كەشە ورتالىق كوممۋنيكاتسيالار قىزمەتىندە ينۆەستيتسيالار جانە دامۋ مينيسترلىگىنىڭ كولىك كوميتەتى توراعاسىنىڭ ورىنباسارى دميتري پوتلوۆ ءباسپاسوز ءماسليحاتىن وتكىزدى. ول «نۇرلى جول» ينفراقۇرىلىمدىق دامۋ باعدارلاماسىنىڭ شەڭبەرىندە سالىنىپ جاتقان «قۇرىق» كەشەندى پاروم پورتىنىڭ قۇرىلىس جۇمىستارى مەن تەمىرجولدىڭ ماڭىزدى نىساندارى جونىندە ايتتى.
قازىرگى تاڭدا الەمدىك ەكونوميكالىق قيىندىقتارعا قاراماي قازاقستان ينفراقۇرىلىمدىق باعدارلامالارىن جالعاستىرىپ جاتقانىن ايتقان كوميتەت توراعاسىنىڭ ورىنباسارى, كاسپي تەڭىزىنىڭ جاعالاۋىندا بوي كوتەرگەن «قۇرىق» پورتىنىڭ ماڭىزى جونىندە اڭگىمەلەدى. بۇگىنگى كۇندە جۇكتى جونەلتىپ ءارى قابىلداۋدا بارلىق مۇمكىندىكتەرىن سارقا پايدالانىپ وتىرعان «اقتاۋ» پورتى قازىرگى ترانزيتتىك تاۋار اعىنىن يگەرۋگە مۇرشاسى بولماي وتىرعان كورىنەدى. سول سەبەپتەن, سالىنىپ جاتقان «قۇرىق» كەشەندى پارومدىق پورتى اسپاناستى ەلىنەن باتىس ەۋروپاعا جول تارتاتىن جۇك كەرۋەندەرىن كاسپي تەڭىزى ارقىلى ازەربايجانعا, ودان ءارى تۇركيا ارقىلى كوزدەلگەن مەملەكەتتەرگە جەتكىزۋگە سەپتەسەتىن بولادى.
پورتتىڭ سالىنۋى ەلىمىزدىڭ ترانزيتتىك مۇمكىندىگىن ارتتىرا تۇسەتىنىن تاپتىشتەگەن د.پوتلوۆ, كەشەندى نىساننىڭ اسا پايدالى تۇستارى تۋرالى ايتىپ ءوتتى. «كەشەندى «قۇرىق» پارومدىق پورتى قىتاي مەن ەۋروپا اراسىندا جاسالىپ جاتقان جاڭا ترانزيتتىك ءدالىزدىڭ ماڭىزدى ورتالىعىنىڭ ءبىرى بولادى. بۇعان دەيىن «ارقالىق – شۇباركول» جانە «بەينەۋ – جەزقازعان» تەمىرجول ماگيسترالدارىن جۇزەگە اسىرعانىمىز بەلگىلى. ەندى «قۇرىق» ستانساسى ىسكە قوسىلسا جانە پورتقا تاياۋ جەرگە سالىناتىن زاۋىتتار بوي كوتەرسە ەل بيۋدجەتىن مولايتا تۇسەتىنى انىق. بۇعان قوسا, وسى جەردەن سۋ كولىكتەرىن جوندەيتىن جانە وعان قاجەت قوسالقى بولشەكتەر جاساپ شىعاراتىن زاۋىتتا سالىنادى. بۇل شارا «نۇرلى جول» ينفراقۇرىلىمدىق باعدارلاماسىن جۇزەگە اسىرۋمەن قاتار, تاۋەلسىزدىگىمىزدىڭ دە ىرگەسىن نىعايتا تۇسەدى. سونداي-اق, بۇگىندە قۇرىلىس جۇمىستارىندا 500-دەن استام ادام جۇمىسقا تارتىلعان بولسا, پورت پايدالانۋعا بەرىلگەن سوڭ 100-دەن استام تۇراقتى جۇمىس ورنىمەن قامتاماسىز ەتىلەدى», دەدى.
ونىڭ سوزىنە يلانساق, كەشەندى پارومدىق پورتتىڭ جانە وعان تيەسىلى نىسانداردىڭ قۇرىلىسى جوسپارعا ساي جۇرگىزىلىپ جاتىر ەكەن. ودان كەيىن ءسوز العان «قازاقستان تەمىر جولى» ۇك» اق-تىڭ تەمىرجول جەلىلەرى قۇرىلىسى جونىندەگى ديرەكتسياسى فيليالىنىڭ ديرەكتورى باقىت قارساقباەۆ جۋرناليستەردىڭ سۇراعىنا وراي, ەلوردانىڭ جاڭا تەمىرجول ۆوكزالى 2017 جىلدىڭ كوكتەمىندە سالىنىپ بولىپ, پايدالانۋعا بەرىلەتىنىن ايتتى. «بۇل جوبانى قتج جۇزەگە اسىرۋدا. قۇرىلىس نىساندارى كەلەر جىلدىڭ ءساۋىر ايىنا دەيىن سالىنىپ بىتەدى. وسى تۇرعىدا ۆوكزالدىڭ ۇلكەن تەرمينالى بار عيمارات جانە وعان كىرەتىن 2 شاقىرىمنان استام ەستاكادا قامتىلادى», دەدى ول.
نۇرباي ەلمۇراتوۆ,
«ەگەمەن قازاقستان».