قوستاناي وبلىستىق سايلاۋ كوميسسياسى سەمينار-كەڭەس وتكىزدى
ەلىمىزدە پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن وتكىزۋ ناۋقانى باستالىپ كەتتى. الەمدى الاڭداتىپ وتىرعان داعدارىس كەزىندە كەزەكتەن تىس سايلاۋدىڭ وتۋىنە ەكونوميكالىق ۇنەم جانە ساياسي بەرىكتىلىك تۇرعىسىنان تۇسىنىستىكپەن قاراپ وتىرعان سايلاۋشىلار ءۇشىن وسى ساياسي ناۋقاننىڭ اسا دەموكراتيالىقپەن, مولدىرلىكپەن, اشىقتىقپەن ءوتۋىنىڭ ماڭىزى زور. سوندىقتان وبلىستىق سايلاۋ كوميسسياسىنىڭ ءتورايىمى انتونينا ماركوۆا سەمينار-كەڭەستە ءتۇرلى دەڭگەيدەگى بۇقارالىق اقپارات قۇرالدارىنىڭ وكىلدەرىنە ساياسي ناۋقاننىڭ بارىسى جانە ونى جۇرگىزۋدىڭ بەكىتىلگەن ەرەجەلەرى تۋرالى تاعى دا ايتىپ بەردى. انتونينا ميحايلوۆنا ساياسي ناۋقان باستالىسىمەن-اق جۋرناليستەرمەن وسى تاقىرىپتا بريفينگ وتكىزگەن بولاتىن.
– سايلاۋشىلارعا دا, سايلاناتىن ازاماتتارعا دا اقپارات نەگىزىنەن گازەتتەر مەن تەلەارنالار ارقىلى جەتەدى. سوندىقتان سايلاۋ ناۋقانىندا سايلاۋشىلار تۇسىنە الماي قالعان, قاتە ءتۇسىنىپ قالعان ساتتەر بولماۋى ءتيىس. سول ءۇشىن جۋرناليستەردى, ياعني رەسپۋبليكالىق جانە جەرگىلىكتى بۇقارالىق اقپارات قۇرالدارى وكىلدەرىن تاعى دا ءبىر جيناۋدى ءجون كوردىك. جۇرتشىلىقتىڭ ساياسي بەلسەندىلىگى وتە جوعارى, – دەيدى انتونينا ماركوۆا.
ماسليحاتتارعا كانديداتتار ۇسىنۋ 20 قاڭتار مەن 19 اقپان اراسىندا جۇرەتىندىگى بەلگىلى. بۇگىنگە دەيىن وبلىستا ءتۇرلى دەڭگەيدەگى ماسليحاتتارعا ۇسىنىلعان ۇمىتكەرلەردىڭ سانى 600-گە جەتكەن. ونىڭ ىشىندە 67 ادام – وبلىستىق ماسليحاتقا, 407 ادام – اۋداندىق, 126-سى قالالىق ماسليحاتتارعا دەپۋتات بولعىسى كەلەدى. ولاردىڭ بارلىعى دا ءوزىن ءوزى ۇسىنعان. ۇمىتكەرلەردىڭ 33 پايىزدان استامى ايەلدەر, 11 ۇلتتىڭ وكىلى.
– مۇنىڭ ءوزى ءتۇرلى دەڭگەيدەگى ماسليحاتتارعا كانديداتتار ۇسىنۋ جالعاسا بەرەتىنىن بىلدىرەدى. ءالى ۋاقىت بار. سونداي-اق, «نۇر وتان», «اق جول», «اۋىل», «قكحپ» پارتيالارى جانە تاعى باسقا ساياسي پارتيالار ماسليحاتتارعا ءوز كانديداتتارىن ۇسىنۋعا دايارلاۋدا, – دەدى انتونينا ماركوۆا.
سەمينار-كەڭەستە جينالعاندار تاراپىنان وبلىستىق سايلاۋ كوميسسياسى مۇشەلەرىنە بەرىلگەن ساۋالداردىڭ باسىم كوپشىلىگى ماسليحاتتارعا ۇمىتكەرلەردىڭ سايلاۋالدى ۇگىت جۇمىستارىنا بايلانىستى بولدى. ويتكەنى, حالىق سايلاۋدا ەلى, وتانى ءۇشىن ايانباي قىزمەت ەتەتىن قالاۋلىسىن قالت جىبەرمەي تاڭداپ الۋى ءتيىس. ول ءۇشىن سايلاۋالدى ۇگىت جۇمىستارى زاڭ اياسىنان شاشاۋ شىقپايتىنداي, ءادىل, ءمولدىر بولۋى ءتيىس. قازىر اقپارات تاراتۋعا گازەتتەر مەن تەلەارنالار, راديودان بولەك ينتەرنەت-رەسۋرس قوسىلدى. وسىعان وراي دا سايلاۋ كوميسسياسى مۇشەلەرى كوپتەگەن سۇراقتارعا جاۋاپ بەردى.
كانديداتتاردىڭ سايلاۋالدى ۇگىت جۇمىسىندا زاڭمەن بەكىتىلگەن جانە سوعان وراي ەسكەرۋدى قاجەت ەتەتىن ماسەلەلەر جەتكىلىكتى. سەميناردا سولاردىڭ بارلىعىن وبلىستىق سايلاۋ كوميسسياسى مۇشەلەرى جۋرناليستەرگە جەتە ءتۇسىندىردى. سايلاۋدا سايلاۋشىلار دا, سايلانۋشىلار دا تۇسىنبەي قالعان ماسەلە بولمايدى. سوندا عانا دەموكراتيا سالتانات قۇرماق.
ءنازيرا جارىمبەتوۆا,
«ەگەمەن قازاقستان».
قوستاناي.