استانا قالاسىنداعى №91 مەكتەپ-گيمنازياسىنىڭ 10-سىنىپ وقۋشىسى جاڭگىر ءابۋوۆ «سۋ ءىزى» اتتى ينتەراكتيۆتى پلاتفورمانى ازىرلەدى. جۇيە ءاربىر قولدانۋشىعا ءوزىنىڭ كۇندەلىكتى سۋ تۇتىنۋ كولەمىن ناقتى ەسەپتەپ, ونى ازايتۋعا ارنالعان ۇسىنىستار الۋعا مۇمكىندىك بەرەدى, دەپ جازادى Egemen.kz.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ جوبانىڭ اۆتورىمەن جانە وعان جەتەكشىلىك ەتكەن پەداگوگتەرمەن كەزدەستى. كەزدەسۋ قورىتىندىسىندا «سۋ رەسۋرستارىنىڭ اقپاراتتىق-تالداۋ ورتالىعى» كەاق پەن وقۋشىنىڭ اتا-اناسى اراسىندا «سۋ ءىزى» پلاتفورماسىن بىرلەسىپ جەتىلدىرۋ جانە ەنگىزۋ تۋرالى كەلىسىم جاسالدى. قۇجات ينتەراكتيۆتى جۇيەنى دامىتۋعا باعىتتالعان ناقتى قادامداردى كوزدەيدى.
پلاتفورماداعى ەسەپتەۋلەر قولدانۋشىلاردىڭ كۇندەلىكتى داعدىلارى نەگىزىندە جۇرگىزىلەدى. تۇرمىستا جانە تاماقتانۋ بارىسىندا تىكەلەي پايدالانىلاتىن سۋ عانا ەمەس, جاناما تۇتىنۋ دا ەسەپكە الىنادى. جۇيە ەنگىزىلگەن دەرەكتەردى اۆتوماتتى تۇردە تالداپ, سۋ ۇنەمدەۋدىڭ ءتيىمدى جولدارىن ۇسىنادى. بۇل – ءار ادامنىڭ ءوز ادەتىن قايتا قاراپ, رەسۋرستى ۇتىمدى پايدالانۋعا كوشۋىنە ىقپال ەتەتىن قۇرال.
جوبانىڭ تەڭ اۆتورى, وسى مەكتەپتىڭ 10-سىنىپ وقۋشىسى اديات شاديار دا باستامانى تولىقتىرا ءتۇستى. ول بالالار اراسىندا سۋ ۇنەمدەۋ مادەنيەتىن قالىپتاستىرۋعا ارنالعان قىسقامەتراجدى بەينەروليكتەر سەرياسىن ۇسىندى. روليكتەردە «تامشى» انيماتسيالىق كەيىپكەرى ارقىلى سۋدى ۇنەمدەۋدىڭ قاراپايىم ءارى ءتيىمدى تاسىلدەرى تۇسىندىرىلەدى.
سۋ رەسۋرستارىن باسقارۋ سالاسىن تسيفرلاندىرۋ تەتىكتەرى قارالدى
سونىمەن قاتار سۋ رەسۋرستارىنىڭ اقپاراتتىق-تالداۋ ورتالىعى مەن وقۋشىنىڭ اتا-اناسى اتالعان اقپاراتتىق ماتەريالداردى بىرلەسىپ تاراتۋ تۋرالى كەلىسىمگە قول قويدى. بۇل باستاما اعارتۋشىلىق جۇمىستىڭ اۋقىمىن كەڭەيتۋگە مۇمكىندىك بەرەدى.
مينيستر نۇرجان نۇرجىگىتوۆ وقۋشىلاردىڭ ەڭبەگىنە جوعارى باعا بەرىپ, پەداگوگتەر مەن اتا-انالاردىڭ ۇلەسىن ەرەكشە اتاپ ءوتتى.
ء«بىزدىڭ الدىمىزدا تۇرعان مىندەتتەردىڭ ءبىرى – سۋدى ۇنەمدەۋ مادەنيەتىن قالىپتاستىرۋ ارقىلى قوعامنىڭ سۋ رەسۋرستارىنا دەگەن كوزقاراسىن وزگەرتۋ. 2024 جىلدان باستاپ «سۋدى ۇنەمدە – بولاشاقتى ساقتا» جوباسى جۇزەگە اسىرىلىپ كەلەدى. مەكتەپتەردە, كوللەدجدەردە جانە جوعارى وقۋ ورىندارىندا ەكوساعاتتار وتۋدە. ورتاق كۇش-جىگەردىڭ ارقاسىندا سۋ رەسۋرستارىن ۇتىمدى پايدالانۋ مادەنيەتىن قالىپتاستىرامىز دەپ سەنەمىن», دەدى ۆەدومستۆو باسشىسى.
ايتا كەتەيىك, بىلتىر مينيسترلىك الماتى قالاسىنداعى №79 گيمنازيا وقۋشىسى دانا قادىربەكپەن مەموراندۋم جاساسقان ەدى. ول زاماناۋي نانوماتەريالدار ارقىلى اتموسفەرادان سۋ جينايتىن قۇرىلعى ازىرلەگەن. جاس ونەرتاپقىش جۋىردا ۆەنادا وتكەن بۇۇ فورۋمىندا ۇزدىك جوبالار قاتارىنان كورىنىپ, ۇزدىك ۇشتىككە ەندى.
GIZ قازاقستاننىڭ سۋ رەسۋرستارى جانە يرريگاتسيا مينيسترلىگىنە 240 جاڭا تەحنيكا بەرەدى