جەرگىلىكتى پوليتسيانىڭ جۇمىس جاساي باستاعانىنا كوپ بولا قويعان جوق. دەگەنمەن, جاڭا قۇرىلىمداعى پوليتسيا قىزمەتكەرلەرىنىڭ جۇمىسىنا «نۇر وتان» پارتياسى تاراپىنان باقىلاۋ جاساۋدىڭ ارتىقتىعى بولمايتىن سەكىلدى. بۇعان اتالعان پارتيانىڭ اتىراۋ وبلىستىق فيليالى ۇيىمداستىرعان مەدياتۋر بارىسىندا كوز جەتكىزدىك.
فيليال توراعاسىنىڭ ءبىرىنشى ورىنباسارى ەربولات بەكتەمىروۆ باستاعان توپ الدىمەن تۇرمىستىق زورلىق-زومبىلىققا ۇشىراعان ايەلدەرگە كومەك كورسەتۋ ورتالىعىنىڭ بولىمشەسىندە جۇمىس بارىسىمەن تانىستى. بولىمشە مەڭگەرۋشىسى ايبارشىن يمانعاليەۆانىڭ پىكىرىنشە, 20 ورىنعا لايىقتالعان ءبولىمشەگە جەرگىلىكتى پوليتسيا قىزمەتكەرلەرىنىڭ باياناتى بويىنشا ادامدار قابىلدانادى. ويتكەنى, ايەلدەردىڭ تۇرمىستىق زورلىق-زومبىلىققا ۇشىراعانىن تەك پوليتسيا قىزمەتكەرلەرى عانا دالەلدەگەننەن كەيىن ولار بۇل بولىمشەنى زورلىق-زومبىلىققا ۇشىراعان ايەلدەر ءۇش ايعا پانالاي الادى. ءۇش ايدىڭ ىشىندە ولاردى ومىرگە بەيىمدەۋ, قۇقىقتىق ساۋاتتىلىعىن ارتتىرۋ ماقساتىندا زاڭگەر, پسيحولوگ, مەدبيكە سەكىلدى ارنايى ماماندار جۇمىس جۇرگىزەدى.
قازىر مۇندا 3 ايەل, 8 بالا بار. ءبىر ايەل جۇمىس جاسايدى. 4 بالا مەكتەپكە بارادى ەكەن. «ءبىزدىڭ ماقساتىمىز وسى بولىمشەگە كەلگەن ايەلدەردىڭ وتباسىن ساقتاپ قالۋعا جاعداي جاساۋ. وتباسىلىق كيكىلجىڭنىڭ نەگىزگى سالدارى 2012 جىلدان بولىمشەگە 101 ادامنىڭ 53 پايىزى وتباسىن ساقتاپ قالدى, 10 پايىزى اجىراستى. كەيبىرەۋلەرى كۇيەۋىنەن ەرتەرەك اجىراسقانىمەن, ءوز تۋىسقاندارىنان, دالىرەك ايتقاندا, اتا-اناسىنان, نە اعاسىنان زورلىق-زومبىلىققا ۇشىرايتىندارى دا بار», – دەيدى ايبارشىن يمانعاليەۆا.
بولىمشەگە ءتۇرلى زورلىققا ۇشىراعاندار كەلەدى. ولاردىڭ اراسىندا جەڭىل, ءتىپتى, اۋىر جاراقاتپەن كەلەتىندەر دە كەزدەسىپتى. دەگەنمەن, مۇنداعى تۇرعىننىڭ ءبىرى – ە.پريدانوۆا. ونىڭ تاعدىرى وسى كەزگە دەيىن بەلگىسىز بولىپ كەلدى. ءتىپتى, ونى تۋىستارى ومىردەن وتتىگە ساناپ, قۇقىق قورعاۋ ورگاندارى ارقىلى ءتىرىلەر ساناتىنان شىعارىلىپ تاستالعان. ويتكەنى, ول ازاماتتىق نەكەدەگى ن.ورلوۆپەن بىرگە شارۋا قوجالىعىنىڭ بىرىندە جۇمىس جاساپ, تۋىستارىنان حابار ءۇزىپ العان. كەيىن ولار تۇراتىن باسپانا ورتەنىپ, قۇجاتتارىنان ايىرىلىپ قالعان. ولاردىڭ ەكەۋىندە دە, ءۇش بالاسىندا دا جەكە باسىن كۋالاندىراتىن قۇجاتتارى جوق. قازىر ە.پريدانوۆا ارنايى كوميسسيانىڭ شەشىمىنە سايكەس ءۇش بالاسىمەن وسىندا تۇرىپ جاتىر.
«نۇر وتان» پارتياسىنىڭ مۇشەلەرى بۇدان سوڭ تۇرعىلىقتى جەرى جوقتاردى جانە اكىمشىلىك جازالانعانداردى قابىلداۋ-تاراتۋ بولىمشەسىنە كەلدى. مۇندا اتىراۋ قالالىق جەرگىلىكتى پوليتسيا بولىمشەسىنىڭ باسشىسى ەرلان بيعامباەۆتىڭ ايتۋىنشا, نەگىزىنەن تاياۋ شەتەلدەردىڭ, سونىڭ ىشىندە, وزبەكستان رەسپۋبليكاسى مەن رەسەي فەدەراتسياسىنىڭ ازاماتتارى كوبىرەك تۇسەدى. ولاردىڭ كوبى جۇمىس بابىمەن كەلىپ, قۇجاتتارىن جوعالتىپ الادى. مۇندايلار پوليتسيا قىزمەتكەرلەرىنىڭ جەدەل-پروفيلاكتيكالىق شاراسى بارىسىندا انىقتالىپ جاتادى. قازىر اتالعان بولىمشەدە 24 ادام جاتىر. ولاردىڭ دەنى وزبەكستان رەسپۋبليكاسىنىڭ ازاماتتارى, اراسىندا ايەلدەر دە بار. ءتىپتى, جەرگىلىكتى تۇرعىندار دا كەزدەسەدى. ارينە, 24 ادامنىڭ ءبارى بىردەي قۇجاتىن جوعالتقاندار ەمەس. كەيدە اكىمشىلىك سوتتىڭ قاۋلىسىمەن اكىمشىلىك قاماققا الىنعاندار دا وسىندا جاتادى. ماسەلەن, بىلتىر مۇندا 5 164 ادام اكەلىنسە, تەك بيىلعى قاڭتاردا عانا 422 ادام «مەكەندەپ» ۇلگەرگەن.
– ماقساتىمىز – جەرگىلىكتى پوليتسيا قىزمەتىنە پارمەندى باقىلاۋ جاساۋ. سول سەبەپتەن, جەرگىلىكتى پوليتسياعا قاراستى نىساندارعا رەيد جاساپ, «تۇرعىندارىنىڭ» احۋالىن ءبىلۋ, سونىمەن بىرگە, وسىندا جۇمىس جاسايتىن مامانداردىڭ پروبلەمالىق ماسەلەلەرىنە كوز جەتكىزۋ. «نۇر وتان» پارتياسى الداعى ۋاقىتتا جەرگىلىكتى پوليتسيا قىزمەتىنىڭ جۇمىسى ءتيىمدى بولۋى ءۇشىن پارتيالىق باقىلاۋدى كۇشەيتەدى. ءماسليحات دەپۋتاتتارى الدىندا جەرگىلىكتى پوليتسيا باسشىلارىنىڭ ەسەپ بەرۋىنە ىقپال ەتەمىز, – دەدى «نۇر وتان» پارتياسى اتىراۋ وبلىستىق فيليالى توراعاسىنىڭ ءبىرىنشى ورىنباسارى ەربولات بەكتەمىروۆ.
جولداسبەك شوپەعۇل,
«ەگەمەن قازاقستان».
اتىراۋ وبلىسى.