الماتى. 25 قاڭتار. مەگاپوليس قالانىڭ مادەني ومىرىندەگى اپتانىڭ العاشقى كۇنى ەرەكشە باستالدى. دۇيسەنبى كۇنى تانىمال قالامگەر تۇرسىنجان شاپايدىڭ «كۇلكى جانە كوز جاسى» كىتابىنىڭ تۇساۋكەسەرى ءوتىپ, وعان شاھارداعى ادەبيەتتانۋشىلار مەن بەلگىلى پۋبليتسيستەر, باق جەتەكشىلەرى مەن قالامى جۇيرىك جۋرناليستەر قاتىستى. جيىننان بەلگىلى عالىمدار دا تابىلدى. بۇل تۋرالى egemen.kz ءتىلشىسى حابارلادى.
كوپتەن كۇتكەن كىتاپتىڭ تۇساۋكەسەر ءراسىمىن «ەل» پروديۋسەرلىك ورتالىعىنىڭ ديرەكتورى عالىم دوسكەن جانە «قازاق ادەبيەتى» گازەتىنىڭ باس رەداكتورى جۇماباي شاشتاي ۇلى جاساپ, جازۋ ونەرىنە قاتىستى ويلارىن ورتاعا سالدى.
رۋحاني باسقوسۋ تۇرعىسىندا وتكەن كىتاپتىڭ تۇساۋكەسەرىندە تۇرسىنجان شاپايدىڭ سوزىنە جازىلعان اندەر ورىندالىپ, ادەبي كەيىپكەرلەرى ءسوز الدى. رامازان ستامعازيەۆ, بەكجان تۇرىس, ۇلتۋ قاباەۆا سىندى ونەردىڭ بەل بالالارى شىعارماشىلىق باس قوسۋدىڭ سالماعىن ارتتىردى. تانىمال اكتەر اسقار نايمانتاەۆ جازۋشىنىڭ شىعارماسىنان «قازاقپەن ساۋدالاسۋ» ءۇزىندىسىن وقىدى.
اتالمىش كىتاپ «اقجۇنىس» باسپاسىنان شىققان تۇڭعىش كىتاپ ەكەنىن ايتا كەتۋ ءلازىم. وسىناۋ جوباعا مۇرىندىق بولعان «اقجۇنىس-استانا» جۋرنالىنىڭ باس رەداكتورى ساۋلە ابەدينوۆا «كۇلكى جانە كوز جاسى» كىتابى 2 مىڭ دانامەن جارىق كورگەنىن, سۇرانىس وسكەن سايىن تارالىمى دا وسە بەرەتىندىگىن ايتتى.
«كۇلكى جانە كوز جاسى», «جازۋ», «ءبىر مىسقال», «... جانە ءبىر ەسسە» اتتى ءتورت تاراۋدان تۇراتىن كىتاپ قازىردىڭ وزىندە ەرەكشە وي ورالىمدارىمەن, ءتىلىنىڭ شۇرايلىلىعى, ءسوزىنىڭ سالماقتىلىعى, ماسەلەلەرىنىڭ كوكەيكەستىلىگىمەن وقىرماندارىن ەلەڭدەتىپ وتىر.
ايناش ەسالي.
دەرەك, سۋرەت: egemen.kz.