وسكەمەن. 25 قاڭتار. شىعىس قازاقستان وبلىسى اكىمدىگىنىڭ باستاماسىمەن وسكەمەندە رەجيسسەر دوسحان جولجاقسىنوۆتىڭ «قۇنانباي» كوركەم ءفيلمى كورسەتىلدى. بۇل تۋرالى egemen.kz ءتىلشىسى حابارلادى.
اتالعان فيلم «قازاقفيلم» كينوستۋدياسى مەن وبلىس اكىمدىگىنىڭ قولداۋىمەن 2014 جىلى اباي اۋدانىندا تۇسىرىلگەن بولاتىن. سوندىقتان وتكەن جىلى كينوكارتينانىڭ ەلىمىزدەگى تۇڭعىش تۇساۋكەسەرى اباي اۋدانىنىڭ ورتالىعى قاراۋىل اۋىلى مەن سەمەي قالاسىندا ۇيىمداستىرىلدى. بۇل جولى وبلىس اكىمىنىڭ ورىنباسارى جاقسىلىق وماردىڭ ۇيىتقى بولۋىمەن وسكەمەندىك كورەرمەننىڭ نازارىنا ۇسىنىلدى. «يۋبيلەينىي» كينوتەاترىندا وتكەن كورسەتىلىمگە كورەرمەندەردىڭ كوپ جينالعانى سونشالىق, ولاردىڭ بىرقاتارىنا ورىن جەتپەي, ەدەنگە وتىرىپ كوردى. تۇساۋكەسەرگە فيلم رەجيسسەرى ءارى باستى رولدە ويناعان اكتەر دوسحان جولجاقسىنوۆ تا قاتىستى.
ءفيلمنىڭ العاشقى تۇساۋكەسەرىن ەل وقىرماندارىنا «ەگەمەن قازاقستان» گازەتى جەتكىزگەن بولاتىن. سەمەي قالاسىنداعى كورسەتىلىمىنەن كەيىن «ەكراندا – قۇنانباي» اتتى ماقالا ەرتەڭگىلىك گازەتكە جاريالاندى. سوندىقتان, فيلم جونىندە ەمەس, فيلمگە دەگەن كورەرمەن ىقىلاسى جونىندە اڭگىمەلەيىك. كينوكارتينا شىعىسقازاقستاندىقتاردىڭ كوڭىلىنەن شىقتى. فيلم اياقتالعاندا زالدا جانعان جارىقتان كوپشىلىكتىڭ بۇلاۋداي بولعان كوزدەرىن ءسۇرتىپ وتىرعانىن كورىپ, تىڭ تۋىندىنىڭ وتە اسەرلى بولعاندىعىن بايقادىق.
«دوسحان اعامىزعا شىعىسقازاقستاندىقتاردىڭ اتىنان كوپ راحمەت ايتامىز. بۇگىنگى فيلم, ءبىر سوزبەن ايتقاندا, تاريحي اقيقاتتىڭ جەڭىسى! قۇنانباي بابامىزدىڭ كەسىمدى ءسوزى ىسپەتتى اقيقات پەن ادىلدىكتىڭ دە شىعار بيىگى ءاردايىم جوعارى بولسىن!», – دەدى ءفيلمدى تاماشالاۋعا ارنايى كەلگەن وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ.
«دوسحانداي تالانتتى باۋىرىمدى قازاققا سىيلاعان اللاعا, اتا-اناسىنا راحمەت! بۇل كينو كوپتى كورگەنىمەن باسقاشا وقىپ, زەردەلەگەن ءبىزدىڭ مۇقىم قازاقتىڭ, التى الاشتىڭ تاريحىن جەتىك بىلە بەرمەيتىنىمىزدى كورسەتتى. «ءبىرجان سال» ءفيلمىن دە تۋعان جەرىنە الىپ كەلىپ كورسەتكەندە, قاتىسقان ەدىم. قۇنانباي بابامىز تۋرالى كينودان ناعىز قازاقتىڭ جۇرەك ءلۇپىلىن كوردىك. وسىنداي تۋىندىلار كوبەيە بەرسىن!», – دەدى وسكەمەن قالاسى اقساقالدار كەڭەسىنىڭ توراعاسى سايلاۋحان اۋحاديەۆ.
ءوزىن «اباي اۋدانىنىڭ تۋماسىمىن» دەپ تانىستىرعان كورەرمەندەردىڭ ءبىرى ءفيلمدى كورىپ وتىرىپ, تۋعان جەرىنە بارىپ كەلگەندەي اسەر العانىن, شىنايى قويىلعان كارتينادا وبرازداردىڭ اشىلۋى, اسىرەسە, زەرە انانىڭ بولمىسى كوزگە جاس الارلىقتاي كەسەك سومدالعانىن ايرىقشا اتاپ ءوتتى.
«الاشتىڭ تاۋ تۇلعالارىنىڭ ءبىرى, قارا قىلدى قاق جارىپ, ادىلدىكتىڭ ءسوزىن سويلەگەن قۇنانباي اتامىز تۋرالى حالىق اراسىندا تەرىس كوزقاراس, قاساڭ اڭگىمەلەر بولعانى بەلگىلى. الايدا, تاۋەلسىزدىگىمىزبەن بىرگە بۇل تۇسىنىك تە وزگەرىپ, قۇنانباي اتامىزدىڭ العىر, شەشەن, حالىقشىل, ەلشىل بولعاندىعى كوركەم فيلمنەن ءمالىم بولدى. ءبىز وسى جولمەن جۇرسەك اداسپايمىز. بۇگىن ەلباسى ايتقان «ماڭگىلىك ەل» يدەياسىن جۇزەگە اسىرۋ جولىنداعى جاڭا مانگە يە ءفيلمنىڭ تۇسىرىلگەنىن كورىپ, قۋاندىق», – دەگەن سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ ستۋدەنتى بەرىك كادىر ۇلى اتالعان ۋنيۆەرسيتەتتەن ءفيلمدى تاماشالاۋعا 20-دان استام ستۋدەنتتەر كەلگەنىن, كارتينا جاستاردىڭ جۇرەگىنە جول تاپقانىن جەتكىزدى.
«ونەر ادامى ىشتەن شىققان شۇبار جىلانىن الدارىڭىزعا پاش ەتكەن كەزدە شىنىمەن كوكىرەكتەرىڭىزگە جەتىپ جاتسا, ارينە, راحمەت! مۇندا بۇگىنگىمەن ساباقتاسقان تالاي استارلار جاتىر, ونسىز ونەر بولمايدى», – دەدى دوسحان جولجاقسىنوۆ. رەجيسسەر ءفيلمنىڭ الداعى ۋاقىتتا تەلەارنالاردا كورسەتىلەتىنىن جەتكىزدى. كورسەتىلىم سوڭى كورەرمەندەر مەن كينورەجيسسەر اراسىنداعى ەركىن سۇحباتقا, رياسىز تىلەككە ۇلاستى.
دۋمان اناش.
دەرەك: egemen.kz.
سۋرەت: ەلجان قايىرحانوۆ.