اتىراۋدا شىعارىلادى
بۇل – اتىراۋدا بۇرىن-سوڭدى بولماعان ەرەكشە جوبا. ءدارى-دارمەك ونىمدەرىن شىعاراتىن فارماتسەۆتيكالىق زاۋىت جوباسىن ىسكە اسىرۋعا «Lumpan Caspian Pharmaceutical LLP» سەرىكتەستىگى باستاماشى بولىپتى. سونىمەن قاتار, وعان اتىراۋداعى «مەديتسينا» اق, «اتىراۋ» اكك جانە «ساۆا حەلسكەير», «لايفلاين فزە», «ALIM COM» كومپانيالارى قاتىسىپ وتىر. اتالعان زاۋىتتىڭ جوبالىق قۇنى 3,700 ميلليون تەڭگەنى قۇرايدى.
مۇنىڭ ەرەكشەلىگى سول, جوبا تەك اتىراۋدىڭ عانا ەمەس, ەل تۇرعىندارىن ساپالى ءدارى-دارمەكپەن قامتۋعا سەرپىن بەرگەلى وتىر. مۇندا 180 ادام تۇراقتى جۇمىسپەن قامتىلماق ەكەن. زاۋىتتا جىلىنا 800 ميلليون تابلەتكا, 300 ميلليون كاپسۋلا مەن 78 ميلليون امپۋلا تۇرىندەگى ءدارى, 3 ميلليون قوراپتاعى جاقپا ماي, 12 ميلليون پلاستيكا قۇتىداعى ەرىتىندى سەكىلدى 50-دەن استام فارماتسەۆتيكالىق ءونىم تۇرلەرىن شىعارۋ كوزدەلىپ وتىر. ساپالى ءونىم شىعارۋعا قاجەتتى شيكىزاتتى ءۇندىستان مەن قىتايدان اكەلۋ جوسپارى بار. زاۋىتتا ەكولوگيالىق تازا ءارى ساپالى ءونىم G.M.P. ستاندارتىمەن شىعارىلادى. «بۇل زاۋىتتا پايدالانىلاتىن سۋ مولشەرىن 126 مىڭ تەكشە مەترگە دەيىن ۇنەمدەۋگە جول اشادى», دەيدى «مەديتسينا» اق ديرەكتورى زابيرا داۋلەتجانوۆا.
– فارماتسەۆتيكالىق زاۋىتتىڭ قۇرىلىسى قازاقستاننىڭ ۇدەمەلى يندۋستريالىق-يننوۆاتسيالىق دامۋىنىڭ ەكىنشى بەسجىلدىعىن ىسكە اسىرۋدا جانە الەمنىڭ ءباسەكەگە قابىلەتتى 30 ەلىنىڭ قاتارىنا كىرۋى ءۇشىن جاسالىنعان ماڭىزدى قادام, – دەگەن ويىمەن ءبولىستى وبلىس اكىمى باقتىقوجا ىزمۇحامبەتوۆ. – اتالعان ءىس-شارا ەلىمىزگە وزىق وندىرىستىك تەحنولوگيالاردى تارتۋعا باعىتتالعان ەكونوميكالىق ساياساتتىڭ باسىمدىقتارىمەن تىكەلەي بايلانىستى. فارماتسەۆتيكا سالاسى دا سول باسىم باعىتتاردىڭ بىرىنەن سانالادى.
جولداسبەك شوپەعۇل,
«ەگەمەن قازاقستان».
اتىراۋ.