كەشە ەقىۇ تۇراقتى كەڭەسىنىڭ ماجىلىسىنە قازاقستاندىق توراعالىقتىڭ شاقىرۋىمەن امەريكا مەملەكەتتەرى ۇيىمىنىڭ باس حاتشىسى (امۇ) حوسە ميگەل ينسۋلسا كەلىپ, ءسوز سويلەدى.
ءوزىنىڭ سوزىندە ول ەكى وڭىرلىك ۇيىم اراسىنداعى ىنتىماقتاستىقتى نىعايتۋدىڭ ماڭىزىن اتاپ كورسەتتى. بۇل قادام ورتاق ماقساتتارعا نەگىزدەلگەن قاۋىپسىزدىك پروبلەمالارىنا قارسى ءىس-قيمىلداردى ىزدەستىرۋدە پايدالى بولماق.
ء“بىزدىڭ ۇيىمدارىمىز دەموكراتيانى دامىتۋ مەن زاڭ ۇستەمدىگىن قامتاماسىز ەتۋ, ادام قۇقىقتارىن قورعاۋدى ىلگەرى جىلجىتۋ, سونداي-اق پىكىر بوستاندىعى مەن باق ەركىندىگى ماسەلەلەرى سياقتى ءبىرقاتار مىندەتتەر بويىنشا ورتاق كوزقاراسقا يە, – دەدى ح.ينسۋلسا. – ەقىۇ مەن امۇ نەگىزگى ماقساتى تۇرعىندارىمىزدىڭ قاۋىپسىزدىگىن قامتاماسىز ەتۋمەن بايلانىستى ءماسەلەلەردىڭ كەڭ اۋقىمىن قاراستىرادى”.
ءوزىنىڭ سوزىندە ح.ينسۋلسا ەكى ۇيىم ءوزارا ۇنقاتىسۋ جاسايتىن جانە تاجىريبە الماساتىن, اتاپ ايتقاندا, تەرروريزممەن كۇرەس, پىكىر بوستاندىعىن ءبىلدىرۋ, سايلاۋلاردى باقىلاۋ, سونداي-اق جانجالداردىڭ الدىن الۋ مەن رەتتەۋ بويىنشا جاقسى بايلانىستا ەكەنىن قاپەرگە سالدى. اتالعان سالا – ەقىۇ مەن امۇ سەكىلدى وڭىرلىك ۇيىمدار بۇۇ-عا ىقپال ەتۋدە شەشۋشى ءرول اتقاراتىن سالا ەكەندىگىن كولدەنەڭ تارتا كەلىپ, بۇل ۇيىمداردى الماستىراتىن بالاما جوق ەكەنىن اتاپ كورسەتتى.
امۇ باس حاتشىسى ەقىۇ تۇراقتى كەڭەسىنىڭ ماجىلىسىندە ۇيىمنىڭ تاريحىندا تۇڭعىش رەت ءسوز سويلەدى. “بۇل بىزدەردىڭ وڭىرارالىق ىنتىماقتاستىققا مۇددەلى ەكەندىگىمىزدى بىلدىرەدى”, – دەدى ح.ينسۋلسا.
ء“بىز تۇراقتى ىنتىماقتاستىعىمىزدى, ونىڭ ىشىندە ۇيىمدارىمىزدىڭ اراسىنداعى تەرروريزم, ەسىرتكى ترافيگى جانە ۇيىمداسقان قىلمىس, سونداي-اق ادام ساۋداسى سياقتى ورتاق پروبلەمالارعا قاتىستى بايلانىستارىمىزدى نىعايتا ءتۇسۋدى جالعاستىرۋعا ءتيىسپىز. ءبىز بۇرىنعىسىنشا دەموكراتيالىق سايلاۋ ۇدەرىستەرىنىڭ تۇتاستىعىن ناقتى كەپىلدەندىرىپ, سونىمەن قاتار, ءسوز بوستاندىعى مەن ءبىزدىڭ ازاماتتارىمىزدىڭ قۇقىقتارىن قورعاۋعا ءتيىسپىز. بۇل قاشاندا جانە قاي كەزدە دە مۇددەلەرىن قورعاۋعا ۇمتىلىپ وتىرعان دەموكراتيالىق ينستيتۋتتاردىڭ نىعايۋىنا وڭ ىقپال ەتەتىن بولادى. ويتكەنى, اتالعان ماسەلەلەر نەگىزى ءبىز سونشالىقتى قاستەر تۇتاتىن ورتاق قۇندىلىقتارىمىزدا جاتىر”.
امەريكا مەملەكەتتەرىنىڭ ۇيىمى قۇرامىنا سولتۇستىك جانە وڭتۇستىك امەريكانىڭ 35 مەملەكەتى كىرەدى جانە الەمدەگى اسا بايىرعى وڭىرلىك ۇيىم بولىپ تابىلادى. ونىڭ تاريحى 1890 جىلعى پانامەريكالىق وداقتان باستاۋ السا, ول 1948 جىلى امۇ بولىپ قايتا قۇرىلعان بولاتىن. امەريكا قۇراما شتاتتارى مەن كانادا ەقىۇ-مەن قاتار, امۇ-عا دا مۇشە مەملەكەتتەر بولىپ تابىلادى. ال ەقىۇ-عا مۇشە باسقا كوپتەگەن ەلدەر امەريكا مەملەكەتتەرى ۇيىمى جانىنداعى تۇراقتى بايقاۋشىلار ءمارتەبەسىنە يە.
تۇراقتى كەڭەس ەقىۇ-نىڭ شەشىم قابىلدايتىن نەگىزگى ورگاندارىنىڭ ءبىرى بولىپ تابىلادى. ول اۋستريانىڭ استاناسى – ۆەنا قالاسىندا اپتا سايىن شاقىرىلىپ, وندا ەقىۇ جاۋاپكەرشىلىگى ايماعىنداعى وقيعالار تالقىلانادى جانە ولار بويىنشا ءتيىستى شەشىمدەر قابىلدانادى.
تالعات جۇماعۇلوۆ, “ەگەمەن قازاقستان” – ۆەنادان.