قاراعاندىداعى «فيتوحيميا» حالىقارالىق عىلىمي-ءوندىرىستىك حولدينگىندە ەل پرەزيدەنتى نۇرسۇلتان نازارباەۆتىڭ «ۇلت جوسپارى – قازاقستاندىق ارمانعا باستايتىن جول» اتتى «ەگەمەن قازاقستان» گازەتىندە جاريالانعان ماقالاسىن تالقىلاعان جيىن ءوتتى.
ءمانى تەرەڭ بۇل شاراعا «فيتوحيميا» حولدينگىنىڭ جەتەكشى عالىمدارى, عىلىمي قىزمەتكەرلەرى, دوكتورانتتار, ماگيسترانتتار, جاس ماماندار جانە قاراعاندى فارماتسەۆتيكالىق زاۋىتىنىڭ ينجەنەر-تەحنيكالىق قىزمەتكەرلەرى, جيىنى 100-دەن استام ادام قاتىستى.
ەلباسى ماقالاسىن تالقىلاۋ جيىنىن «فيتوحيميا» حولدينگىنىڭ باسقارما توراعاسى, قر ەڭبەك سىڭىرگەن قايراتكەرى, ۇعا اكادەميگى, حيميا عىلىمدارىنىڭ دوكتورى, پروفەسسور سەرعازى ادەكەنوۆ اشىپ جۇرگىزىپ وتىردى.
جيىندا «فيتوحيميا» حولدينگىنىڭ باس عىلىمي حاتشىسى, حيميا عىلىمدارىنىڭ كانديداتى گ ۇلىم مۇقىشەۆا بايانداما جاساپ, جارىسسوزگە زەرتحانا مەڭگەرۋشىسى, حيميا عىلىمدارىنىڭ دوكتورى, پروفەسسور بوراش تولەۋوۆ, قاراعاندى فارماتسەۆتيكالىق زاۋىتىنىڭ ديرەكتورى, فارماتسەۆتيكا عىلىمدارىنىڭ دوكتورى ەۆگەني تولوكوننيكوۆ شىعىپ سويلەدى.
گ ۇلىم مۇقىشەۆا ءوز بايانداماسىندا ەلباسى ماقالاسىندا ايتىلعان كوكەيكەستى جانە ومىرشەڭ ماسەلەلەرگە جەكە-جەكە توقتالىپ, ولاردىڭ ءمان-ماعىناسىن تەرەڭ تالداپ ءتۇسىندىردى. اسىرەسە, مەملەكەتتىك قىزمەت رەفورماسىن ىسكە اسىرۋ, مەملەكەتتىك قىزمەتكەرلەردىڭ ەڭبەكاقىسىن تولەۋ, سىبايلاس جەمقورلىقتىڭ الدىن الۋ شارالارىن جەتىلدىرۋ, قۇقىقتىق ءتارتىپتى قامتاماسىز ەتۋ, ەلىمىزدىڭ يندۋستريالانۋىن ءتيىمدى جۇرگىزۋ جانە ەكونوميكالىق دامۋ, قازاقستاندىقتاردىڭ دەنساۋلىعىن نىعايتۋ جانە ءومىر ءسۇرۋ دەڭگەيىن كوتەرۋ ءۇشىن وتاندىق دارىلىك پرەپاراتتار ءوندىرىسىن ۇيىمداستىرۋ تۋرالى ماڭىزدى مىندەتتەردىڭ كۇن تارتىبىندە وتكىر تۇرعانىن ەرەكشە اتاپ ءوتتى.
ينۆەستيتسيالىق ساياساتتىڭ نەگىزگى باعىتتارىنىڭ ءبىرى رەتىندە تەحنيكالىق جانە كاسىپتىك ءبىلىمدى دامىتۋ, جوعارى وقۋ ورىندارىنىڭ عىلىمي ۇيىمدارمەن جانە وندىرىسپەن ىقپالداستىقتا جۇمىس ىستەۋى, «بارلىعى ءۇشىن تەگىن كاسىپتىك-تەحنيكالىق ءبىلىم» اتتى جاڭا جوبانى جۇزەگە اسىرۋ ماسەلەلەرى دە تالقىلاۋدان تىس قالمادى.
سونداي-اق, گ ۇلىم مۇقىشەۆا «فيتوحيميا» حالىقارالىق عىلىمي-وندىرىستىك حولدينگى مەن قاراعاندى فارماتسەۆتيكالىق زاۋىتىنىڭ بازاسىندا قاراعاندى وبلىسىندا فيتوفارماتسەۆتيكالىق كلاستەر قۇرۋ ماسەلەسىنە باسا نازار اۋداردى. بۇل كلاستەر وتاندىق فارماتسەۆتيكا سالاسىنىڭ دامۋى ءۇشىن كونسورتسيۋم تۇرىندە جۇمىس ىستەيتىن بولادى. فيتوفارماتسەۆتيكالىق كلاستەردى دامىتۋ باعدارلاماسى بويىنشا وتاندىق فارماتسەۆتيكالىق ءوندىرىس ءۇشىن ينجەنەرلىك قىزمەتكەرلەر قۇرامىن دايارلاۋ جانە قايتا دايارلاۋ قاراستىرىلعان.
ەلباسى ماقالاسىندا ايتىلعانداي, قازىرگى تاڭدا ەلىمىزدە دۇنيەجۇزىلىك بانكپەن بىرلەسە وتىرىپ «تەحنولوگيالاردى كوممەرتسيالاندىرۋ» باعدارلاماسى جۇزەگە اسىرىلۋدا. اتالعان باعدارلاما بويىنشا 65 عىلىمي جوبا ورىندالۋ ۇستىندە. «فيتوحيميا» حولدينگى فارماتسەۆتيكالىق وندىرىسكە يننوۆاتسيالىق تەحنولوگيالاردى ازىرلەپ, ەنگىزۋ ءۇشىن ءوزىنىڭ عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋ جانە ينۆەستيتسيالاردى تارتۋ بويىنشا جۇمىستار جۇرگىزەدى. 2015 جىلدىڭ جەلتوقسان ايىندا «فيتوحيميا» حولدينگىنە كاراچي ۋنيۆەرسيتەتى حيميا جانە بيولوگيا عىلىمدارى حالىقارالىق ورتالىعىنىڭ ديرەكتورى, پروفەسسور مۋحامماد يكبال چوۋدحاري (پاكىستان) ىسساپارمەن كەلدى. بەلگىلى عالىم سول ساپاردىڭ قورىتىندىسىندا «فيتوحيميا» حولدينگىنىڭ عىلىمي-يننوۆاتسيالىق الەۋەتىنە وڭ باعا بەرىپ, حولدينگتى COMSATS قورىنىڭ قۇرامىنا كىرگىزۋدى ۇسىندى. ال COMSATS قورىنىڭ باستى ماقساتى – عىلىم جانە تەحنيكا سالاسى بويىنشا يسلام مەملەكەتتەرى اراسىنداعى ىنتىماقتاستىقتى نىعايتۋ جانە بىرەگەي عىلىمي-زەرتتەمەلەردى قارجىلاندىرۋ. سونداي-اق, قور عىلىم جانە يننوۆاتسيالىق تەحنولوگيالاردى دامىتۋ ءۇشىن, سونىمەن قاتار, جاس مامانداردى حيميا جانە فارماكولوگيا سالالارى بويىنشا دايىنداۋ ءۇشىن گرانتتار بولەدى.
حولدينگ قىزمەتكەرلەرى «بەس ينستيتۋتتىق رەفورمانى جۇزەگە اسىرۋ بويىنشا 100 ناقتى قادام» – ۇلت جوسپارى نەگىزىندەگى «فيتوحيميا» حولدينگىنىڭ الدىندا تۇرعان مىندەتتەردى سارالاپ, ولاردى ورىنداۋ بارىسىندا ءتيىمدى بولار-اۋ دەگەن ءوز ۇسىنىس-پىكىرلەرىن ءبىلدىردى.
قايرات ءابىلدينوۆ,
«ەگەمەن قازاقستان».
قاراعاندى.