كوكشەتاۋ. 21 قاڭتار. اقمولا وبلىسىندا تۇراتىن ينسۋلت دياگنوزدى ناۋقاستار بۇدان بىلاي وپەراتسيانى تەگىن جاساتاتىن بولادى. بۇل تۋرالى «24.kz» تەلەارناسىنا سىلتەمە جاساعان egemen.kz ءتىلشىسى حابارلادى.
وسى كەزدە دەيىن بۇل وپەراتسيانىڭ قۇنى 4 ملن. تەڭگەنىڭ ۇستىندە ەدى. ال ءينسۋلتتىڭ الدىن الۋعا كومەكتەسەتىن مۇنداي كۇردەلى ەم-دوم شارالارى بۇرىن تەك استانا جانە الماتى قالالارىندا عانا جاسالاتىن. كوكشەتاۋ ءوڭىرىنىڭ دارىگەرلەرى بۇعان استاناداعى ۇلتتىق نەيروحيرۋرگيا ورتالىعى وكىلدەرىمەن تاجىريبە الماسۋ ارقىلى قول جەتكىزدى.
مامانداردىڭ ايتۋىنشا, بۇدان بىلاي نەيروحيرۋرگتار ەندوۆاسكۋليارلىق ادىسپەن ادامنىڭ باسسۇيەگىن بۇرىنعىداي اشپايدى. بۇعان قوسا, ونىڭ تەرى دە زاقىم كورمەيدى. ويتكەنى, وپەراتسيا پىشاقتىڭ قاتىسۋىنسىز ورىندالادى.
- مي قانتامىرلارىنا وپەراتسيا جاساۋ ءۇشىن بىزگە ەندى ءبىر كىشكەنە تەسىك قانا جەتكىلىكتى. سول ارقىلى ارنايى قۇرالدارىمىزدى ەنگىزىپ, باستا پايدا بولعان ارتەريالدى انەۆريزمدى جابامىز. وپەراتسيادان كەيىنگى بەيىمدەلۋ كەزەڭى دە تەز وتەدى. بۇل - دامىعان ەلدەردىڭ تاجىريبەسى, - دەيدى وبلىستىق اۋرۋحانانىڭ نەيروحيرۋرگيا بولىمشەسنىڭ مەڭگەرۋشىسى ەرلان اياعانوۆ.
باقبەرگەن امالبەك.
دەرەك: 24.kz.