اتىراۋدا ءبىر وتباسىنىڭ قۇجاتسىز, باسپاناسىز قالعانى, قازىرگى ۋاقىتتا جىلۋسىز ۋاقىتشا سارايدا تۇرىپ جاتقانى انىقتالدى. وسىعان وراي اتىراۋ قالاسىنىڭ اكىمدىگى تومەندە انىقتالعان جايتتار تۋرالى رەسمي ءمالىمدەمە تاراتتى. شىندىعىندا, 1962 جىلى تۋعان ن.ورلوۆ پەن 1974 جىلعى ە.پريدانوۆانىڭ ازاماتتىق نەكەدەن ءۇش بالاسى بار ەكەن. بالالارى 2011, 2013 جانە 2015 جىلى ومىرگە كەلگەن. وتباسى مۇشەلەرىنىڭ بارلىعىنىڭ دا جەكە باسىن كۋالاندىراتىن قۇجاتتارى جوق ەكەنى انىقتالىپ وتىر. قالا ىرگەسىندەگى شارۋا قوجالىعىندا ۇسىنعان باسپاناسى ورتەنىپ كەتىپتى.
وسى جايتتاردى انىقتاعان اكىمدىك جانىنان قۇرىلعان ارنايى كوميسسيا شەشىمىمەن ن.ورلوۆ تۇرعىلىقتى مەكەن-جايى انىقتالماعان تۇلعالاردى بەيىمدەۋ ورتالىعىنا, ال ە.پريدانوۆا ءۇش بالاسىمەن بىرگە ايەلدەرگە ارنالعان داعدارىس ورتالىعىنا ورنالاستىرىلدى. ەندى قالالىق اكىمدىكتىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ ماماندارى احاج قىزمەتكەرلەرىمەن بىرگە جەكە باسىن كۋالاندىراتىن قۇجاتتارىن قالپىنا كەلتىرۋگە جانە ن.ورلوۆتى جۇمىسقا ورنالاستىرۋعا كومەگىن بەرمەك. سونىمەن بىرگە, 1 جاسقا دەيىنگى بالا كۇتىمىنە بايلانىستى جانە بالالار جاردەماقىسىن رەسىمدەۋگە دە كومەك بەرىلەدى. كوميسسيا مۇشەلەرى ن.ورلوۆ پەن ە.پريدانوۆانىڭ جەكە يەلىگىندە تۇرعىن ءۇيىنىڭ بار-جوعىن انىقتاۋعا دا كىرىستى. ولاردىڭ اتتارىندا تۇرعىن ءۇي تىركەلمەگەن بولسا, ولاردى باسپانا الۋ كەزەگىنە قويۋ ءۇشىن قۇجاتتارى جيناقتالماق.
مىنا دەرەك تە جۇرتتى تاڭداندىرىپ وتىر. ازاماتتىق نەكەدەگى جارىنان ءۇش بالا تاپقان ە.پريدانوۆا ءىز-ءتۇزسىز جوعالعاندار تىزىمىندە بولىپ شىقتى. وعان تۋىستارى ىزدەۋ سالىپ, ءتىپتى, مۇردەسىن تانىعان سىڭاي تانىتىپتى. ومىردە ۇقساس جاندار از دەيسىز بە, بالكىم, تۋىستارى ونى ءالدەبىرەۋمەن شاتىستىرعان بولار. قالاي دەگەندە دە, قازىر باسپانادان دا, قۇجاتتان دا جۇرداي وتباسى اتىراۋ قالالىق اكىمدىگىنىڭ باقىلاۋىنا الىندى.
جولداسبەك شوپەعۇل,
«ەگەمەن قازاقستان».
اتىراۋ.