وسكەمەن. 20 قاڭتار. شىعىس قازاقستان وبلىسىنىڭ دەنە شىنىقتىرۋ جانە سپورت باسقارماسىنىڭ القا وتىرىسىندا ءوڭىردىڭ كەيبىر اۋداندارىندا پرەزيدەنتتىك سىناق كورسەتكىشتەرىنىڭ تومەندەپ كەتكەنى ءمالىم بولدى. بۇل تۋرالى egemen.kz ءتىلشىسى حابارلادى.
وبلىس اكىمىنىڭ ورىنباسارى جاقسىلىق وماردىڭ ايتۋىنشا, كورسەتكىشتەردىڭ تومەندەۋىنىڭ سەبەبى, سىناقتىڭ ءوز دەڭگەيىندە ۇيىمداستىرىلماۋىنان تۋىنداپ وتىر.
وبلىستىق سپورت جانە دەنە شىنىقتىرۋ باسقارماسىنىڭ باسشىسى ەلدوس شىكەنوۆ پرەزيدەنتتىك سىناقتارعا قاتىسۋشىلار كولەمىنىڭ دە ناشارلاپ كەتكەنىن جەتكىزدى. ماسەلەن, اتالعان سىناققا قاتىسۋ كورسەتكىشى ريددەر قالاسىندا 2,7 پايىزدى قۇراسا, زىريان اۋدانىندا 3,61 پايىزدى, شەمونايحا اۋدانىندا 2,2 پايىزدى, ال بەسقاراعاي اۋدانىندا 4,7 پايىزدى قۇراپ وتىر.
«پرەزيدەنتتىك سىناق تەك دەنە شىنىقتىرۋ دايىندىعىنىڭ عانا ناتيجەسى ەمەس, بۇل سپورتتىڭ دا دامۋ كورسەتكىشى سانالادى. سوندىقتان, ءبىز بۇل ماسەلەگە وتە ۇلكەن جاۋاپكەرشىلىكپەن قاراۋىمىز ءتيىس. باستى نورماتيۆتەردى تاپسىرۋدى دۇرىس ۇيىمداستىرماعاندارعا ءتيىستى شارالار قولدانىلاتىن بولادى», – دەدى جاقسىلىق ومار.
كەڭەيتىلگەن جيىننىڭ سوڭىندا بارلىق سپورتتىق كورسەتكىشتەردى ساراپشىلارمەن بىرگە سارالاۋ تاپسىرىلدى.
دۋمان اناش,
دەرەك, سۋرەت: شقو اقپاراتتىق ورتالىعى