جامبىل وبلىسىنىڭ سپورتشىلارى بىلتىر وسىنشا جۇلدە الدى
بۇقارالىق سپورتتى دامىتۋدىڭ ەڭ نەگىزگى جولدارىنىڭ ءبىرى جوعارعى سپورتتىق جەتىستىكتەردى ناسيحاتتاۋ ەكەنى انىق. وتكەن جىلى جامبىل وبلىسىنىڭ سپورتشىلارى الەمدىك جانە حالىقارالىق بايراقتى باسەكەلەردە 1128 مەدالعا يە بولدى. ونىڭ ىشىندە الەم, ازيا چەمپيوناتتارى مەن كۋبوكتارىندا – 111 مەدال, حالىقارالىق تۋرنيرلەردە – 194 مەدال, قازاقستان رەسپۋبليكاسىنىڭ چەمپيوناتتارىندا 823 مەدال يەلەنىپ, جىلدى وتە تابىستى اياقتادى. ءيا, كەزىندە تالاي مىقتىنى مويىنداعان جامبىلدىق ۇلاندار قازىر ەندى سولارعا وزدەرىن مويىنداتىپ ءجۇر.
– وتكەن جىلعى جۇمىستارىمىزدىڭ ەڭ باستى باعىتتارىنىڭ ءبىرى, ەل ەرتەڭى جاستارىمىزدىڭ جان-جاقتى ءبىلىمدى, رۋحاني باي, ۇلتتىق سالت-داستۇرلەرىمىزگە ادالدىعىن بويىنا سىڭىرۋگە ارنالدى, – دەيدى بۇل جونىندە جامبىل وبلىستىق سپورت جانە دەنەشىنىقتىرۋ باسقارماسىنىڭ باسشىسى گاملەت قايناربەكوۆ. – ءوتكەن جىلى وڭىردە دەنەشىنىقتىرۋ جانە سپورتپەن جۇيەلى تۇردە شۇعىلدانۋشىلار قاتارى 25,5 پايىزعا كوتەرىلىپ, 282,3 مىڭ ادامعا جەتتى. بۇل – 2014 جىلمەن سالىستىرعاندا, 2,2 پايىزعا نەمەسە 26,8 مىڭ ادامعا وسكەن دەگەن ءسوز. سونىڭ ىشىندە 30,2 پايىزى نەمەسە 60,0 مىڭ ادام مەكتەپ جاسىنداعى بالالار.
ءيا, وڭىردە ەل ەرتەڭى جاستاردىڭ سپورتپەن اينالىسۋىنا مول مۇمكىندىكتەر جاسالۋدا. جالپى, سپورتتىڭ بۇقارالىق ماڭىزىن ارتتىرۋ ماسەلەسىن – سپورتتىق بازالاردىڭ قولجەتىمدىلىگىنەن بولە قاراۋعا بولمايدى. ويتكەنى, سپورت نىساندارى – بۇقارالىق سپورتتى دامىتۋدىڭ كەپىلى. سوڭعى جىلدارى وبلىستا سپورت نىساندارىنىڭ قولجەتىمدىلىگى ۇلكەن قارقىنمەن ءوسىپ كەلەدى.
وتكەن جىلدىڭ وزىندە مويىنقۇم, جۋالى اۋداندارىندا سپورت زال كەشەنى, تاراز قالاسىندا №3 وليمپيادا جەتكىنشەكتەرىن دايارلايتىن سپورت مەكتەبىنە ارنالعان دەنەشىنىقتىرۋ-ساۋىقتىرۋ كەشەنى پايدالانۋعا بەرىلدى. سونىمەن قاتار, تاراز قالاسىندا شاعىن فۋتبول, باسكەتبول جانە ۆولەيبول ويىندارىنا ارنالعان, جاساندى توسەنىشپەن قورشالعان – 3, قاراتاۋ قالاسىندا 2 سپورت الاڭشاسى قاتارعا قوسىلدى. «قازفوسفات» جشس سپورت كەشەنىن اشتى, وندا بۇگىندە 600 جۇمىسشى مەن 150-گە جۋىق ءجاسوسپىرىم سپورتپەن تۇراقتى شۇعىلدانۋدا. جالپى العاندا, وتكەن جىلى وبلىستىڭ سپورت سالاسىنىڭ دامۋىنا 6,35 ملرد. تەڭگە ءبولىندى. بۇل سالانى قارجىلاندىرۋ 2014 جىلمەن سالىستىرعاندا, 12,0 پايىزعا ارتقان.
ورالحان ءداۋىت,
«ەگەمەن قازاقستان».
جامبىل وبلىسى.