ينفراقۇرىلىمدى جاڭعىرتۋعا باعىتتالعان ينۆەستيتسيا
ەۋروپا قايتا قۇرۋ جانە دامۋ بانكى شىعىس وڭىرىندە قۇنى 11 ملرد. تەڭگەنى قۇرايتىن جوبالاردى جۇزەگە اسىرادى. وبلىس ورتالىعىندا وتكەن ەكىجاقتى كەزدەسۋ بارىسىندا ءوڭىر باسشىسى دانيال احمەتوۆ پەن ەۋروپا قايتا قۇرۋ جانە دامۋ بانكىنىڭ ورتالىق ازيا جانە رەسەي ينفراقۇرىلىمى بويىنشا ديرەكتورى ەكاتەرينا ميروشنيك اتالعان نەسيەلىك كەلىسىمگە قول قويدى.
قول جەتكىزىلگەن كەلىسىمشارتتارعا سايكەس, ەۋروپا قايتا قۇرۋ جانە دامۋ بانكى سەمەي قالاسىنداعى «سەمەي سۋ ارناسى» جانە «جىلۋكوممۋنەنەرگو» كاسىپورىندارىنىڭ جوبالارىن قارجىلاندىرماق. ياعني, سەمەي قالاسىنداعى ورتالىق جىلۋ جانە سۋ قۇبىرلارى جۇيەلەرى جاڭعىرتىلادى. بۇل جوبالار بويىنشا قازاقستان رەسپۋبليكاسىنىڭ ۇكىمەتى دە ءوز كەزەگىندە «نۇرلى جول» ينفراقۇرىلىمدى دامىتۋ مەملەكەتتىك باعدارلاماسى اياسىندا جەڭىلدەتىلگەن قارجىلاندىرۋ قاراجاتىن بولەدى.
ۇسىنىلعان ينۆەستيتسيالار كاسىپورىندارعا ابدەن توزىعى جەتكەن جىلۋ جانە سۋ قۇبىرلارى جەلىلەرىن قايتا جوندەۋگە, سورعى ستانسالارىن جاڭعىرتۋعا باعىتتالعان جۇمىستاردى جۇرگىزۋگە مۇمكىندىك بەرەدى. سونداي-اق, زاماناۋي قۇرال-جابدىقتاردى, اۆتوماتتاندىرىلعان باسقارۋ جۇيەسىن ساتىپ الۋعا, ورناتۋعا جانە جىلۋ مەن سۋدى تۇتىنۋ ەسەبىن جۇرگىزەتىن قۇرالداردى ورناتۋ باعدارلاماسىن جالعاستىرۋعا دا جول اشادى. وسى ارقىلى ەنەرگيانى ءتيىمدى پايدالانۋدى ارتتىرۋ, ەكولوگيالىق تالاپتاردى جاقسارتۋ, رەسۋرستاردى تۇتىنۋدى وڭتايلاندىرۋ مەن شىعىنداردى ازايتۋعا قولايلى جاعداي قالىپتاستىرۋ كوزدەلىپ وتىر.
– ەۋروپا قايتا قۇرۋ جانە دامۋ بانكىنىڭ نەگىزگى باسىمدىقتارىنىڭ ءبىرى تابيعات رەسۋرستارى مەن ەنەرگيا قۋاتىن ءتيىمدى پايدالانۋعا باعىتتالعان. وسى ورايدا ءبىز قازاقستانمەن «جاسىل ەكونوميكا» جوباسىن دامىتۋدا, سول سياقتى, سەمەي قالاسىندا سۋدى ۇنەمدەۋ مەن ەنەرگيا تۇتىنۋداعى شىعىنداردى ازايتۋعا ىقپال ەتەتىن جاڭعىرتۋ جوبالارىن جۇزەگە اسىرۋدا تىعىز جۇمىس ىستەيمىز, – دەدى بانك وكىلى ەكاتەرينا ميروشنيك.
ال وبلىس اكىمى دانيال احمەتوۆ پرەزيدەنت جولداۋىندا ءمىندەتتەلگەن مەجەلەردى جۇزەگە اسىرۋ بارىسىندا مەملەكەت-جەكەمەنشىك ارىپتەستىگىن ۇيىمداستىرۋعا, قارجى ينستيتۋتتارىن تارتۋعا باسىمدىق بەرىلەتىنىن جەتكىزدى.
قازىرگى كەزدە وبلىس اكىمدىگى ەۋروپا قايتا قۇرۋ جانە دامۋ بانكىنەن جالپى كولەمى 171,1 ملرد. تەڭگەنى قۇرايتىن قاراجاتتى وڭىردەگى ماڭىزدى جوبالارعا تارتۋ بويىنشا بەلسەندى جۇمىس جۇرگىزۋدە. ونىڭ ىشىندە وسكەمەن مەن سەمەي قالالارىنا تيەسىلى 5 جوباعا ۇلكەن نازار اۋدارىلىپ وتىر. بۇل جوبالاردىڭ جالپى قۇنى 16,9 ملرد. تەڭگەگە تەڭ. سونىمەن بىرگە, 2016 جىلدىڭ العاشقى جارتىجىلدىعىندا وسكەمەن مەن سەمەي قالالارىندا ەنەرگيا ۇنەمدەۋ ءۇشىن كوشە شامدارىن اۋىستىرۋعا ارنالعان جانە وسكەمەن قالاسىندا سۋمەن قامتۋ جۇيەسىن جاڭعىرتۋ, سۋ تارتۋعا باعىتتالعان جالپى قۇنى 5,9 ملرد. تەڭگەنى قۇرايتىن تاعى 3 نەسيەلىك كەلىسىمگە قول قويىلادى.
دۋمان اناش,
«ەگەمەن قازاقستان».
شىعىس قازاقستان وبلىسى.