استانا. 16 قاڭتار. يندونەزيانىڭ استاناسى – دجاكارتا قالاسىنداعى جارىلىستارعا قاتىسى بار دەگەن كۇدىكپەن ءۇش كۇدىكتى ۇستالدى. بۇل تۋرالى 24.kz تەلەارناسىنا سىلتەمە جاساعان egemen.kz ءتىلشىسى حابارلادى.
سونىمەن قاتار, ارنايى وپەراتسيا بارىسىندا جانكەشتىلەردىڭ «يسلام مەملەكەتى» لاڭكەستىك توبىنا قاتىسى بار ەكەندەرى انىقتالدى. بۇعان دەيىن جارىلىستى ۇيىمداستىرۋشى يندونەزيا ازاماتى باحرۋن نايم بولۋى مۇمكىن ەكەنى ايتىلعان بولاتىن. تەرگەۋشىلەردىڭ دەرەگى بويىنشا, ول بۇگىندە سيريادا ءجۇر.
جەرگىلىكتى پوليتسەيلەردىڭ ءبىرى انتون چارلياننىڭ سوزىنە قاراعاندا, قىلمىسكەرلەر جاسىرىنعان باسپانالاردىڭ بىرىنەن «يسلام مەملەكەتى» لاڭكەستىك توبىنىڭ تۋى تابىلعان.
«تەرگەۋ امالدارى اياقتالعانشا ناقتى دەرەكتەردى جاريالاي المايمىز. قازىرگى تاڭدا وسى ءىستى اشۋ ءۇشىن جۇمىستار كۇشەيتىلگەن رەجىمدە جۇرگىزىلۋدە», – دەيدى ءتارتىپ ساقشىسى.
ايتا كەتەيىك, 14 قاڭتار كۇنى دجاكارتانىڭ ورتالىعىندا بىرنەشە جارىلىس پەن اتىس بولدى. سالدارىنان 7 ادام قازا تاپسا, 24-ءى جاراقات الدى. جارالىلاردىڭ اراسىندا شەتەل ازاماتتارى دا بار.
ەلامان قوڭىر.
دەرەك: 24.kz.
سۋرەت: EPA.