپاعىنىڭ قۇلاق قۇرىشىن قاندىرىپ, رۋحاني الەمىنىڭ اسىلىنا اينالدى. بۇدان كەيىن دە احمەت پەن لاتيف بىرلەسىپ, 1947 جىلى مۇحتار اۋەزوۆتىڭ ليبرەتتوسى بويىنشا ءتورت اكتىلى «تولەگەن توقتاروۆ» وپەراسىن دۇنيەگە اكەلدى.
1951 جىلى احمەت جۇبانوۆتىڭ باسىنا تاعى دا قارا بۇلت ءۇيىرىلدى. برۋسيلوۆسكي, اراۆين, ەرزاكوۆيچ, مەسسمان «كازاحستانسكايا پراۆدا» گازەتىنە احمەتكە قارسى ۇلكەن ماقالا ۇيىمداستىرىپ, ونى مۇقان تولەباەۆتىڭ اتىنان شىعارتتى. احمەت جۇبانوۆقا «ماركسيستىك-لەنيندىك ەستەتيكانى اياققا باسۋشى, جايداق سوتسيولوگيزمدى دارىپتەۋشى, كەنەساريزمنىڭ جاقتاۋشىسى, ۇلتشىلدىق يدەيانى ناسيحاتتاۋشى» دەگەن ايىپ تاعىلدى. جانى ابدەن تيتىققان ادامعا ەندى قولداناتىن اقىرعى سوققى, ونى تۇرمەگە جاۋىپ, ءۇنىن ءبىرجولا ءوشىرۋ ەدى. بارلىق باسشىلىق, ۇستازدىق, عىلىمي قىزمەتىنەن الىنعان ول ماسكەۋدە وقىپ جاتقان بالالارى عازيزا مەن بولاتقا بارىپ, باس ساۋعالاۋدان باسقا امالى قالمادى. ارتىنان اقاڭدى قاتتى سىيلايتىن, كسرو كومپوزيتورلار وداعىنىڭ توراعاسى تيحون حرەننيكوۆ وعان ۇزاق مەرزىمگە «رۋزا» شىعارماشىلىق ۇيىنەن جەكە پاتەر بەردى. ەندى ول بار مۇمكىندىگىن كومپوزيتورلىق ەڭبەككە جۇمسادى. وسى تۇستا ونىڭ قالامىنان 50 شاقتى ءان مەن رومانس, «اباي», «يساتاي-ماحامبەت» سيمفونيالىق پوەمالارى, فورتەپيانوعا ارنالعان 10 تاجىك, 8 قازاق ءبيى, قوبىزعا, ۆيولونچەلگە ارنالعان «اريا», «رومانس», «كۇي», «كوكتەم», «ۆالس» تۋىندىلارى, «امانگەلدى», «رايحان» كينوفيلمدەرىنە, «اباي», «ماحامبەت-يساتاي», «سارى», «باقىت تاڭى», «ازات قىز», «قوزى كورپەش – بايان سۇلۋ» سپەكتاكلدەرىنە جازعان مۋزىكاسى لەك-لەگىمەن تۋىپ جاتتى. وسى جەردە ايتا كەتەرلىك جايت, مۇقان تولەباەۆ برۋسيلوۆسكيدىڭ تۇتاس شىعارماشىلىعىنا, مورالدىق ۇستانىمىنا قازاقستان كومپوزيتورلارى وداعىنىڭ ەكىنشى سەزىندە بىلاي دەپ باعا بەرگەن ەدى: «ەۆگەني گريگورەۆيچ ءوزىن ۇنەمى اسىرا باعالايدى, ول ءوزىن قازاقستاننىڭ مۋزىكالىق مادەنيەتىن تۇتاس بويىنا جيناقتاعان جالعىز ادام رەتىندە ەلەستەتەدى. ءتىپتى قازاقستاننىڭ مۋزىكالىق مادەنيەتىنىڭ تاريحى – برۋسيلوۆسكيدىڭ تاريحى دەپ ويلايدى... مەن ماسكەۋدەن كەلگەنىمدە ول مەنى: «سەن كەرەمەتسىڭ, ال جۇبانوۆ تۇككە تۇرمايدى!» دەگەن سوزدەرمەن قارسى الدى. ەگەر ونى ماسكەۋلىك كومپوزيتورلارمەن سالىستىرساق, ول ورتاشا دەڭگەيدەگى كومپوزيتور بولاتىن, بىراق ءوزى ولاي دەپ ەسەپتەمەدى. وعان شوستاكوۆيچ پەن پروكوفەۆ ۇنامايتىن. ال ءبىز بۇل كومپوزيتورلاردىڭ شىعارماشىلىعىن جاقسى بىلەمىز. ول ءشاپوريننىڭ جارتىسىنا دا تاتىمايدى. ول حالىق اندەرىن وپەراعا بىرىكتىرىپ, اۆتورلىعىن وزىنە يەمدەنىپ العان. ال وسى باعىتتان ءسال اۋىتقىسا بولدى, ساتسىزدىككە ۇشىرايدى. مۇنى ونىڭ «گۆارديا, العا!», «التىن ءدان» وپەرالارى دالەلدەيدى, سەبەبى ولار ساپاسىز شىعارمالار بولىپ شىقتى».
احمەتتىڭ ءومىرى, ينتەللەكتۋالدىق, شىعارماشىلىق كۇش-قۋاتى ايتىس-تارتىستا ءوتتى. وسىناۋ «تار جول تايعاق كەشۋ» جولىندا جاساعان جاسامپاز ەڭبەگىنىڭ مايەگىن تاتي الماعانى شىندىق. مۇنداي جاعداي ونىڭ زامانداستارى قانىش ساتباەۆ پەن مۇحتار اۋەزوۆتىڭ دە باسىندا بولدى. 1953 جىلى ستالين ولگەننەن كەيىن احمەت جۇبانوۆ تولىق اقتالىپ, وعان بارلىق ماراپات-اتاعى قايتارىلدى. وسىلايشا, عاسىرلار بويى وشپەگەن, نايزاسىنىڭ ۇشىنا جاۋ مىنگىزگەن حالقىنىڭ تەكتى ۇرپاعى احمەت جۇبانوۆ قايتپاس قايراتىمەن, ەسەلى دە ەڭسەلى ەڭبەگىمەن عالامات تۇعىرعا كوتەرىلدى. ونىڭ «عاسىرلار پەرنەسى», «قۇرمانعازى», «مۇقان تولەباەۆ», «مۋزىكاداعى ءبىرىنشى قادامدار», «قازاقتىڭ حالىق اسپاپتارى», «زامانا بۇلبۇلدارى», ء«ان-كۇي ساپارى», «وسكەن ونەر» ەڭبەكتەرى وسىعان ايعاق. قازاق ەلىنىڭ ءتولتۋما مۋزىكا مادەنيەتىن ساقتاپ دامىتۋدا بار ءومىرىن سارپ ەتكەن زامانا دارابوزى احمەت جۇبانوۆتىڭ ەسىمى قازاق ەلىمەن بىرگە جاساپ, حالىق جۇرەگىندە ماڭگى ساقتالارى حاق.
جولامان تۇرسىنباەۆ,
كومپوزيتور