ورال. 6 قاڭتار. باتىس قازاقستان وبلىسىنىڭ ورتالىعى – ورال قالاسىندا اقىن, وسى ءوڭىردىڭ تۋماسى قادىر مىرزا ءالىنىڭ تۋعان كۇنى اتالىپ ءوتىلدى. بۇل تۋرالى egemen.kz ءتىلشىسى حابارلادى.
اقىن اتىنداعى مادەنيەت جانە ونەر ورتالىعىندا «سۇلۋ ءسوزدىڭ سايگ ۇلىگى» اتتى قادىر وقۋلارى ءوتىپ, جاس ورەندەر ءوز ونەرلەرىن كورسەتتى. سونداي-اق, اقىن مۋزەيىندە ونىڭ زامانداستارى باس قوسىپ, ەستەلىكتەر ايتتى.
ءوز سوزىندە اقىن, قازاقستان جازۋشىلار وداعى وبلىستىق بولىمشەسىنىڭ ءتورايىمى اقۇشتاپ باقتىگەرەەۆا قادىر مىرزا ءالىنىڭ ۇلت تاريحىنان ويىپ تۇرىپ ورىن العانىن ايتتى. «قازاقتىڭ بىرەگەي اقىنى ارامىزدان كەتسە دە, وعان دەگەن ىقىلاس, ونىڭ ەڭبەگىنە دەگەن قىزىعۋشىلىق ەشقاشان سۋىمايدى. بۇگىنگى ءوتىپ جاتقان شارالار سونىڭ دالەلى», – دەدى اقجايىقتىڭ اقىن قىزى.
سونىمەن قاتار, اقىننىڭ شىعارماشىلىعىنا ارنالعان «قازىنالى قادىر الەمى» اتتى كونتسەرت وتكىزىلدى. بۇل شارا بارىسىندا قالامگەردىڭ ەڭبەكتەرىن ناسيحاتتاۋدا بەلسەندىلىك تانىتقاندار قادىر مىرزا ءالى اتىنداعى مەدالمەن ماراپاتتالدى. ودان بولەك, وسى جيىندا قادىر وقۋلارىنىڭ جەڭىمپازى مەن جۇلدەگەرلەرىنە العىس حاتتار تابىس ەتىلىپ, اقىننىڭ ومىرىنە ارنالعان «ولەڭنىڭ تۋىن جىقپاعان» اتتى دەرەكتى ءفيلمنىڭ تۇساۋى كەسىلدى.
جىر سۇلەيىنىڭ 80 جىلدىعىنا ارنالعان رەسپۋبليكالىق مۇشايراعا قاتىسقان جاس اقىنداردىڭ ولەڭدەر جيناعى دا وسى كەشتە كوپشىلىككە تانىستىرىلدى.
مۋزەيدەگى شارا «اقىنعا اق پەيىلمەن...» اتتى كورمەگە ۇلاستى.
تەمىر قۇسايىن.
دەرەك: egemen.kz.
سۋرەت: inform.kz.