حانتاڭىردەن ۇلىتاۋعا دەيىن

«پوەزيا! مەنىمەن ەگىز بە ەدىڭ؟ سەن مەنى سەزەسىڭ بە, نەگە ىزدەدىم؟ الاۋىرتقان تاڭداردان سەنى ىزدەدىم, قاراۋىتقان تاۋلاردان سەنى ىزدەدىم», – دەپ جىرلاعان مۇقاعالي اقىن شىندىعىندا دا پوەزيا­مەن ەگىز تۇلعا. ول دۇنيەگە شىر ەتىپ ەمەس, جىر ەتىپ كەلگەن سياقتى. ولەڭدەرى تىلگە جەڭىل, جۇرەككە جىلى تيەدى. قازاق پوەزياسىنىڭ قازاناتى سەكىلدى شاپقان سايىن شابىتتانا تۇسەتىن ماقاتاەۆ جىرلارى وقىرمان ويىن ءدوپ باسىپ, جۇرەگىنىڭ تورىنەن ورىن العانى قاشان. كەشە اقىننىڭ 85 جاسقا تولۋىنا وراي ۇلتتىق اكادەميالىق كىتاپحانانىڭ ۇيىمداستىرۋىمەن وتكەن جىرعا تولى, سىرعا تولى كەشتىڭ كۋاسى بولدىق. مەملەكەتتىك سىيلىقتىڭ لاۋرەاتى, م.ماقاتاەۆ اتىن­داعى سىيلىقتىڭ العاشقى يەگەرى, اقىن نەسىپبەك ايت ۇلى جۇرگىزگەن جيىننىڭ وزىنە ءتان ەرەكشەلىگى بولدى دەسەك, ارتىق ايتقاندىق بولماس. نەگە دەسەڭىز, بۇل كەشتە اقىن ءجۇرسىن ەرماننىڭ دا شىعارماشىلىعى كەڭىنەن ناسيحاتتالدى. سولاي بولۋى زاڭدى دا شىعار. سەبەبى, م.ماقاتاەۆ اتىنداعى سىيلىقتىڭ ەكى مارتە يەگەرى بولعان ءجۇرسىن ەرماننىڭ ولەڭ ومىرىندە مۇقاعاليدىڭ الار ورنى ەرەكشە ەكەنى ەستەلىكتەرىنەن ءبىلىنىپ تۇردى. اتالعان كەشكە جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى, پروفەسسور نامازالى وماشەۆ, «ەگەمەن قازاقستان» رەسپۋبليكالىق گا­زەتى» اق پرەزيدەنتى ساۋىتبەك ابدراحمانوۆ, رەجيس­سەر, پروفەسسور ساۋلەبەك اسىلحان قاتىسىپ, وي ساندى­عىنان سىر سۋىرىپ, قۇندى دەرەكتەرمەن قۇلاق قۇرى­شىن قاندىردى. سونىمەن قاتار, كىتاپحانا حوللىنداعى كورمەدە «قۇدىرەتتى جىردىڭ قۇنداعى» تاقىرىبى بويىنشا مۇقاعالي ماقاتاەۆتىڭ شىعارماشىلىعى بويىنشا جارىق كورگەن كىتاپحانا قورىنداعى كىتاپتار جانە اقىن ولەڭدەرىنىڭ جەلىسى نەگىزىندە تالانتتى سۋرەتشى الماس سىرعاباەۆتىڭ قالامىنان تۋعان سۋرەتتەر كورەرمەن نازارىنا ۇسىنىلدى. راۋان قايدار, «ەگەمەن قازاقستان».  استانا.