وتكەن اپتادا «نۇر وتان» پارتياسىنىڭ XVII سەزىندە «قازاقستان - 2021. بىرلىك. تۇراقتىلىق. جاسامپازدىق» جاڭا سايلاۋالدى باعدارلاماسى قابىلداندى. بۇل قۇجات بەس ينستيتۋتتىق رەفورمانى جۇزەگە اسىرۋ اياسىنداعى «100 ناقتى قادام» ۇلت جوسپارىنىڭ نەگىزگى باعىتتارى ەسكەرىلە وتىرىپ ازىرلەنگەن. قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا سەنات دەپۋتاتى, قازاقستان جازۋشىلار وداعىنىڭ توراعاسى نۇرلان ورازالين وسىعان وراي ءوز وي-پىكىرىمەن ءبولىستى.
«دۇنيە تىنىشسىز, وسى تىنىشسىز دۇنيەنىڭ كەڭىستىگىندە قازاق ەلىنىڭ تىنىشتىعىن ساقتاپ, ونىڭ تاۋەلسىزدىك مۇراتتارىن قورعاۋ – ءاربىر قازاقستاندىقتىڭ باستى پارىزى. «نۇر وتان» پارتياسىنىڭ XVII سەزىندە ەلباسىمىز وسى ماسەلەگە قاتتى نازار اۋداردى جانە بەس حالىقتىق رەفورمانىڭ جاي-جاپسارىن تاعى دا تەرەڭدەتىپ, جۇرتشىلىقتى جۇمىسپەن قامتاماسىز ەتۋ, سونداي-اق, سىرتتا جۇرگەن قارجىنى زاڭداستىرۋ سەكىلدى ءبىرتالاي ماسەلەلەردى تالداي وتىرىپ, جولداۋداعى حالىققا ارنالعان پارمەندى ۇسىنىستار اياسىن تاعى دا كەڭەيتتى. مىنە, وسىلايشا, ءوز ءسوزىن قازاقستاندىقتارعا وتە جەتىمدى تۇردە ارنادى. مەن باياندامانى تىڭداۋ بارىسىندا كوكىرەگىمە تۇيگەن ماسەلەگە توقتالعىم كەلەدى. جەمقورلىققا قارسى قازىر حالىقتى ەرەكشە تولعاندىرادى. مىنە, وسى ماسەلەگە ەلباسى جاقسى توقتالدى. سىرتتا ەسەپسىز جۇرگەن قارجىنى زاڭداستىرۋعا زور مۇمكىندىك بەرىلىپ وتىر. شەتەلدەردەگى شوتتاردا جاتقان اقشانى حالىقتىڭ مۇقتاجىنا, قاجەتىنە جاراتۋعا شاقىردى», – دەدى ن. ورازالين.
سونىمەن قاتار, ول پارتيا سەزىندە بەس ينستيتۋتتىق رەفورما قالاي اتقارىلاتىنى جەتە زەردەلەنگەنىن, وسىعان وراي, قازىرگى كەزەڭ ۇلكەن مىندەتتەر جۇكتەيتىنىن جەتكىزدى. «جاۋاپتى كەزەڭدە ءبىر اتانىڭ بالاسىنداي جۇمىلىپ, مۇددەمىزدى, تاۋەلسىزدىگىمىزدى ساقتاۋدىڭ, قورعاۋدىڭ جاڭا كەزەڭىنە ءوتىپ وتىرمىز», – دەدى ن.ورازالين. ءسوزىنىڭ قورىتىندىسىندا, سەناتور سايلاۋالدى باعدارلامادا بۇكىل الەمدى شارلاعان ەكونوميكالىق قيىندىقتاردان شىعۋدىڭ جولدارى قورسەتىلگەنىنە, ولار حالىققا جان-جاقتى تۇسىندىرىلگەنىنە توقتالا كەلە, پارلامەنت ماجىلىسىنە تاجىريبەلى, بىلىكتى ازاماتتار سايلانۋى قاجەتتىگىن اتاپ كورسەتتى.
ءلايلا ەدىلقىزى,
«ەگەمەن قازاقستان».