قارۋلى كۇشتەر جاۋىنگەرلىك ازىرلىككە كەلتىرىلدى (فوتو)

استانا. 11 قاڭتار. قازاقستان رەسپۋبليكاسى قارۋلى كۇشتەرى جاۋىنگەرلىك ازىرلىكتىڭ جوعارى دارەجەسىنە كەلتىرىلدى. بۇل تۋرالى egemen.kz ءتىلشىسى حابارلادى. وقۋ دابىلىنىڭ بەلگىسى بويىنشا قارۋلى كۇشتەردىڭ, اسكەر تەكتەرى مەن وڭىرلىك قولباسشىلىق اسكەرلەرىنىڭ بارلىق تۇرلەرى كوتەرىلدى. وتكىزىلەتىن ساباقتاردىڭ باستى ماقساتى بەلگىلەنگەن مەرزىمدە قويىلعان تاپسىرمالاردى ورىنداۋدا باسقارۋ ورگاندارى مەن جەكە قۇرامنىڭ ءىس-قيمىل ۇيلەسىمىن ارتتىرۋ. باس شتابتىڭ پارمەنى بويىنشا قۇرلىق اسكەرلەرىنىڭ توپتاماسى وقۋ-جاتتىعۋ ورتالىقتارى مەن پوليگونداردا وقۋ-جاۋىنگەرلىك تاپسىرمالاردى ورىنداۋعا كىرىستى. اۋە قورعانىسى كۇشتەرىنىڭ قۇرامىنان اۋەگە جاۋىنگەرلىك كەزەكشىلىكتى اتقاراتىن كۇشتەر مەن قۇرالدار كوتەرىلدى, ءارتۇرلى تيپتەگى اۆياتسيالىق تەحنيكا قوزعالتقىشتارىنىڭ ىسكە قوسىلۋى جۇزەگە اسىرىلدى, قوسالقى اۋەايلاقتار پايدالانۋعا دايىندالدى. كورابلگە قارسى, اۋەگە قارسى جانە سۋاستىعا قارسى ديۆەرسيالىق قورعانىس بويىنشا وقۋ تاپسىرمالارىن پىسىقتاۋ ءۇشىن تەڭىزگە اسكەري-تەڭىز كۇشتەرىنىڭ كورابلدەرى شىعارىلدى. قارۋلى كۇشتەردىڭ توپتاماسىن جالپى باسشىلىققا الۋ ستراتەگيالىق باسقارۋ ورتالىعىنان قورعانىس ءمينيسترىنىڭ ءبىرىنشى ورىنباسارى – قر قك باس شتابىنىڭ باستىعى گەنەرال-پولكوۆنيك ساكەن جاسۇزاقوۆپەن جۇزەگە اسىرىلادى. وتكەن جىلعى جەلتوقساننىڭ سوڭىندا قورعانىس مينيسترلىگىنىڭ باسشىلىق قۇرامىمەن كەزدەسۋدە ەلىمىز قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ اسكەري قىزمەتشىلەرگە  قارۋلى شيەلەنىستەردىڭ جاڭا ۇردىستەرى مەن ەرەكشەلىكتەرىن ەسكەرۋ, وسى جىلى ىسكە اسىرىلاتىن كاسىبي, جاۋىنگەرلىك جانە مورالدىق-پسيحولوگيالىق دايىندىقتى ارتتىرۋ جونىندە ۇدايى جۇمىس جۇرگىزۋ تاپسىرماسىن جۇكتەگەنىن ەستەرىڭىزگە سالا كەتەيىك. قارۋلى كۇشتەردىڭ جاۋىنگەرلىك دايارلىعىنىڭ دەڭگەيىن ساپالى ارتتىرۋ ءۇشىن 2015 جىلى 170-تەن اسا جوسپارلى تەكسەرىس وتكىزىلدى. ونىڭ ىشىندە, 71-ءى – قۇرلىق اسكەرلەرىندە, 17-ءسى اۋە قورعانىسى كۇشتەرىندە, بىرەۋىنە – اسكەري-تەڭىز كۇشتەرىندە, 85-ءى باسقالاردا. بيىلعى جىلى جاۋىنگەرلىك سايىستىڭ «ماڭگىلىك ەل» تۇعىرى – قۋاتتى ارميا!» اتتى جالىندى ۇرانىمەن كەنەتتەن جانە جوسپارلى تەكسەرىس ءىس جۇزىندە جالعاسىن تاۋىپ, ونىڭ قارقىندىلىعى كۇشەيتىلەدى. داستان كەنجالين. دەرەك, سۋرەت: قازاقستان رەسپۋبليكاسى قورعانىس مينيسترلىگى.