باق پەن باپ قاتار شاپتى

وتكەن سەيسەنبىدە قۇرلىقتىق حوككەي ليگاسى شەڭبەرىندە استانانىڭ «بارىسى» ءوز ايدىنىندا مينسكىنىڭ «ديناموسىن» قابىلداپ, 4:2 ەسەبىمەن باسىم ءتۇستى. ويىننىڭ ءبىرىنشى كەزەڭىندە كوماندالار ءبىر-بىرىنە لايىقتى قارسىلىق كورسەتتى. الايدا, بۇل بولىكتە گول سوعىلمادى. ەسەسىنە, ەكىنشى كەزەڭدە جانكۇيەرلەر ءتورت گولدىڭ كۋاسى بولدى. كەزەڭ باستالا سالىسىمەن العا ۇمتىلعان ايدىن يەلەرى 21-مينۋتتا قورعاۋشى كەۆين داللمەننىڭ كومەگىمەن ەسەپ اشتى. ارادا 8 مينۋت وتكەندە, «بارىس» ساپىنان ماكسيم حۋدياكوۆ مەرگەندىگىمەن كوزگە ءتۇستى. قاقپالارىنا ەكى شايبا جىبەرىپ العانىنا قاراماستان, قوناقتار شابۋىلدا ساۋاتتى وينادى. ءناتي­جەسىندە 32-مينۋتتا دينامولىق حوككەيشى پول ششەحۋرا ەسەپ ايىر­ماسىن قىسقارتتى. ايتسە دە, ءبىر­نەشە سەكۋندتان كەيىن «بارىس» قايتادان ەكى شايبا ايىرماسىمەن العا شىقتى. بۇل جولى داستين بويد ناتيجەلى سوققىنىڭ اۆتورى اتاندى. سوڭعى كەزەڭدە, ياعني, 44-مينۋتتا استانالىقتار تاعى ءبىر شايبا سوقتى. بۇل جولى «دينامونىڭ» قاقپاسىن برەندون بوچەنسكي ءدال كوزدەدى. ال مينسكىلىكتەر 49-مينۋتتا تاعى ءبىر شايبامەن قارىمتا قايتاردى. اتالعان گول رايان ۆەسكەنىڭ ەنشى­سىنە جازىلدى. ويىننىڭ قالعان ۋاقىتىندا ەسەپ وزگەرگەن جوق. وسىلايشا «بارىس» ماۋسىمداعى 26-جەڭىسىنە قول جەتكىزدى. ليگانىڭ تۇراقتى چەمپيوناتىنىڭ اياق­تالۋىنا 8 تۋر قالعان تۇستا اندرەي نازاروۆتىڭ شاكىرتتەرى 78 ۇپايمەن شىعىس كونفەرەنتسياسىندا 7-ورىندا كەلەدى. ءبىزدىڭ كوماندا كەلەسى كەزدەسۋىن بۇگىن استانادا ومبىنىڭ «اۆانگاردىمەن» وتكىزەدى. ەلامان قوڭىر, «ەگەمەن قازاقستان».