استانا. 14 قاڭتار. حالىقارالىق «شابىت» شىعارماشىل جاستار فەستيۆالىنىڭ لاۋرەاتى رەنات ەلۋباەۆ يتاليانىڭ استاناسى ريم قالاسىندا وتكەن حالىقارالىق سۋرەتشىلەر بايقاۋىندا جەڭىسكە جەتتى. بۇل تۋرالى egemen.kz ءتىلشىسى حابارلادى.
بايقاۋعا 170-گە جۋىق قىلقالام شەبەرلەرى قاتىستى. كونكۋرسقا ول ۇلتتىق ناقىشتاعى سۋرەتتەرىن ۇسىندى. وسى تۋىندىلارى تورەشىلەرگە ۇناپ, ونىڭ كارتينالارى قازىلاردىڭ شەشىمىمەن ۇزدىك دەپ تانىلدى. بايقاۋدا رەنات ەلۋباەۆ حالىقارالىق ميكەلاندجەلونىڭ مويسەي مۇسىنشەسىن الدى. ءسويتىپ, تالانتتى وتانداسىمىز قازاقتان تۇڭعىش رەت حالىقارالىق ميكەلاندجەلو سىيلىعىنىڭ يەگەرى اتاندى. «مۇنداي ۇلكەن سىيلىقتار ارتىستەرگە, انشىلەرگە بەرىلەدى. ال سۋرەت ءبىز ءۇشىن تاڭسىق دۇنيە. بۇل بايقاۋعا جەر-ءجۇزىنىڭ قىلقالام شەبەرلەرى قاتىسادى. قازىلار سولاردىڭ سۋرەتتەرىنە قاراپ, باعالارىن بەرەدى. مۇسىنشەگە لايىقتىلار عانا ۇزدىك دەپ تانىلادى. سول سىيلىق ماعان بۇيىردى», دەيدى رەنات ەلۋباەۆ.
مويسەي ستاتۋەتكاسى – ميكەلاندجەلو بۋونارروتي جاساعان اتاقتى ءمۇسىننىڭ كىشكەنتاي كوشىرمەسى. ونىڭ تاريحىن ايتساق, 1505 جىلى يۋلي ءىى ريم پاپاسى ونى شاقىرىپ الىپ, قۇلپىتاس جاساۋدى تاپسىرادى. ميكەلاندجەلو ءمۇسىندى جاسايدى. سول كەزدە مويسەي ءمۇسىنى ريمدەگى ەڭ باعالى تۋىندى دەپ تانىلادى.
رەنات ەلۋباەۆ يمپرەسسيونيستىك مودەرن باعىتىندا سۋرەت سالادى. يمپرەسسيونيزم «ەركىندىك», «ءبىر ساتتىك» دەگەن ماعىنانى بىلدىرەدى. بىلتىر ول «رەاليزمنەن الشاق» جانر بويىنشا بەلارۋستە وتكەن «كۋرشينالە-2015» حالىقارالىق ونەر وليمپياداسىندا «سۋرەت ونەرى» اتالىمىندا باس جۇلدەنى جەڭىپ العان. ودان كەيىن اقش-تىڭ نيۋ-يورك قالاسىندا وتكەن «New York Realism» fine art» اتتى بەينەلەۋ ونەرى شەبەرلەرىنىڭ حالىقارالىق بايقاۋىندا «التىن قىران» مەدالىن يەلەندى.
قازىر رەنات «استانا وپەرا» مەملەكەتتىك وپەرا جانە بالەت تەاترىندا جۇمىس ىستەيدى.
داستان كەنجالين.
دەرەك: egemen.kz
سۋرەت: رەنات ەلۋباەۆتىڭ facebook جانە vkontakte الەۋمەتتىك جەلىلەرىندەگى جەكە پاراقشالارىنان الىندى.