قازاقتىڭ ءداستۇرلى ويۋ-ورنەگى يسلام الەمىنىڭ مادەني قازىناسى رەتىندە حالىقارالىق دەڭگەيدە مويىندالدى. 11 اقپاندا وتكەن يسەسكو يسلام الەمى مۇرالارى كوميتەتىنىڭ 13-سەسسياسىندا ۇلتتىق ويۋ-ورنەكتى بەدەلدى تىزىمگە ەنگىزۋ تۋرالى شەشىم قابىلداندى. قۋانىشتى حاباردى مەملەكەتتىك كەڭەسشى ەرلان قارين سۇيىنشىلەدى, دەپ جازادى Egemen.kz.
«ويۋ-ورنەك مادەني بىرەگەيلىگىمىز بەن تاريحي ساباقتاستىعىمىزدى نىعايتۋعا ىقپال ەتەتىن نەگىزگى ەتنومادەني كود. ونىڭ يسەسكو-نىڭ بەدەلدى تىزىمىنە ەنۋى قازاقستاننىڭ ماتەريالدىق ەمەس مادەني مۇراسىن حالىقارالىق دەڭگەيدە ىلگەرىلەتۋدەگى ماڭىزدى قادام سانالادى», دەدى ەرلان قارين.
ايتا كەتەيىك, بۇعان دەيىن 2023 جىلى يسەسكو تىزىمىنە تۇركى وركەنيەتىنىڭ باستى نىشاندارىنىڭ بىرىنە اينالعان ءداستۇرلى «توعىزقۇمالاق» ويىنى ەنگىزىلگەن ەدى. بۇل ءۇردىس قازاقستاننىڭ باي رۋحاني مۇراسىن الەمگە تانىتۋداعى جۇيەلى جۇمىستىڭ جالعاسى ەكەنىن اڭعارتادى.
ەرلان قارين: كيىز ءۇي ءداستۇرىنىڭ يۋنەسكو تىزىمىندە كەڭەيۋى ورتالىق ازيا مۇراسىنىڭ ورتاق ەكەنىن ايعاقتايدى
پرەزيدەنتتىڭ ۇلتتىق قۇرىلتاي وتىرىستارىندا بەرگەن تاپسىرمالارىنا سايكەس, ەلىمىزدىڭ مادەني مۇرا نىساندارىن يۋنەسكو جانە يسەسكو تىزىمدەرىنە ەنگىزۋ باعىتىنداعى جۇمىس الداعى ۋاقىتتا دا جالعاسادى.