استانا. 20 قاڭتار. اقتوبە وبلىسىندا كۇرە جولعا جاقىن ورنالاسقان اقجار اۋىلدىق وكرۋگى ماڭىنان بوي كوتەرگەن «رايگۇل» كەمپينگى پايدالانۋعا بەرىلدى. بۇل تۋرالى egemen.kz ءتىلشىسى حابارلادى.
حرومتاۋ اۋدانى اكىمىنىڭ ورىنباسارى سەيىتماعانبەت ءشىلمانوۆتىڭ ايتۋىنشا, سوڭعى ءۇش جىلدا اۋداندا جول بويىندا قىزمەت كورسەتەتىن 13 نىسان ىسكە قوسىلعان. قىزمەت كورسەتۋ ورتالىقتارىنا قازاقستاندىقتاردان باسقا تۇركيا, رەسەي, قىتاي, مولداۆيا, بولگاريا, وزبەكستان جولاۋشىلارى دا ايالدايدى. الداعى ۋاقىتتا جول بويىندا بۇدان باسقا ون شاقتى كەمپينگ اشۋ جوسپارلانعان. سونىڭ التاۋى بيىل سالىنادى. مەملەكەت تاراپىنان مۇنداي ورتالىقتارعا ينجەنەرلىك جەلىلەر تەگىن تارتىلادى.
«رايگۇل» كەمپينگىنىڭ يەسى ەرجان كەنجەباەۆ جاڭا نىساندى سالۋعا 30 ملن. تەڭگە جۇمساعان. ورتالىقتىڭ ىشكى ارلەۋ جۇمىستارىن جۇرگىزۋ ءۇشىن «جۇمىسپەن قامتۋدىڭ جول كارتاسى-2020» باعدارلاماسى بويىنشا 3 ملن. تەڭگە كولەمىندە نەسيە العان. كەمپينگتە 80 ادامعا ارنالعان اسحانا, 16 ورىندىق قوناق ءۇي جانە مونشا بار.
ساتىبالدى ءساۋىرباي.
دەرەك, سۋرەت: egemen.kz.