كەشە قاراعاندىداعى دوستىق ۇيىندە قازاقستان حالقى اسسامبلەياسىنىڭ «مەيىرىمدىلىك كەرۋەنى» اتتى جالپىۇلتتىق قايىرىمدىلىق اكتسياسى اياسىندا وبلىستىق قازاقستان حالقى اسسامبلەياسىنىڭ جانىنداعى انالار كەڭەسىنىڭ «بىرگە ءومىر ءسۇرۋ ونەرى» اتتى يگى شاراسى ءوتتى.
وتكەن جىلدىڭ 27 قاراشاسىندا استانادا قازاقستان حالقى اسسامبلەياسىنىڭ قولداۋىمەن قايىرىمدىلىق ۇيىمدارى, مەتسەناتتار جانە دونورلاردىڭ ءبىرىنشى رەسپۋبليكالىق سەزى وتكەن. سول جيىننىڭ قورىتىندىسىندا «مەيىرىمدىلىك كەرۋەنى» اكتسياسىنىڭ تۇساۋى كەسىلگەن بولاتىن. اتالعان شارا قاراعاندى وبلىسىندا دا جۇرتشىلىق تاراپىنان كەڭىنەن قولداۋ تاپتى دەۋگە نەگىز بار. سونىڭ ءبىر دالەلى رەتىندە وبلىستىق قازاقستان حالقى اسسامبلەياسىنىڭ وسى جولعى «بىرگە ءومىر ءسۇرۋ ونەرى» اكتسياسىن اتاۋعا بولادى.
قايىرىمدىلىق شاراسى اياسىندا وبلىستىق قازاقستان حالقى اسسامبلەياسىنا حابارلاسقان اتا-انالاردىڭ سال اۋرۋىنا شالدىققان بالالارىنا كومەك كورسەتىلدى. بۇدان بولەك, انالار كەڭەسىنىڭ مۇشەلەرى «ق ۇلىنشاق» بالالار ۇيىندەگى جەتىمدەردى ءوز قامقورلىقتارىنا الۋ جونىندە باستاما كوتەردى.
ۇيىمداستىرىلۋى جاعىنان جوعارى دەڭگەيدە وتكەن قايىرىمدىلىق شاراسىنا وبلىستىق قازاقستان حالقى اسسامبلەياسى حاتشىلىعىنىڭ باسشىسى ە.قۇسايىن, انالار كەڭەسىنىڭ ءتورايىمى س.نۇرماعانبەتوۆا, جەزقازعان قالالىق ءماسليحاتىنىڭ دەپۋتاتى, مەتسەنات ب.التىنبەكوۆ, «ق ۇلىنشاق» بالالار ءۇيىنىڭ ديرەكتورى س.بۇركەەۆا, قاراعاندى وبلىسىنداعى قالالىق جانە اۋداندىق انالار كەڭەستەرىنىڭ توراعالارى مەن مۇشەلەرى, ەتنومادەني بىرلەستىكتەردىڭ جەتەكشىلەرى قاتىستى.
قايرات ءابىلدينوۆ,
«ەگەمەن قازاقستان».
قاراعاندى.