ەلباسى پارلامەنت ءماجىلىسىنىڭ كەزەكتەن تىس سايلاۋىن وتكىزۋ ماسەلەسى جونىندە كەڭەس وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
كەڭەسكە پرەمەر-مينيستر ك.ءماسىموۆ, مەملەكەتتىك حاتشى گ.ابدىقالىقوۆا, پرەزيدەنت اكىمشىلىگىنىڭ باسشىسى ن.نىعماتۋلين, كونستيتۋتسيالىق كەڭەس توراعاسى ي.روگوۆ, باس پروكۋرور ا.داۋىلباەۆ جانە باسقالار قاتىستى.
ءىس-شارا بارىسىندا مەملەكەت باسشىسى دەپۋتاتتاردىڭ كەزەكتەن تىس ءماجىلىس سايلاۋىن وتكىزۋ جانە بارلىق دەڭگەيدەگى ءماسليحاتتاردىڭ كەزەكتى سايلاۋىن وتكىزۋ تۋرالى باستاماسىنا بايلانىستى ۇندەۋ جاسادى.
قازاقستان پرەزيدەنتى پارلامەنت ءماجىلىسى دەپۋتاتتارىنىڭ وكىلەتتىكتەرىن مەرزىمىنەن بۇرىن دوعارۋ جانە جاڭا سايلاۋ بەلگىلەۋ جونىندەگى ۇسىنىسىن جان-جاقتى تالداپ قاراعانىن ايتتى.
نۇرسۇلتان نازارباەۆ جاڭا كەزەڭدە شيكىزاتقا تومەن باعا جاعدايىندا ءومىر سۇرۋگە بەيىمدەلىپ, يندۋستريالاندىرۋدى, شاعىن جانە ورتا بيزنەستى دامىتۋدى بەلسەندى جالعاستىرۋ كەرەكتىگىن اتاپ ءوتتى.
– وسى ءبىر كۇردەلى احۋالدا ءبىزدىڭ ءبارىمىز ءۇشىن ەڭ ماڭىزدىسى – ىسىراپسىز ءومىر ءسۇرۋ, رەسۋرستاردى ۇنەمدەۋ, جۇمىس ورىندارىن ساقتاۋ ەكەنىن ءتۇسىنۋ. ۇكىمەت پەن پارلامەنتكە بۇل جاعدايدا بىرلەسىپ, جيناقى جۇمىس ىستەپ, جەدەل شەشىم قابىلداۋ قاجەت. ءبىزدىڭ حالقىمىزعا بۇرىنعىشا بىرىگىپ, وسى كۇردەلى ۋاقىتتا كەز كەلگەن ىقتيمال ارانداتۋلارعا, قاجەت بولسا, زاڭنامالىق تۇرعىدان تويتارىس بەرۋ كەرەك. ول جاعدايدىڭ ناشارلاۋىنا كىنالىلەردى ىزدەپ, ساياسيلاندىرعىسى كەلەتىندەرگە دە قاتىستى. بۇل – جاھاندىق ۇدەرىس, وعان بىردە-ءبىر ەل, سونىڭ ىشىندە قازاقستان دا ىقپال ەتە العان جوق. سوندىقتان, ءبارىمىز توپتاسىپ, ءبىر-بىرىمىزگە كومەكتەسۋىمىز كەرەك, – دەدى مەملەكەت باسشىسى.
قازاقستان پرەزيدەنتى ءبىزدىڭ قوعام بۇگىندە ءتۇرلى سىن-قاتەرلەرگە دايىن ەكەنىنە نازار اۋداردى.
– ءبىز تاۋەلسىزدىكتىڭ شيرەك عاسىرعا جۋىق ابىرويلى جولىن ءجۇرىپ وتتىك. ءبىز جاسامپاز ەڭبەكتە شىڭدالىپ, تابىستى, قالىپتاسقان جانە الەمگە سىيلى مەملەكەت قۇرعان ءبىرتۇتاس حالىققا اينالدىق. مەن دەپۋتاتتاردىڭ باستاماسىن قازاقستان مەن قازاقستاندىقتاردىڭ تاعدىرىنا وتانشىلدىق تۇرعىدان قامقورلىق تانىتۋدىڭ كورىنىسى دەپ قابىلدايمىن. ءماجىلىستىڭ كەزەكتەن تىس سايلاۋى (ونىڭ ىشىندە قازاقستان حالقى اسسامبلەياسىنىڭ دا دەپۋتاتتارى بار) جانە وڭىرلىك ءماسليحاتتاردىڭ كەزەكتى سايلاۋى بىرگە ءوتۋى ۋاقىتتى دا, قارجىنى دا ۇنەمدەيدى. بارشا دەپۋتاتتارعا مەملەكەتشىل ۇستانىمى مەن اسا جوعارى تاريحي جاۋاپكەرشىلىك تانىتقانى ءۇشىن العىسىمدى ايتامىن, – دەدى نۇرسۇلتان نازارباەۆ.
مەملەكەت باسشىسى ەل كونستيتۋتسياسى تالاپتارىنا سايكەس, پارلامەنت پالاتالارى توراعالارىمەن, پرەمەر-مينيسترمەن جانە كونستيتۋتسيالىق كەڭەس توراعاسىمەن كونسۋلتاتسيالار وتكىزگەنىن, سونىڭ قورىتىندىسى بويىنشا دەپۋتاتتاردىڭ باستاماسىن قولداۋ جونىندە شەشىم قابىلدانعانىن ايتتى.
– بيلىك سالاسى وكىلدەرى قۇرامىنىڭ جاڭارتىلۋى ەلىمىز بەن حالقىمىزدىڭ مۇددەسىنە ساي كەلەتىندىگىنە سەنىمىم كامىل. ساياسي پارتيالار كۇن ءتارتىبىندەگى مىندەتتەردى تۇسىنە بىلەتىن ساۋاتتى, ىسكەر جانە ەل ءمۇددەسىنە ادال كانديداتتاردى ۇسىنۋعا ءتيىس. بۇگىن مەن بەسىنشى شاقىرىلىمداعى پارلامەنت ءماجىلىسىنىڭ وكىلەتتىگىن مەرزىمىنەن بۇرىن توقتاتۋ تۋرالى جارلىققا قول قويدىم. ءماجىلىستىڭ كەزەكتەن تىس سايلاۋى 2016 جىلعى 20 ناۋرىزعا بەلگىلەندى, – دەدى قازاقستان پرەزيدەنتى.
نۇرسۇلتان نازارباەۆ بۇكىل قازاقستاندىقتاردى, قوعامنىڭ بارلىق الەۋمەتتىك توپتارىن ۋاقىت تالابى تۋدىرعان شەشىمدى قولداۋعا شاقىردى.
– بارشاڭىزدى سايلاۋعا بەلسەنە قاتىسۋعا, ەلىمىزدىڭ بولاشاعى جولىنداعى تۇتاستىعىمىز بەن بىرلىگىمىزدى تاعى دا تانىتۋعا شاقىرامىن. كونستيتۋتسيانىڭ كەپىلى رەتىندە ورتالىق سايلاۋ كوميسسياسىنا جانە بارلىق وكىلەتتى مەملەكەتتىك ورگاندارعا الداعى سايلاۋدا زاڭدىلىقتى, اشىقتىقتى جانە ادىلەتتىلىكتى قامتاماسىز ەتۋدى تاپسىرامىن. داۋىس بەرۋ ناۋقانى جانە سايلاۋ كۇردەلى كەزەڭدە ۇلتتى ۇيىستىرىپ, ءبىزدىڭ قازاقستانىمىزدى جاڭا بەلەستەرگە الىپ شىعۋعا كومەكتەسەدى دەپ سەنەمىن, – دەدى مەملەكەت باسشىسى.