قازاقستان رەسپۋبليكاسىنىڭ پرەزيدەنتى, ۇلت كوشباسشىسى نۇرسۇلتان نازارباەۆتىڭ «ۇلت جوسپارى – قازاقستاندىق ارمانعا باستايتىن جول» ماقالاسىن وقي وتىرىپ, مەن ءوزىمنىڭ باقىتتى ەلدە تۇرىپ جاتقانىمدى بارىنشا ءتۇسىنىپ, ايرىقشا تولقىنىس جەتەگىندە بولدىم.
قازاقستان جاستارىنىڭ وكىلى رەتىندە, تاۋەلسىز مەملەكەتپەن قاتار ءوسىپ, جاڭا قوعامنىڭ جەتىستىكتەرىنە كۋا بولعان قىز رەتىندە ءوزىمنىڭ موينىمداعى جاۋاپكەرشىلىك سالماعىن جەتە سەزىنەمىن جانە ءوزىمنىڭ قالامنىڭ, وبلىسىمنىڭ, تۇتاس ەلىمنىڭ گۇلدەنۋىنە ۇلەس قوسۋدى ارماندايمىن. وسىناۋ ابىرويلى پارىزدى ورىنداۋعا كۇش سالامىن ءارى زامانداستارىمدى ورتاق ىستە ءبىر ساپتا بولۋعا شاقىرامىن.
ءبىزدىڭ سۇيىكتى وتانىمىز سامعاۋ قادامدارىمەن جاھاندىق قۇرمەت نازارىندا تۇرعانىن ماقتان ەتەمىن. الەمدى ءسىلكىنىسكە سالعان ەكونوميكالىق داعدارىسقا, تابيعي اپاتتارعا, ەكسترەميستىك قيمىلدارعا, ۇرىس-جانجالدارعا قاراماستان ەلىمىز ۇنەمى العا باسۋدا. بىزدە مەكتەپتەر, بالا باقشالارى, زامانالىق كاسىپورىندار كوپتەپ اشىلۋدا. ەڭبەكاقى, ستۋدەنتتەردىڭ شاكىرتاقىسى ۇستەمەلەندى. ءبىز, جاستار ءبىلىم الۋ, سپورتپەن اينالىسۋ, باسقا دا شارالارعا قاتىسۋدىڭ شەكسىز مۇمكىندىگىنە يەمىز. سونداي-اق, رەسپۋبليكامىزدا جاستار مۇددەسىن كوزدەيتىن «ديپلوممەن – اۋىلعا!», «جۇمىسپەن قامتۋدىڭ جول كارتاسى», «بيزنەستىڭ جول كارتاسى» سياقتى كوپتەگەن مەملەكەتتىك باعدارلامالار جۇمىس ىستەيدى.
ءبىز وسى ءۇشىن قازاقستانىمىز بەن پرەزيدەنتىمىزدى ماقتان ەتەمىز. ويتكەنى, ەلباسى وراسان زور وتانىمىزدىڭ بەيبىت ءومىرىن قامتاماسىز ەتىپ, كوپ ۇلتتى شاڭىراعىمىزدىڭ شىرايىن اشا تۇسۋدە ولشەۋسىز ەڭبەك ەتىپ, كورەگەندىك ساياساتىنان ەشقاشان تايعان ەمەس. مەن ەلباسىمىزدى تولىق قولدايمىن جانە زامانداستارىمدى ۇلت جوسپارىن, وندا كورسەتىلگەن ماڭىزدى رەفورمالاردى بىرلەسە جۇزەگە اسىرۋعا, سونداي-اق, الدىمىزدان اشىلعالى تۇرعان مۇمكىندىكتەردى ءتيىمدى پايدالانۋعا ۇندەيمىن. وتكەن, 2015 جىلى ءبىز ەلەۋلى مەرەكەلەردى بيىك دەڭگەيدە اتاپ وتتىك. ال, 2016 جىل – «قازاقستان تاۋەلسىزدىگىنىڭ 25 جىلدىعى» ۇرانىمەن ۇلاعاتتى ىستەرگە جول باستاپ وتىر. قازاقستان جاستارى بۇل ورايدا دا جارقىن باستامالارىمەن ەل ماقتانىشىنا اينالاتىنىنا سەنەمىن.
ەلباسىنىڭ ماقالاسىندا قازاقستان دامۋىنىڭ نەگىزگى باعىتتارى ايقىندالا كورسەتىلدى جانە ولاردىڭ بارلىعى حالقىمىزعا قىزمەت جاسايتىن بولادى. سوندىقتان, وسىناۋ جالپىحالىقتىق ورتاق مىندەتتى ورىنداۋعا ەكپىندى ءۇن قوسۋ جاستاردىڭ اسىل بورىشى دەپ سانايمىن. ءبىزدىڭ ارقايسىمىز ماقسات جولىنداعى 100 ناقتى قادامدى باستاۋ ارقىلى ەلىمىزدىڭ قۋاتتانۋىنا قاراي 100 قادام جاسايتىنىمىز ايقىن!
گ ۇلىم بەگالينا,
كوكشەتاۋ قالالىق جاستار
رەسۋرسى ورتالىعىنىڭ ديرەكتورى.
اقمولا وبلىسى.