تاراز. 20 قاڭتار. جامبىل وبلىسى اكىمدىگىندە جۇكتىلىگىن جاسىرىپ, جول ۇستىندە بالا بوسانعان مەكتەپ وقۋشىسىنىڭ ماسەلەسىنە قاتىستى ارنايى جيىن وتكىزىلدى. وندا بالا تاربيەسىنە سالعىرت قاراپ, نارەستە ولىمىنە جول بەرگەنى ءۇشىن بىرقاتار جاۋاپتى تۇلعالارعا تارتىپتىك جازا بەرىلدى. بۇل تۋرالى جامبىل وبلىسى اكىمىنىڭ ءباسپاسوز قىزمەتى حابارلادى.
«تالاس اۋدانى, ءۇشارال اۋىلى شاعىن عانا ەلدى مەكەن. مەكتەپتەگى وقۋشىلاردىڭ دا سانى كوپ ەمەس. ءار سىنىپتاعى وقۋشىلار ءۇشىن سىنىپ جەتەكشىسى, تاربيە ءىسى جونىندەگى ورىنباسار, مەكتەپ ديرەكتورى, بالالاردىڭ دەنساۋلىعىن قاداعالايتىن ارنايى دارىگەر بار. سولاي بولا تۇرا, مەكتەپ قابىرعاسىنداعى ءجاسوسپىرىمنىڭ جۇكتى بولۋىنا جول بەرىلگەن. قاجەتتى جۇمىستار دەر كەزىندە جۇرگىزىلمەگەن. ۋاقىتىندا انىقتاعان بولساڭىزدار نارەستە ولىمىنە دە جول بەرىلمەس ەدى», دەيدى جامبىل وبلىسىنىڭ اكىمى كارىم كوكىرەكباەۆ.
بالا تاربيەسى مەن ادام تاعدىرىنا بەي-جاي قاراۋعا بولمايتىنىن قاتاڭ ەسكەرتكەن ايماق باسشىسى الەۋمەتتىك سالاعا جاۋاپتى ورىنباسارىنا ەسكەرتۋ, وبلىستىق ءبىلىم, دەنساۋلىق باسقارمالارىنىڭ باسشىلارىنا, كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيا حاتشىسىنا سوگىس, تالاس اۋدانىنىڭ اكىمىنە قاتاڭ سوگىس تۇرىندەگى تارتىپتىك جازا بەرىلەتىنىن جەتكىزدى.
سونىمەن قاتار اۋداندىق ءبىلىم ءبولىمىنىڭ باسشىسى, مەكتەپ ديرەكتورى, ءۇشارال اۋىلدىق وكرۋگىنىڭ اكىمى, تالاس اۋدانىنىڭ باس دارىگەرى مەن ورىنباسارى, جالعان انىقتاما بەرگەن مەدبيكە قىزمەتىنەن بوساتىلدى.
ورالحان ءداۋىت.
دەرەك, سۋرەت: egemen.kz