قاراعاندىدا سالىناتىن سپورتتىق عيماراتقا گولوۆكيننىڭ ەسىمى بەرىلمەكشى
ارقا جۇرتى اتاقتى گەننادي گولوۆكيندى «مايقۇدىقتىڭ مۇزبالاعى» دەپ اسپەتتەيدى, الاقانىنا سالىپ, كوككە كوتەرەدى. ءيا, قازاقتىڭ اتىن ايداي الەمگە جايىپ جۇرگەن ايگىلى بوكسشى قاراعاندىنىڭ ىرگەسىندە جاتقان وسى ءبىر ەلدى مەكەندە كىر جۋىپ, كىندىك كەسكەن.
زادى, مايقۇدىقتىڭ اتاعى ءور كەۋدە, مىنەزى كەسەك ۇلدارىمەن شىققان. راس, اراسىندا از-ماز تەنتەكتىگى بولعان شىعار... ايتسە دە ءبورى تەكتەس ورەندەرىنىڭ ءومىردىڭ ءار سالاسىندا, اسىرەسە, سپورتتا بويعا بىتكەن بۇلا كۇش, قايسار رۋحتىڭ ارقاسىندا بۇزىپ-جارىپ جول سالىپ, ابىروي-بەدەلگە بولەنىپ جۇرگەنى راس. مايقۇدىقتىڭ سونداي ساڭلاق ۇلدارىنىڭ ءبىرى, ءسوز جوق بۇگىنگى كۇندە الەمدىك بوكستىڭ «GGG» تانىمال تاڭبالى ترەندى بولعان – گەننادي گولوۆكين. اۋەسقويلار اراسىندا الەم چەمپيونى, افينى-2004 وليمپياداسىنىڭ كۇمىس جۇلدەگەرى, كاسىپقوي بوكستا WBA (Super), IBO جانە WBC (Interim) تۇجىرىمدارى بويىنشا الەم چەمپيونى وسى ەلدى مەكەندەگى №14 شاعىن اۋداندا قاراپايىم كەنشىنىڭ وتباسىندا دۇنيەگە كەلگەن. بولاشاق چەمپيوننىڭ بالالىق شاعى دا وسى جەردە ءوتتى. وسىنداعى №65 ورتا مەكتەپتە وقىعان. اۋدانداعى «فازانكانىڭ» سپورت زالىندا بوكس دەگەن ونەرمەن العاش قاۋىشقان...
قاراعاندى حالقى مايقۇدىقتان تۇلەپ ۇشقان مۇزبالاعىمەن ورىندى ماقتانادى. ماقتانىپ قانا قويماي, چەمپيونعا لايىقتى دەڭگەيدە سىي-قۇرمەت كورسەتۋگە كەلگەندە دە جولدان جىعىلعان ەمەس. ءسوزىمىز جالاڭ بولماس ءۇشىن, مىنا مىسالدى كەلتىرسەك تە جەتكىلىكتى. بيىل قالا اكىمدىگى گەننادي گولوۆكين تۋىپ-وسكەن مايقۇدىقتىڭ وسى 14-ءشى شاعىن اۋدانىندا دەنەشىنىقتىرۋ-ساۋىقتىرۋ كەشەنىن سالۋعا شەشىم قابىلدادى. اماندىق بولسا, 2016 جىلدىڭ سوڭىنا تامان پايدالانۋعا بەرىلمەكشى بۇل كەشەندى گولوۆكيننىڭ ەسىمىمەن اتاۋ ويدا بار. بۇگىنگى كۇندە اكىمدىك بۇل ماسەلەنىڭ جاي-جاپسارىن قاراستىرىپ جاتىر. ياعني, بۇل ايتىلعان يگى يدەيالار جۇزەگە اسسا, كەزىندە بولاشاق چەمپيون ءوزى قۇرالپى بالالارمەن دوپ قۋىپ, بوكس الەمىنە العاش قادام باسقان شاعىن اۋداندا وڭىردە تەڭدەسى جوق سپورتتىق كەشەن بوي كوتەرمەك.
جالپى, قازىرگى تاڭداعى قالىپتاسقان قيىن جاعدايعا قاراماستان, مۇنداي بىرەگەي جوبانى ىسكە اسىرۋ – بەلگىلى ءبىر دارەجەدە تاۋەكەلدى تالاپ ەتەتىن دۇنيە. ونىڭ ۇستىنە, وبلىستىق اكىمدىكتىڭ شەشىمىمەن كەلەسى جىلعا جوسپارلانعان قۇرىلىس بىتكەننىڭ توقتاتىلا تۇراتىنىن ەسكە الساق, بۇل عيماراتتىڭ ءبۇگىنگى كۇننىڭ شىندىعىنان قاراعانداعى ءمان-ماڭىزى ارتا تۇسەدى.
الەم چەمپيونىنىڭ ەسىمىمەن اتالماقشى بولاشاق دەنەشىنىقتىرۋ-ساۋىقتىرۋ كەشەنىنىڭ ىشىندە 25 مەترلىك ءتورت جولاقتى ءجۇزۋ باسسەينى بولادى. سونىمەن قاتار, 140 ادام ەمىن-ەركىن سىيىپ كەتەتىن تريبۋناسى بار ويىن زالى, اۋىر اتلەتتەرگە ارنالعان جانە بوكسشىلار جاتتىعاتىن زالدار دا جوبا جوسپارىنان ويىپ ورىن العان. سپورت كەشەنىنىڭ ءىشى وسىنداي بولعاندا, سىرتى دا كوز سۇيسىنتەتىندەي سۇلۋ سىمباتقا يە بولماق. عيماراتتىڭ اتشاپتىرىم اۋماعىندا سپورتتىق ويىندارعا ارنالعان اشىق الاڭقايلار, جاساندى توسەنىشى بار فۋتبول الاڭى جانە دە 140 اۆتوكولىككە ارنالعان تۇراق سالىنادى.
قاراعاندى قالاسىنىڭ باسشىلىعى ايتقانداي, بۇل سپورتتىق عيمارات زاماناۋي ساپا تالاپتارىنىڭ بارىنە جاۋاپ بەرە الاتىن كەشەن بولماق. ونىڭ سىرتقى كەلبەتى ارحيتەكتۋرالىق ورگاندارمەن كەلىسىلگەن. ىشىندەگى سپورت جابدىقتارى دا بۇگىنگى كۇننىڭ سۇرانىسىن وتەيتىن دەڭگەيدە بولاتىنى بەلگىلى.
ءسوز جوق, مايقۇدىقتىڭ قاجەتىن اشىپ, اجارىن سۇلۋلاندىرا تۇسەتىن كەلەشەك دەنەشىنىقتىرۋ-ساۋىقتىرۋ كەشەنىنىڭ الەۋمەتتىك ماڭىزىن اۋىزبەن ايتىپ جەتكىزۋ قيىن. نەگە دەسەڭىز, ءدال وسى شاعىن اۋدان تۇرماق, بۇكىل مايقۇدىقتىڭ وزىندە مۇنداي كەشەن اتىمەن بولعان ەمەس.
قازاقتا «التىن شىققان جەردى بەلدەن قاز» دەگەن ءسوز بار. گولوۆكيندەي بوكستاعى عاجاپ قۇبىلىس تۇلەگەن توپىراقتا مۇنداي بولاشاق چەمپيونداردىڭ ۇياسى بولاتىن عيماراتتىڭ بوي كوتەرۋى – زاڭدىلىق!
قايرات ءابىلدينوۆ,
«ەگەمەن قازاقستان».
قاراعاندى.