وسىدان 50-60 جىل بۇرىن ادامزاتتىڭ بۇگىنگى مۇمكىندىگى «ءۇش ۇيىقتاسا تۇسكە كىرمەيتىن» دۇنيەلەر بولعانى راس. ال قازىرگى تاڭدا عارىشتى يگەرگەن ادام ودان دا زور عىلىمي جاڭالىقتارعا يەك ارتۋدا. ماسەلەن, وسى اپتانىڭ سەيسەنبىسىندە اقش-تىڭ چيكاگو قالاسىندا جۇمىس ىستەيتىن يتاليالىق نەيروحيرۋرگ سەردجيو كاناۆەرو مەن ونىڭ قىتايلىق ارىپتەسى جەن سياوتين وسى سالاداعى سەنساتسيالىق جاڭالىقتى جاريالادى. ولاردىڭ ايتۋىنشا, بۇگىندە حيرۋرگتەر ادامنىڭ باسىن اۋىستىراتىن وتالاردى جاساۋعا دايىن ەكەن.
بۇل جونىندە دارىگەر كاناۆەرو: «ءبىزدىڭ جاڭالىعىمىز نەگىزسىز ەمەس. وسى كەزگە دەيىن ءارتۇرلى جان-جانۋارعا ءتاجىريبەلەر جۇرگىزىپ, وڭ ناتيجەگە قول جەتكىزدىك. وسىمەن تاجىريبە كەزەڭىن اياقتايمىز. ەندى مۇنداي وتالاردى ادامعا جاساۋعا دايىنبىز. وسى رەتتە اتالعان وتاعا ءزارۋ رەسەيلىك ناۋقاس ۆالەري سپيريدونوۆتىڭ ەم-دومىنا كومەكتەسىپ, سول ەلدەگى ارىپتەستەرىمىزگە قولۇشىمىزدى سوزعىمىز كەلەتىنىن ايتقىم كەلەدى», – دەپ مالىمدەدى.
الايدا, عالىمدار الەمدىك مەديتسينانى ءدۇر سىلكىندىرەتىن وسى جاڭالىقتى جۇزەگە اسىرۋ ءۇشىن ماتەريالدىق جانە باسقا دا ماسەلەلەردى شەشۋ قاجەت ەكەنىن ايتىپ وتىر. سەبەبى, مۇنداي وتا اقش پەن ەۋروپادا 100 ملن. دوللار تۇرسا, رەسەيدە ونى 20 ملن. دوللارعا جاساۋعا بولادى. «رەسەيدە وزگە ەلدەردەن ارزان بولۋىنا مەديتسينالىق قۇرىلىم مەن حيرۋرگيالىق ءداستۇردىڭ مول تاجىريبەسى سەبەپ», – دەدى س.كاناۆەرو.
ال رەسەيدىڭ ۆلاديمير قالاسىندا تۇراتىن, باعدارلاماشى ۆالەري سپيريدونوۆتىڭ ءوزى يتاليالىقتىڭ ۇسىنىسىنان باس تارتپايتىنىن ايتتى. تۋعاننان ارقا بۇلشىق ەتتەرىنىڭ اتروفيىمەن اۋىراتىن ناۋقاس بۇگىندە ءوز دەنەسىن باسقارا المايتىن حالگە جەتكەن.
«مۇنداي وتاعا شامامەن 36 ساعات قاجەت. وسى ۋاقىتتا ناۋقاستىڭ تەرىسى بۇزىلماس ءۇشىن ونىڭ دەنەسى مەن باسىن ارنايى مۇزداتقىش ارقىلى سالقىنداتىپ وتىرامىز», – دەيدى دارىگەرلەر.
ەلامان قوڭىر,
«ەگەمەن قازاقستان».