استانا. 27 قاڭتار. بيىل وتەتىن ريو-دە-جانەيرو وليمپياداسىندا چەمپيون اتانعان جانە جۇلدەگە ىلىككەن وتاندىق سپورتشىلاردىڭ سىياقىسى وسىدان ءتورت جىل بۇرىنعى لوندون ويىندارىنداعى سومامەن بىردەي بولادى. اتاپ ايتقاندا, ۇكىمەتتىڭ 2014 جىلدىڭ 19 جەلتوقسانىنداعى №1345 قاۋلىسىنا ساي التىن مەدال العان سپورتشىلارعا مەملەكەت تاراپىنان 250 مىڭ اقش دوللارى بەرىلەدى. سونداي-اق, كۇمىس مەدال ءۇشىن – 150 مىڭ, ال قولا جۇلدەگە 75 مىڭ دوللاردان تاعايىندالعان. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
سونىمەن قاتار, ۇزدىك التىلىققا ەنگەن سپورتشىلار دا سىياقىدان قۇر قالمايدى. ياعني, 4-ورىنعا – 30 مىڭ, 5-ورىنعا – 10 مىڭ جانە 6-ورىنعا 5 مىڭ دوللاردان بەرىلەدى. ودان بولەك, سپورتشىلاردىڭ جەكە جاتتىقتىرۋشىلارىنا دا وسىنداي كولەمدە سىياقى قاراستىرىلعان.
بارلىق سىياقى دوللاردىڭ قازىرگى باعامى بويىنشا تەڭگەمەن بەرىلەدى. بۇل بيىلعى وليمپياداعا قاتىسۋشىلار سىياقىنى ءتورت جىل بۇرىنعى دودادا توپ جارعان سپورتشىلاردان ەكى جارىم ەسەگە كوپ الادى دەگەن ءسوز.
ءدال بۇگىن, ياعني 27 قاڭتار كۇنگى ۇلتتىق بانكتەگى ءبىر دوللاردىڭ تەڭگەگە شاققانداعى باعاسى 380-گە تەڭ. سوعان وراي, بيىل چەمپيون اتانعان ساڭلاق 95 ميلليون تەڭگەنى قالتاسىنا باسادى. ال لوندون وليمپياداسى وتكەن 2012 جىلدىڭ تامىز ايىندا ءبىر دوللاردىڭ باعاسى 149 تەڭگە بولىپ, «التىن» العاندارعا 37 ميلليون 250 مىڭ تەڭگەدەن بەرىلگەن ەدى.
ەلامان قوڭىر.
دەرەك: مادەنيەت جانە سپورت مينيسترلىگىنىڭ ءباسپاسوز قىزمەتى.
سۋرەت: dreamstime.com.