تاراز. 20 قاڭتار. جامبىل وبلىسىندا دارەتحانادا تابىلعان نارەستەگە تالاس ودان سايىن قىزا تۇسۋدە. بۇل تۋرالى egemen.kz ءتىلشىسى حابارلادى.
اجەتحانادا تابىلعان ءسابي اكەسىنە بەرىلۋى مۇمكىن. ءسابيدى ناعاشى اجەسى دە باۋىرىنا باسۋعا ارەكەت ەتىپ جاتىر. سوندىقتان ول وزگە اسىراپ الۋشىلارعا بەكەرگە جانتالاسپاۋعا كەڭەس بەردى.
قازىر سوعان قاتىستى قۇجاتتارىن جيناپ, مامانداردان كەڭەس الىپ ءجۇر ەكەن. دەگەنمەن, ونىڭ ارەكەتىنەن ەشتەڭە شىقپايتىن ءتارىزدى. ويتكەنى زاڭ, بويىنشا جاسى 45-تەن اسقان ادامنىڭ جاڭا تۋعان ءسابيدى اسىراپ الۋعا حاقىسى جوق.
بيبىگۇل ماجىعۇلوۆا 45 جاستان اسقاندا, بۇلاي ۇياتقا قالۋ ءۇش ۇيىقتاسام تۇسىمە كىرمەدى دەيدى. جالعىزباستى ايەل سۇمدىق وقيعادان ءالى كۇنگە ەسىن جيا الاتىن ەمەس. بۇعان دەيىن قىزىنان نەمەرە سۇيگەن ايەل ەكىنشى مارتە اجە بولاتىنىن بىلمەگەن. ال ءولىم اۋزىنان قالعان جيەنىنە ەل-جۇرتتىڭ تالاسۋى ونىڭ جانىنا قاتتى باتىپتى. ايتۋىنشا, ءوزى نارەستەدەن باس تارتپاق ەمەس, سوندىقتان باۋىرىنا باسۋ ءۇشىن بار كۇشىن سالماق.
«كەشىرسىن, قايتىپ بەرسە ەكەن ەندى, قۇدايدان تىلەيتىنىم وسى. بالانى بەرسە بولدى, ودان باس تارتقان ەمەسپىز. ەشكىمگە بەرمەيمىن, قايتىپ الامىن. ەكەۋىن ولە ولگەنشە اسىرايمىن», دەيدى بيبىگۇل ماجىعۇلوۆا.
بالاسىن تۋىپ, دارەتحاناعا تاستاپ كەتكەن 21 جاستاعى كەلىنشەك تارازداعى ءدامحانالاردىڭ بىرىندە داياشى بولىپ قىزمەت ىستەگەن. تاپقان اقشاسىن اۋىلداعى ەكى جاستاعى قىزى مەن شەشەسىنە جىبەرىپ وتىرىپتى. ۇيىنە ءجيى سوقپايتىن ايەل بۇعان دەيىن تۇرمىستا بولىپ اجىراسقان ەكەن. ال بۇل جولى وتباسىلى ەركەكتەن جۇكتى بولسا كەرەك. دەگەنمەن, اكەسى ودان باس تارتپاعان.
سونداي-اق, كوكەك انانىڭ ءوزى دە سۋيتسيد جاساماق بولعانى انىقتالدى. كوپ مولشەردە ءدارى ءىشىپ حال ۇستىندە اۋرۋحاناعا ءتۇسىپتى. ءدال سول كەزدە ونىڭ ىزدەۋدە جۇرگەن ايەل ەكەنى بەلگىلى بولعان. قازىر ول كەپىلاقىمەن بوساتىلعان. دەگەنمەن, قىلمىستىق ءىس ءالى تەرگەلىپ جاتىر. ەندى ول انالىق قۇقىنان ايىرىلادى نەمەسە 4 جىلعا سوتتالادى.
ال كىشكەنتاي جانسايانى اجالدان قۇتقارىپ قالعان وتباسى بالا-شاعاسىمەن قوناققا كەتىپ بارا جاتىپ, دارەت سىندىرۋعا توقتاعان. اجەتحانانىڭ شۇڭقىرىندا شىرىلداپ جاتقان ءسابيدى ەڭ ءبىرىنشى كەلىنى بايقاپ تىسقا جانۇشىرا جۇگىرىپ شىعىپتى. ءسويتىپ, دەرەۋ ءتارتىپ ساقشىلارىنا حابار بەرىلگەن.
«قاراساق, دارەتحانانىڭ ىشىندە بۇرىشىندا جاتىر ەكەن.. وڭ جامباسىمەن بەتى, بەرى قاراعان. قول اياعى قيمىلداپ جاتىر. سول داۋىستى ەستىپ كوردىك,سوسىن جولداسىم حابار بەردى دەرەۋ», دەدى تاراز قالاسىنىڭ تۇرعىنى گۇلايىم كوبادىلوۆا.
قاتىگەزدىككە بارعان كەلىنشەك اۋىلىنا شامامەن 60 شاقىرىم جەردەگى دارەتحانادا قىلمىس جاساماق بولعان. ونىڭ بۇل جەرگە نەمەن كەلىپ, نەمەن كەتكەنى بەيمالىم. بىراق شاقالاق وسى وتباسىنىڭ ارقاسىندا ولىمنەن امان قالدى. تارازداعى بوبەكتەر ۇيىندە جاتقان ءسابيدى كىمنىڭ باۋىرىنا باسارى ازىرشە بەلگىسىز.
ورالحان ءداۋىت.
دەرەك, سۋرەت: egemen.kz