اتىراۋ. 21 قاڭتار. اتىراۋ وبلىستىق ىشكى ىستەر دەپارتامەنتىنە ارنايى ماقساتتاعى FB 38STAB SF كاتەرى 2013 جىلى مەملەكەتتىك ساتىپ الۋ پورتالىنداعى اشىق كونكۋرس ناتيجەسىمەن الىندى. كاتەردىڭ جالپى قۇنى 178 ملن. 571 مىڭ تەڭگەنى (قوسىمشا قۇن سالىعىنسىز) نەمەسە 958 مىڭ 488 ەۋرونى (قوسىمشا قۇن سالىعىن قوسقاندا) قۇرادى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى.
«جەتكىزۋشىنىڭ اقپاراتى بويىنشا, كاتەردىڭ جالپى قۇنىنا كەلەسى شىعىندار كىرەدى: 95 مىڭ ەۋرو – قوسالقى جابدىقتار: ناۆيگاتسيالىق جابدىق, رادار, Intercom جۇيەسى, كەمەنى باسقارۋدىڭ (پورتتاعى مانەۆرلەر) ىشكى بلوگى, ارتتى كورسەتۋ كامەراسى, قارۋ قوياتىن تۇعىر, كاتەردىڭ الدىڭعى بولىگىندەگى اينالاتىن ورىندىق; 25 مىڭ ەۋرو – الماتىعا دەيىن جەتكىزۋ, ساقتاندىرۋدى قوسا ەسەپتەگەندە; 117 مىڭ ەۋرو – ەلگە كىرگىزگەندەگى باج سالىعى, 20% ەسەپتەۋ; 84 مىڭ 240 ەۋرو – يمپورتتىق 12% قوسىمشا قۇن سالىعى; وسىلايشا, كەدەندىك راسىمنەن كەيىن كاتەردىڭ وزىندىك قۇنى 786 مىڭ 240 ەۋرونى قۇرادى, ديستريبيۋتوردىڭ مارجاسى – 20% (157 مىڭ 248 ەۋرو); 15 مىڭ ەۋرو – ساتىپ الۋدى قارجىلاندىرۋ, بانكتىڭ اقشا اۋدارۋ كوميسسياسى. ناتيجەسىندە اتىراۋ قالاسىندا كاتەر باعاسى 958 مىڭ 488 ەۋرونى (سول كەزدەگى كۋرسپەن 196 ملن. 490 مىڭ 40 تەڭگە) قۇرادى», – دەلىنگەن اتىراۋ وبلىستىق ىشكى ىستەر دەپارتامەنتى تاراتقان ارنايى حابارلامادا.
بۇل كاتەر كاسپي تەڭىزىنىڭ اكۆاتورياسىندا پاترۋلدىك-ينسپەكتسيالىق قىزمەت اتقارۋ ءۇشىن ارنايى جابدىقتارمەن جاراقتالعان. كاتەر ارقايسىسىنىڭ 500 ات كۇشى بار قوس ديزەلدىك قوزعالتقىشپەن جاراقتالعان. جالپى قۋاتى 1000 اتتىڭ كۇشىنە تەڭ. ەڭ جوعارى جىلدامدىقپەن جۇرەتىن كاتەرمەن «سۋ پوليتسياسىنىڭ» قىزمەتكەرلەرى زاڭسىز اينالىمنان 166 توننا بالىق, ونىڭ ىشىندە, 5 توننا بەكىرە تۇقىمداس بالىق, سونىمەن بىرگە, 200-گە جۋىق ءجۇزۋ قۇرالدارى تاركىلەنگەنى ايتىلادى. الايدا, كاتەردىڭ قاي ەلدەن تاپسىرىسپەن اكەلىنگەنى حابارلانعان جوق.
جولداسبەك شوپەعۇل.
دەرەك: اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
سۋرەت: nur.kz.