بۇگىنگى تاڭدا ەلىمىزدىڭ قۇقىق قورعاۋ ورگاندارى جاڭا تالاپتار نەگىزىندە جاڭا باعىتتا جۇمىس ىستەۋدە. ەلباسىنىڭ قۇقىق قورعاۋ ورگاندارى الدىنا قويىپ وتىرعان سىندارلى مىندەتتەرىنە ساي اتقارىلىپ جاتقان جۇمىستاردىڭ ناتيجەسى دە ايتارلىقتاي ەكەندىگى كورىنىپ وتىر. سونىڭ ءبىرى رەتىندە كەشە ىشكى ىستەر مينيسترلىگىنىڭ ءوتكەن جىلعى جۇمىسىن قورىتىندىلاپ, الدا تۇرعان مىندەتتەردى سارالاعان كەڭەيتىلگەن القا ءماجىلىسىندە پرەزيدەنت نۇرسۇلتان نازارباەۆتىڭ «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى ەل حالقىنا جولداۋىنداعى تالاپتارى اياسىندا العا قويىلعان ماڭىزدى مىندەتتەر تالقىلاندى. القا ءماجىلىسىنە ىشكى ىستەر ءمينيسترى ق.قاسىموۆ توراعالىق ەتتى.
ونىڭ جۇمىسىنا پرەزيدەنت كومەكشىسى – قاۋىپسىزدىك كەڭەسىنىڭ حاتشىسى ن.ەرمەكباەۆ, پرەزيدەنت اكىمشىلىگى باسشىسىنىڭ ورىنباسارى ق.اقساقالوۆ, باس پروكۋرور ا.داۋىلباەۆ جانە مينيسترلىكتىڭ ورتالىق اپپاراتىنىڭ, كوميتەتتەرىنىڭ, وڭىرلىك ىشكى ىستەر, قىلمىستىق-اتقارۋ جۇيەسى, توتەنشە جاعدايلار دەپارتامەنتتەرىنىڭ باسشىلىق قۇرامى, ۇلتتىق ۇلاننىڭ وڭىرلىك قولباسشىلارى جانە ۆەدومستۆولىق وقۋ ورىندارىنىڭ باستىقتارى قاتىستى.
سونىمەن قاتار, اتاپ ايتارلىق جايت, ءىىم القا ءماجىلىسىنىڭ جۇمىسىنا العاش رەت وبلىس اكىمدەرىنىڭ ورىنباسارلارى, سونداي-اق, مەملەكەت باسشىنىڭ «بەس ينستيتۋت-
تىق رەفورماسى بويىنشا 100 ناقتى قادام» – ۇلت جوسپارىندا بەرىلگەن تاپسىرمالارىن ىسكە اسىرۋ شەڭبەرىندە قۇرىلعان جەرگىلىكتى پوليتسيا قىزمەتىنىڭ وبلىس, قالا جانە اۋدان دەڭگەيىندەگى باسشىلارى دا قاتىستى.
مينيستر قالمۇحانبەت قاسىموۆ وتكەن جىل قازاقستاننىڭ ىشكى ىستەر ورگاندارى ءۇشىن جاۋاپتى كەزەڭ بولعانىن ايتا كەلە قىلمىستىق سوت ءوندىرىسىنىڭ جاڭا مودەلىنىڭ ىسكە اسىرىلۋىنا وراي ۇيىمداستىرۋ جۇمىسىنا ەلەۋلى وزگەرىستەر ەنگىزۋ, قىلمىستاردى اشۋ جانە تەرگەۋدىڭ جاڭا تەتىكتەرىن ازىرلەۋ قاجەتتىلىگى تۋىنداعانىن ءسوز ەتتى. سونىمەن بىرگە, جاڭا قىلمىستىق جانە قىلمىستىق-پروتسەسسۋالدىق زاڭناماسىن پايدالانۋدىڭ ءبىر جىلدىق تاجىريبەسى ونىڭ جەكەلەگەن زاڭنامالىق بولىمدەرىن قايتا قاراۋ قاجەتتىگىن, سوندىقتان وسى ماسەلەلەردى باس پروكۋراتۋرامەن, وزگە دە قۇقىق قورعاۋ ورگاندارىمەن بىرلەسە قاراپ, قولدانىستاعى زاڭناماعا قاجەتتى وزگەرىستەر ەنگىزۋ كەرەك ەكەنىن باسا ايتتى.
القا وتىرىسىندا بەس ينستيتۋتتىق رەفورمانى ىسكە اسىرۋ بويىنشا ەلباسىنىڭ تاپسىرمالارىنا سايكەس جىل باسىنان بەرى جۇمىسىن باستاعان جەرگىلىكتى پوليتسيا قادامىنا ۇلكەن ءمان بەرىلدى. ىشكى ىستەر ءمينيسترى جاڭا قىزمەتتىڭ قۇقىق قورعاۋ ورگاندارىن حالىققا جاقىن ەتە تۇسەتىنىن, ىشكى ىستەر ورگاندارىنا دەگەن حالىقتىڭ سەنىمىن ارتتىرۋعا ىقپال ەتەتىنىن ايتتى.
مينيستر اعىمداعى جىلى ىشكى ىستەر ورگاندارىنا جانە ءبولىنىستەرىنە پرەزيدەنت ن.نازارباەۆتىڭ «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى قازاقستان حالقىنا جولداۋىندا بەلگىلەنگەن اۋقىمدى مىندەتتەردى ىسكە اسىرۋ ءۇشىن قاجەتتى جاعداي تۋعىزۋ كەرەك دەپ تاپسىردى. ونىڭ ىشىندە قىزمەتتەر مەن بولىنىستەردىڭ جەدەل-قىزمەتتىك جۇمىس كورسەتكىشتەرىن تومەندەتپەي, قىلمىس تۋرالى بارلىق ارىزدار مەن حابارلامالارعا جەدەل ارەكەت ەتۋدى قامتاماسىز ەتە وتىرىپ, قىلمىستىق سوت ءوندىرىسىنىڭ جاڭا مودەلىن ىسكە اسىرۋدى جالعاستىرۋ قاجەتتىلىگىنە توقتالدى.
مەملەكەت باسشىسىنىڭ تاپسىرمالارى شەڭبەرىندە قىلمىستىق-اتقارۋ جۇيەسىن جاڭعىرتۋ, ونىڭ ىشىندە ەڭبەكپەن قامتۋدى ودان ءارى جالعاستىرۋ جانە پروباتسيا قىزمەتىن دامىتۋ شارالارى قامتىلدى. سونىمەن قاتار, ازاماتتىق قورعانىس بولىنىستەرىنىڭ قىزمەتىن جەتىلدىرۋ, ونىڭ قاتارىندا تابيعي جانە تەحنوگەندىك سيپاتتاعى توتەنشە جاعدايلار قاۋپىنىڭ تۋىنداۋىنىڭ الدىن الۋ, ولاردىڭ سالدارىن جويۋ ماسەلەلەرى قارالدى.
ءىىم القا وتىرىسىنىڭ قورىتىندىسىندا مينيسترلىكتىڭ ورتالىق اپپاراتى قىزمەتتەرىنىڭ جانە وڭىرلىك دەپارتامەنتتەرىنىڭ باسشىلارىنا تاعى دا باسقا قارالعان ماسەلەلەر بويىنشا ناقتى تاپسىرمالار بەرىلدى. ويتكەنى, سىن ساعاتتاعى سىندارلى جۇمىس قاشاندا شىڭعا شىعارا الاتىنى انىق.
الەكساندر تاسبولاتوۆ,
«ەگەمەن قازاقستان».