اقتوبە. 15 قاڭتار. اقتوبەدە تۇرىكتەر ورتالىق مەديتسينالىق جەدەل جاردەم ستانساسىن سالادى. بۇل تۋرالى egemen.kz ءتىلشىسى حابارلادى.
تۇركيانىڭ Hemogens Health Care كومپانياسىنىڭ اقتوبەدە ورتالىق مەديتسينالىق جەدەل جاردەم ستانساسىن سالاتىنى تۋرالى وبلىس اكىمى بەردىبەك ساپارباەۆتىڭ كومپانيانىڭ باس ديرەكتورى نادجيە ارپادجىمەن كەزدەسۋ بارىسىندا بەلگىلى بولدى.
كەزدەسۋدە ءوڭىر باسشىسى سوڭعى بەس جىل ىشىندە ايماقتا حالىقارالىق ستاندارتتارعا جاۋاپ بەرەتىن 52 دەنساۋلىق ساقتاۋ نىسانى سالىنعاندىعىن, 52 مەكەمە عيماراتىنا كۇردەلى جوندەۋ جۇرگىزىلگەندىگىن جەتكىزدى. مەديتسينالىق مەكەمەلەردىڭ ماتەريالدىق-تەحنيكالىق بازالارىن جاقسارتۋ جولىندا جۇمىستار جۇرگىزىلۋدە, نەگىزىنەن ونكولوگيالىق سىرقاتتار ءۇشىن جەلىلىك جەدەلدەتكىش, جۇرەك ىرعاعى بۇزىلعان ەمدەلۋشىلەرگە قاجەتتى ەلەكترلى فيزيولوگيالىق لابوراتوريا, كوز ميكروحيرۋرگياسى وفتالمولوگيالىق جابدىق سەكىلدى بىرەگەي ەمدىك قۇرالدار ساتىپ الىنعانىن تىلگە تيەك ەتە كەلىپ, ولاردىڭ ءوڭىر مەديتسيناسىن نەعۇرلىم جوعارى ساپالىق دەڭگەيگە كوتەرۋگە العىشارت جاساعانىن ايتتى. سونىمەن بىرگە, دەنساۋلىق ساقتاۋ سالاسىندا شەشۋدى قاجەت ەتەتىن پروبلەمالار دا بار ەكەنىن جاسىرمادى. سونداي وزەكتى ماسەلەلەردىڭ ءبىرى – مەديتسينالىق جەدەل جاردەم قىزمەتىىنىڭ تيپتىك عيماراتتىڭ بولماۋى, اۆتوكولىكتەر مەن جابدىقتاردىڭ شەگىنە جەتە توزۋى, ديسپەتچەرلىك قىزمەتتىڭ قازىرگى ستاندارتتارعا ساي كەلمەۋى ەكەنىن ءمالىم ەتتى.
«وسىعان بايلانىستى ءبىز وبلىستىق جەدەل جاردەم ستانساسىن اۋتسورسينگكە بەرۋ تۋرالى شەشىم قابىلدادىق. بۇل رەتتە بىزگە تۇركيالىق ارىپتەستەرىمىز كومەككە كەلمەك», – دەيدى بەردىبەك ماشبەك ۇلى.
قازىرگى ۋاقىتتا سانيتارلىق كولىك پاركىنىڭ توزۋى 55 پايىزدى قۇراسا, بۇل كورسەتكىش بويىنشا مەديتسينالىق جابدىقتاردىڭ دا جاعدايى ءماز ەمەس. جەدەل جاردەم بريگادالارىنا جۇكتەمە وتە جوعارى , وتكەن جىلى عانا ول 29 پايىزعا كوتەرىلدى. شاقىرۋلار سانى كوبەيە ءتۇستى, وسىعان بايلانىستى كەشىگىپ بارۋ جاعدايلارى ورىن الۋدا.
Hemogens Health Care كومپانياسىنىڭ باس ديرەكتورى نادجيە ارپادجى تۇركيا مەن بىرىككەن اراب امىرلىگىندە وزدەرىنىڭ وسىنداي جوبالاردى جۇزەگە اسىرۋدا ءبىراز تاجىريبە جيناقتاعانىن ايتا كەلىپ, اقتوبە ءوڭىرىنىڭ دەنساۋلىق ساقتاۋ سالاسىنا 5,5 ميلليارد تەڭگە ينۆەستيتسيا جاسالاتىندىعىن جەتكىزدى.
وبلىس اكىمى مەملەكەتتىك-جەكە ارىپتەستىك ەسەبىنەن تارتىلعان ينۆەستيتسيانىڭ ەلىمىزدىڭ باتىس ايماعىندا دەنساۋلىق ساقتاۋ جۇيەسىن جانە مەديتسينالىق ءتۋريزمدى دامىتۋعا باعىتتالاتىندىعىنا سەنىم ءبىلدىردى.
كەزدەسۋ قورىتىندىسى بويىنشا مەموراندۋمعا قول قويىلدى.
ساتىبالدى ءساۋىرباي.
دەرەك, سۋرەت: egemen.kz.