پەتروپاۆل. 20 قاڭتار. سولتۇستىك قازاقستان وبلىستىق ىشكى ىستەر دەپارتامەنتى تارتىپتىك كەڭەسىنىڭ شەشىمىمەن 8 پوليتسيا قىزمەتكەرى قىزمەتىنەن الاستاتىلدى. بۇل تۋرالى egemen ءتىلشىسى حابارلادى.
وبلىستىق ىشكى ىستەر دەپارتامەنتىنىڭ باستىعى, گەنەرال-مايور بەرىك ءبىلالوۆتىڭ, قالا اكىمى مارات تاسماعانبەتوۆتىڭ قاتىسۋىمەن وتكەن تارتىپتىك كەڭەستىڭ اشىق وتىرىسىندا ىشكى قىزمەتتىك قاۋىپسىزدىڭ باسقارماسىنىڭ باستىعى نۇرلان قاپاروۆ پوليتسيا قىزمەتكەرلەرى جاساعان جەمقورلىق قىلمىس فاكتىلەرى جايلى باياندادى. تارتىپتىك كوميسسيا شەشىمىمەن پارا الدى دەگەن كۇدىكپەن ۇستالعان پەتروپاۆل قالالىق ىشكى ىستەر باسقارماسىنىڭ 2 جەدەل ۋاكىلى, اتاپ ايتقاندا, كاپيتاندار جانگەلدى ساحاتوۆ پەن ەربول شايىنوۆ قۇقىق قورعاۋ سالاسىنان قۋىلدى. بۇل ەكەۋى قاڭتار ايىندا قىلمىستىق ءىستى توقتاتۋ ءۇشىن 100 مىڭ تەڭگە پارا الۋ كەزىندە ۇستالعان بولاتىن. ءبىر تاڭقالارلىعى, الىم تالاپ ەتۋشىلەر ءتارتىپ ساقشىلاردىڭ وتباسىنان شىققان. كاپيتان ەربول شايىنوۆتىڭ اكەسى پەتروپاۆل قالالىق, شال اقىن اۋداندىق پوليتسيا بولىمشەلەرىندە جەتەكشىلىك ەتكەن.
جالپى, كەڭەس وتىرىسىندا وزدەرىنىڭ قىزمەتتىك مىندەتتەرىن دۇرىس اتقارماعاندىعى, قاراماعانداعى باعىنىشتى قىزمەتكەرلەردىڭ قىزمەتىنە دۇرىس باقىلاۋ جۇرگىزبەگەنى ءۇشىن بىرقاتار باسشىلار قاتاڭ تارتىپتىك جازاعا تارتىلدى. قىزمەتىنەن قۋىلعان پوليتسيالاردىڭ تىكەلەي باسشىلارى لاۋازىمدى قىزمەتتەرىنەن بوساتىلدى. ولاردىڭ اراسىندا قالالىق ىشكى ىستەر باسقارماسى باستىعىنىڭ ورىنباسارى الەكساندر دەروۆ, ءبولىم باستىقتارى جانات تاڭاتقانوۆ, سەرىك ءالجانوۆ, ەسىل اۋداندىق ىشكى ىستەر باسقارماسى باستىعىنىڭ ورىنباسارى ولەگ يانۋشكين سەكىلدى لاۋازىم يەلەرى بار. سونداي-اق, وبلىستىق ىشكى ىستەر دەپارتامەنتى باستىعىنىڭ ورىنباسارلارى دۋمان تاەۆ پەن ۆيكتور بۋكرەەۆ تە جازادان قۇتىلا المادى.
وتكەن جىلى ەسىل اۋدانىندا جەمقورلىق سيپاتتاعى قىلمىسقا باردى دەگەن كۇدىكپەن كامىلەتتىك جاسقا تولماعاندار ءىسى جونىندەگى ينسپەكتور ۇستالعان-دى. ول اۋىلداسىن اكىمشىلىك جاۋاپكەرشىلىككە بوساتۋ ءۇشىن 20 مىڭ تەڭگە تالاپ ەتكەن. وسى ىسىنە وراي ينسپەكتور جۇمىستان شىعارىلىپ, ەكى باسشىسى لاۋازىمدى قىزمەتتەرىنەن ايىرىلدى.
مۇنان وزگە 20-عا جۋىق شەندىلەرگە قاتاڭ سوگىس بەرىلدى.
ءومىر ەسقالي.
دەرەك, سۋرەت: egemen.kz.