كەشە مادەنيەت جانە سپورت مينيسترلىگىندە كەڭەيتىلگەن القا وتىرىسى ءوتتى. پرەمەر-ءمينيستردىڭ ورىنباسارى داريعا نازارباەۆا, مينيسترلىك باسشىلىعى, كوميتەتتەر توراعالارى مەن دەپارتامەنتتەر ديرەكتورلارى, باق وكىلدەرى قاتىسقان جيىندا مەملەكەتتىك ورگاننىڭ 2015 جىلعى جۇمىسىنىڭ ناتيجەلەرى جانە 2016 جىلعا قويىلعان مىندەتتەر تالقىلاندى.
وتىرىستى اشا وتىرىپ, مينيستر ارىستانبەك مۇحامەدي ۇلى «100 ناقتى قادام» ۇلت جوسپارى ءمادەنيەت جانە سپورت سالاسىندا ستراتەگيالىق دامۋدىڭ ماگيسترالدىق جولدارىن انىقتاعاندىعىن ايتىپ ءوتتى.
«ينستيتۋتتىق رەفورمالاردى ىسكە اسىرۋ شەڭبەرىندە «بىرتەكتىلىك جانە بىرەگەيلىك» باعىتى بويىنشا حالىقارالىق تاجىريبەنى جانە ەىدۇ مەملەكەتتەرىنىڭ ستاندارتتارىن نەگىزگە الا وتىرىپ, 19 نورماتيۆتىك-قۇقىقتىق اكتىلەردى ءازىرلەۋ بويىنشا اۋقىمدى جۇمىس ءجۇرگىزىلدى, سونىڭ ىشىندە 18-ءى قازىرگى تاڭدا بەكىتىلدى», دەدى ا.مۇحامەدي ۇلى.
سونىمەن قاتار, مينيسترلىك ەكسپو-2017 حالىقارالىق كورمەسىن وتكىزۋ بارىسىندا ۇيىمداستىرىلاتىن مادەني شارالاردىڭ كەشەندى باعدارلاماسىن جاساپ بولعانىن دا تىلگە تيەك ەتتى. ۆەدومستۆو وپەرا جانە بالەت ونەرىندە, عىلىمي مەكەمەلەر, ۋنيۆەرسيتەتتەر, مۇراعات جانە كىتاپحانالار اراسىنداعى حالىقارالىق ىنتىماقتاستىق ماسەلەلەرىنە دە باسا نازار اۋدارىپ, وتكەن جىلعى جەتىستىكتەرىنە دە سوقپاي وتپەدى. دالىرەك ايتساق, يتاليالىق تاراپتىڭ شاقىرتۋى بويىنشا «استانا وپەرا» تەاترىنىڭ بالەت ترۋپپاسى ەۋروپانىڭ ەڭ ءىرى تەاترلارىنىڭ ءبىرى بولىپ سانالاتىن «كارلو فەليچە» تەاترىندا ونەر كورسەتكەنى, نورۆەگيالىق جانە نەمىس عالىمدارى بەرەل قورعانى, «تامعالى» جارتاسىنىڭ پەتروگليفتەرى سەكىلدى ارحەولوگيالىق ەسكەرتكىشتەردى زەرتتەۋ جوبالارىنا ءوز قىزىعۋشىلىقتارىن ءبىلدىرۋى ءبىز ءۇشىن ۇلكەن جەتىستىك.
القا وتىرىسىنىڭ العاشقى بولىمىندە جيىنعا قاتىسۋشىلار قازاق كينەماتوگرافيا سالاسىن دامىتۋ جانە ناسيحاتتاۋ ىسىندە بەلسەندى جۇمىس جۇرگىزىلىپ جاتقانىن دا نازاردان تىس قالدىرمادى. ۇلت جوسپارى اياسىندا 2015-2020 جىلدارعا ارنالعان بىرقاتار كينو جانە تەلەجوبالاردى جاساۋدىڭ بىرنەشە جوسپارى بەكىتىلدى. بۇل جوسپار ەلىمىزدىڭ باي مۇراسىن, قازىرگى زامان شىندىعىنىڭ ۇزدىك ۇلگىلەرىن, تاعىلىمدى تاريحي وقيعالارى مەن كورنەكتى تۇلعالاردى كينو ارقىلى ناسيحاتتاۋعا مۇمكىندىك بەرەتىنىن العا تارتتى.
سونىمەن بىرگە, بەس ينستيتۋتتىق رەفورمانىڭ ءتورتىنشى باعىتىن جۇزەگە اسىرۋ ماقساتىندا مينيسترلىك قازاقستان رەسپۋبليكاسىندا دەنەشىنىقتىرۋ جانە سپورتتى دامىتۋدىڭ 2025 جىلعا دەيىنگى تۇجىرىمداماسىن جاساپ بولعانىن اتاپ ءوتتى. ونىڭ نەگىزگى ماقساتى – ەلدىڭ سپورتتىق ءومىرىن بەلسەندى ەتۋ بولىپ تابىلادى. جوبانىڭ جاڭاشىلدىعى – ايماقتىق سپورتتىق قاۋىمداستىقتاردى قولداپ, سپورتتى ەكونوميكا سالاسىنىڭ بولىگى رەتىندە دامىتۋ بولىپ تابىلادى.
باسقوسۋ بارىسىندا 2016 جىلعى ريو-دە-جانەيروداعى (برازيليا) حححI جازعى وليمپيا ويىندارىنا ەل سپورتشىلارىنىڭ قانشالىقتى دايىن ەكەندىكتەرى دە قوزعالدى. بۇگىنگى تاڭدا ۇلتتىق قۇرامامىز تورتجىلدىقتىڭ باستى جارىسىنا قاتىسۋ ءۇشىن 11 سپورت تۇرىنەن 45 جولداماعا قول جەتكىزگەنىن ماقتانىشپەن ايتامىز. سونداي-اق, مينيسترلىك قىزمەتىنىڭ باستى باعىتتارىنا تىلدەردى دامىتۋ جانە ەلدىڭ قوعامدىق ساياسي ومىرىندەگى جۇمىستار جاتاتىنى بەلگىلى. اتالمىش سالا اياسىندا «قازاقستان حالقى اسسامبلەياسى تۋرالى» زاڭ جانە «قازاقستان حالقى اسسامبلەياسىنىڭ دامۋ تۇجىرىمداماسى» قابىلدانىپ, ازاماتتىق قوعام ينستيتۋتتارىنىڭ ءرولىن ىلگەرىلەتۋ مەن ۇكىمەتتىك ەمەس ۇيىمدار اراسىنداعى جۇمىستا حالىقارالىق تاجىريبە ەنگىزۋ ماقساتىندا «ۇەۇ قىزمەتى ماسەلەلەرى بويىنشا كەيبىر زاڭنامالىق اكتىلەرگە وزگەرتۋلەر مەن تولىقتىرۋلار ەنگىزۋ تۋرالى» زاڭ بەكىتىلگەنى دە قامتىلدى.
وتىرىس سوڭىندا ۆەدومستۆونىڭ 2016 جىلعى جۇمىس باعىتتارى انىقتالىپ, مينيسترلىكتىڭ قۇرىلىمدىق بولىمشەلەرى جانە ۆەدومستۆولىق باعىنىستى ۇيىمدارىنىڭ باسشىلارىنا پرەمەر-ءمينيستردىڭ ورىنباسارى داريعا نازارباەۆا بىرقاتار ناقتى تاپسىرمالار بەردى.
راۋان قايدار,
«ەگەمەن قازاقستان».