استانا. 5 قاڭتار. الماتىدا, ىلە تراكتىنىڭ بويىندا, «جۇلدىز» شاعىن اۋدانىنا جاقىن جەردە جول-كولىك وقيعاسى ورىن الدى. سالدارىنان 1 قىز بالا قازا تاۋىپ, 4 جولاۋشى جاراقات الدى. بۇل تۋرالى ras.kz حابارلادى.
اپاتقا الماتىنىڭ وسى اۋماعىندا جاۋىپ جاتقان جاڭبىردان كەيىن جولدىڭ تايعاناق قالىپقا كەلۋى سەبەپكەرلىك ەتكەن.
«جول بويىندا Toyota Camry كولىگىنىڭ جۇرگىزۋشىسى الدىنداعى كاماز-دان وزىپ كەتپەكشى بولادى. بىراق ايداۋشى تىزگىنگە يە بولا الماي, تراسسانىڭ قارسى باعىتى جاعىنا شىعىپ كەتەدى. سول كەزدە ول وسى جولدىڭ بويىمەن كەلە جاتقان Toyota Vista اۆتوموبيلىمەن بەتپە-بەت سوقتىعىسادى», دەلىنگەن حابارلامادا.
ناتيجەسىندە Toyota Camry ماشيناسىنىڭ كابيناسىندا وتىرعان جولاۋشى قىز وقيعا بولعان جەردە بىردەن قازا تاپتى. كولىكتىڭ جاپىرىلىپ كەتكەن سالونىنان جولاۋشىلاردىڭ ءبارىن قۇتقارۋشىلار شىعارادى. تاعى ءتورت جولاۋشى اۋرۋحاناعا جاتقىزىلادى.
سوقتىعىسقاننان بىرنەشە سەكۋند كەيىن كولىك جانا باستايدى. ونى كورۋشىلەر ءورت ءسوندىرۋ قىزمەتى كەلگەنشە وتتى وزدەرى ءسوندىرىپ, زارداپ شەككەندەرگە كومەكتەسەدى.
تالعات رايىمبەك.
دەرەك, سۋرەت: ras.kz.