استانا. 7 قاڭتار. شۆەد كورولدىگى اكادەمياسىنىڭ ءارحيۆى ءوزىنىڭ قۇپيا ساقتاۋ ەرەجەسىنە سايكەس, 1965 جىلى نوبەل سىيلىعىنىڭ ادەبيەت سالاسى بويىنشا نومينانت بولعانداردىڭ كىمدەر ەكەنىن جاريالادى. بۇل تۋرالى Lenta.ru اقپارى نەگىزىندە egemen.kz ءتىلشىسى حابارلادى.
اكادەميا ءارحيۆىنىڭ قۇجاتتارى ولاردى فرانتسيادا تۇراتىن ورىس جازۋشىسى ۆلاديمير نابوكوۆ, چيلي اقىنى پابلو نەرۋدا جانە ارگەنتينالىق حورحە لۋيس بورحەس قۇراعانىن كورسەتىپ بەردى. بۇلاردىڭ اراسىنان تەك پابلو نەرۋدا عانا كەيىن, 1971 جىلى وسى سىيلىققا قول جەتكىزە الدى.
سىيلىق بەرۋ جونىندەگى تۇپكىلىكتى شەشىمدى شىعاراتىن اكادەميا ءوزىنىڭ ەرەجەسى نەگىزىندە نومينانت اتانعاندارىمەن, لاۋرەاتتتىققا قول جەتكىزە الماي قالعان قالامگەرلەردىڭ اتى-جوندەرىن 50 جىلعا دەيىن قۇپيا ۇستايدى. تەك وسىنشا ۋاقىت وتكەننەن كەيىن عانا تالاسقا تۇسكەن ۇمىتكەرلەردىڭ تولىق قۇرامىن جاريا ەتەدى. وسىلايشا بىزگە 1965 جىلعى كانديداتتار قاتارىندا, جوعارىدا اتالعانداردان بولەك, بريتانيالىقتار ۋيستەن حيۋ ودەن, لورەنس داررەل, لەسلي پوۋلز حارتلي, سوممەرسەت موەم جانە الان سيلليتوۋ تۇرعانى دا ەندى ءمالىم بولىپ جاتىر. بۇلاردىڭ اراسىنان بىردە-بىرەۋى نوبەل سىيلىعىن الا المادى. تەك سول جىلى نومينانت بولعان يرلاند جازۋشىسى, اقىنى, دراماتۋرگى سەميۋەل بەككەت كەيىنىرەك, 1969 جىلى ءبارىبىر سىيلىقتىڭ يەگەرى اتانادى.
كەڭەس جازۋشىسى ميحايل شولوحوۆ اتالمىش سىيلىقتى «تىنىق دون» تريلوگياسى ءۇشىن الدى. ونىڭ الدىندا, 1958 جىلى كەڭەستىك تاعى ءبىر قالامگەر – بوريس پاستەرناكقا وسى سىيلىق بەرىلگەن بولاتىن. بىراق جازۋشى كەڭەستىك يدەولوگيانىڭ قىسىمى سالدارىنان ودان رەسمي تۇردە باس تارتتى.
تالعات رايىمبەك.
دەرەك, فوتو: Lenta.ru.