ەۋرازيالىق توپ كاسiپورىندارىنىڭ جۇمىسشىلارى اراسىنداعى «التىن قور-2015» العاشقى كاسىبي شەبەرلiك بايقاۋى سوكولوۆ-سارىباي كەن وندىرىستىك ءبىرلەستىگىندە جەتى اتالىم بويىنشا ءوتتى. بايقاۋعا ەلىمىزدىڭ ءار ايماعىنداعى «قازاقستان اليۋمينيى» اق, «قازاقستان ەلەكتروليز زاۋىتى», «ەۋرازيالىق ەنەرگەتيكالىق كورپوراتسيا», «قازحروم» ۇك» اق-قا قاراستى اقسۋ جانە اقتوبە فەرروقورىتپا زاۋىتتارى, «شۇباركولكومىر, «ترانسرەمۆاگون» جشس, «سسكوب» اق سىندى كاسىپورىندار جۇمىسشىلارى قاتىستى. جۇمىسشىلار كاسىبي ءبىلىمى مەن ءبىلىكتىلىكتەرى بويىنشا باق سىناستى.
بايقاۋدا كوپىرلى كران ماشينيستەرى, ەلەكتر-گازبەن دانەكەرلەۋشىلەر, ەلەكترسلەسارلارى, تەمىر جونۋشىلار, ەكسكاۆاتور, بۋلدوزەر مەن اۋىر جۇك كولىكتەرى ماشينيستەرى – بارلىعى 40 جۇمىسشى ءوز ماماندىقتارى بويىنشا شەبەرلىكتەرىن كورسەتىپ, بىلىمدەرىن ساراپقا سالدى.
قاتىسۋشىلاردىڭ بارلىعى جىل بويى وزدەرى جۇمىس ىستەيتىن كاسىپورىنداردا ىرىكتەۋ كەزەڭىنەن وتكەن جۇيرىكتەر.
بايقاۋ ەكى كەزەڭنەن – تەوريالىق ءبىلىمدى تەكسەرۋ مەن بىلىكتىلىك سىناۋدان تۇردى. قاتىسۋشىلارعا ۇسىنىلعان ءاربىر تاپسىرما جيناقىلىق, كاسىبيلىك پەن جاۋاپكەرشىلىكتى تالاپ ەتتى.
اقتوبە فەرروقورىتپا زاۋىتى مەحانيكالىق-جوندەۋ تسەحىنىڭ تەمىردەن ءتۇيىن تۇيگەن 6 دارەجەلى تەمىر جونۋشىسى سەرىك نيازعۇلوۆ ەكى تاپسىرما بويىنشا دا ءبىلىمى مەن بىلىكتىلىگىن كورسەتىپ, «ۇزدىك توكار» اتالىمىندا ءبىرىنشى ورىنعا قول جەتكىزدى. ونىڭ وندىرىستەگى 18 جىلدىق ءىس-تاجىريبەسى, كورگەنى مەن ومىردەن تۇيگەنى جەڭىسكە جەتەلەدى. تسەح ۇجىمىنىڭ ماقتانىشىنا اينالعان سەرىك نيازعۇلوۆ ءوزىنىڭ ىسكەرلىلىگىنىڭ ارقاسىندا بىرنەشە رەت ءتۇرلى ەڭبەك جارىستارىنا قاتىسىپ, جۇلدەلى ورىنداردان كورىنىپ جۇرگەن اعا بۋىن وكىلى. تەك بىلتىرعى جىلى زاۋىت كولەمىندە وتكەن تسەحارالىق «ماماندىعى بويىنشا ۇزدىك جۇمىسشى» بايقاۋىنا قاتىسىپ ءبىرىنشى ورىندى يەلەنىپ «قازحروم»تۇك» اق-نىڭ سايىسىنا جولدامانى جەڭىپ العان بولاتىن. «قازحرومنىڭ» فيليالدارى اراسىندا وتكەن «ۇزدىك جۇمىسشى» بايقاۋىندا زاۋىتتىڭ نامىسىن قورعاعان ەدى. كاسىبي توكار بۇل سايىستا دا شاشاسىنا شاڭ جۇقتىرمااي, باس جۇلدەگە يە بولعان ەدى. ەندى مىنە, ەۋرازيالىق توپتىڭ اراسىندا وتكەن بايقاۋدا دا وسى جەڭىستەرىن تاعى دا قايتالادى.
– ەۋرازيالىق توپتا جۇمىسشى ماماندار ءاردايىم باستى نازاردا ۇستالادى. قاراپايىم جۇمىسشى مامانداردىڭ مارتەبەسىن كوتەرىپ, جاس جۇمىسشىلارعا وندىرىستەن ۇيرەنىپ, بىلگەندەرىمىزدى ۇيرەتۋ ءۇشىن وسىنداي بايقاۋ كەرەك-اق. وسىنداي بايقاۋلار ءبىزدىڭ كاسىپورىندا دا ءجيى وتكىزىلەدى. قازىرگى قارجى داعدارىسىنا قاراماستان, وسىنداي اۋقىمدى ءىس-شارانى ۇيىمداستىرىپ, جۇمىسشى ماماندارعا كوڭىل ءبولىپ, مارتەبەسىن كوتەرگەنى ءۇشىن ۇيىمداستىرۋشىلارعا ريزاشىلىعىمدى بىلدىرەمىن. بۇل شارا تاجىريبە الماسۋ ءۇشىن اسا ماڭىزدى ءارى جۇمىسشىلاردىڭ كاسىبي بىلىكتىلىگىن ارتتىرۋعا جاعداي جاسايدى, شەبەرلىك شىڭدايتىن ۇلكەن مەكتەپ ىسپەتتەس, – دەيدى سەرىك نيازعۇلوۆ.
جەڭىمپازدارعا ءبىرىنشى ورىن ءۇشىن 500 مىڭ تەڭگە, ەكىنشى ورىنعا – 300 مىڭ, ءۇشىنشى ورىن يەسىنە 200 مىڭ تەڭگە كولەمىندە قارجىلاي سىيلىق ۇسىنىلدى. ءار نوميناتسيا بويىنشا ءبىرىنشى ورىنعا يە بولعاندار استانا قالاسىندا وتەتىن قورىتىندى سالتاناتتى ءىس-شارا كەزىندە ماراپاتتالاتىن بولادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.