مەملەكەت باسشىسى نۇرسۇلتان نازارباەۆتىڭ 5 ينستيتۋتتىق رەفورمانى جۇزەگە اسىرۋعا نەگىزدەلگەن «100 ناقتى قادام» – ۇلت جوسپارى قازاقستاندىقتاردى عانا ەمەس, الەم جۇرتشىلىعىن دا قىزىقتىرىپ وتىر. ونى ۇزاق مەرزىمگە ارنالعان ۇلى جوسپار دەپ اتاۋىمىزعا ابدەن بولادى. سەبەبى, ۇلت جوسپارى ەلىمىزدىڭ حالىقارالىق ارەناداعى بەدەلىنىڭ ارتۋىنا, ەكونوميكامىزدىڭ قارقىندى دامۋىنا, حالقىمىزدىڭ ءال-اۋقاتىنىڭ ارتۋىنا جول اشاتىن بىرەگەي باعدارلاما بولىپ تابىلادى.
كەزەڭ-كەزەڭىمەن جۇزەگە اسىرىلاتىن ۇلت جوسپارى بارلىق سالانى قامتيدى. ءارى ول بۇكىل قازاقستاندىقتاردىڭ جۇمىلا كىرىسەتىن, جاۋاپكەرشىلىكتى قاجەت ەتەتىن ءىسى سانالادى. بارلىق مەملەكەتتىك ورگانداردان, قوعامدىق ينستيتۋتتار مەن وزگە دە مەكەمە-ۇيىمداردان ءىس-قيمىل ۇيلەسىمدىلىگىن, تاباندىلىق پەن قاجىرلىلىقتى تالاپ ەتەدى. مۇنداي اسىل قاسيەتتەر ءبىزدىڭ بويىمىزدا بار. ونى «قازاقستان-2050» ستراتەگياسىن مەرزىمىنەن بۇرىن ويداعىداي ورىنداپ, ەندى الدىمىزعا ەكونوميكاسى دامىعان, الەۋەتى ەسەلەپ ارتقان, حالقى باقۋاتتى 30 ەلدىڭ قاتارىنا قوسىلۋ مىسالىنان كورۋگە بولادى.
تاۋەلسىزدىگىمىزدىڭ 25 جىلدىق مەرەيتويى كەڭىنەن اتاپ وتىلەتىن وسى جىلدىڭ باسىندا ەلباسىمىز «ۇلت جوسپارى – قازاقستاندىق ارمانعا باستايتىن جول» اتتى باعدارلامالىق ماقالاسىن جاريالادى. سول ماقالامەن جان-جاقتى تانىسقان, ۇلكەن اسەر العان مىڭداعان ۇستاز-پەداگوگتاردىڭ ءبىرى رەتىندە ايتارىم, پرەزيدەنتىمىز ءوزىنىڭ ماقالاسىندا ۇلت ارمانى قالاي ءورىلىپ, رۋحى بيىك قازاقتىڭ بۇگىنگى كۇنى وزگەلەرمەن تەرەزەسى تەڭەلىپ, ايبىنى اسقاقتاپ تۇرۋى ءۇشىن نە نارسەگە ۇمتىلۋ قاجەتتىگىن كورسەتىپ بەردى. سونىمەن قاتار, مەملەكەت تاعدىرىنا وڭ اسەرىن تيگىزەتىن كەلەلى دە كەشەندى ىستەردى قالاي باستاۋ كەرەكتىگىن باعدارلاپ بەردى.
ءبىز دانا دا دارقان, باتىل دا باتىر, ءبىلىمدى دە ەڭبەكقور حالىقتىڭ پەرزەنتىمىز. جەرىمىز باي, ەلىمىزدە تۇراقتىلىق پەن كەلىسىم جاراسىم تاپقان. ال ەلباسىمىز بۇگىنگى جانە ەرتەڭگى ۇرپاق الدىنا جاڭا تەحنولوگيالاردى مەڭگەرىپ, ەلىمىزدە بۇعان دەيىن بولماعان جاڭا ءوندىرىس ورىندارىن اشۋ ارقىلى الەمدىك قوعامداستىققا تانىلىپ, حالىقارالىق ارەنادا ويىپ تۇرىپ ورىن الۋعا ۇندەپ وتىر. وسى ارمانداردىڭ ورىندالۋىنا بۇكىل قازاقستاندىقتاردىڭ اتسالىسۋىن قالاپ وتىر جانە شاقىرىپ وتىر.
مىنە, ءبىز وسى اسىل ارماندارىمىزدىڭ جۇزەگە اساتىنىنا سەنەمىز, جۇزەگە اسىرۋعا ءبىر كىسىدەي ۇيىمشىلدىقپەن اتسالىسامىز. وسى ۇلى ماقساتتارعا تەرەڭ ءبىلىم, جوعارى كاسىبي شەبەرلىك جانە ەڭبەكقورلىق جەتكىزەدى.
كۇنىمحان دۇيسەنوۆا,
№51 مەكتەپ-گيمنازيانىڭ ديرەكتورى.
استانا.