10 قىركۇيەكتە الماتىدا شانحاي ىنتىماقتاستىق ۇيىمىنا مۇشە مەملەكەتتەر قارۋلى كۇشتەرى باس شتابتارى باستىقتارىنىڭ قاتىسۋىمەن اسكەري-ساياسي كەڭەس بولىپ وتكەنى بەلگىلى. وسى جيىندا جاتتىعۋ شەڭبەرىندەگى لاڭكەستىككە قارسى وپەراتسيالاردى ورىنداۋ تۋرالى باس شتاب باستىقتارى قول قويعان بىرلەسكەن جەدەل ديرەكتيۆا جاتتىعۋ جەتەكشىلەرىنە تاپسىرىلعان بولاتىن.
وسىعان بايلانىستى كەشە “ماتىبۇلاق” اسكەري پوليگونىنداعى دالالىق لاگەردە “بەيبىت ميسسيا-2010” دەپ اتالاتىن لاڭكەستىككە قارسى بىرلەسكەن اسكەري وقۋ-جاتتىعۋى باستالدى. ونىڭ اشىلۋ راسىمىندە ۇيىمعا كىرەتىن قازاقستان, قىتاي, رەسەي, تاجىكستان جانە قىرعىزستاننىڭ ءۇش مىڭنان استام ادامدى قۇرايتىن اسكەري بولىمشەلەرى تولىقتاي ساپ تۇزەدى. ءسويتىپ مۇنداعى ءاسكەري ويىندارعا قاتىساتىن جەكە قۇرام مەن تەحنيكالار لەگى قازاقستانعا تولىقتاي كەلىپ ءبىتتى. ولار الداعى ەكى اپتا بويى وتەتىن ازىرلىكتەرگە ساقاداي-ساي تۇر.
“بەيبىت ميسسيا-2010” ءبىرلەسكەن اسكەري وقۋ-جاتتىعۋلارىن قازاقستان رەسپۋبليكاسى قورعانىس مينيسترلىگى شتابتار باستىقتارى كوميتەتى توراعاسىنىڭ ءبىرىنشى ورىنباسارى گەنەرال-مايور مۇقان دۇيسەكەەۆ اشتى. ول ءوز سوزىندە ءبىزدىڭ ەلىمىزدە ءوتكىزىلىپ وتىرعان وسىنداي كەڭ كولەمدەگى جاتتىعۋلاردىڭ شانحاي ىنتىماقتاستىق ۇيىمىنا مۇشە مەملەكەتتەر ءۇشىن ۇلكەن ماڭىزعا يە ەكەنىن اتاپ ءوتتى.
بۇدان كەيىن اسكەري قىزمەتشىلەردى قىتاي حالىقتىق ازات ەتۋ ارمياسى باس شتابى باستىعىنىڭ ورىنباسارى گەنەرال-پولكوۆنيك ما سياو تيان, قىرعىزستان قارۋلى كۇشتەرى باس شتابىنىڭ ءبولىم باستىعى پولكوۆنيك مەيىربەك يماەۆ, رەسەي فەدەراتسياسى قارۋلى كۇشتەرى قۇرلىق اسكەرلەرى جاۋىنگەرلىك دايىندىق باسقارماسىنىڭ باستىعى گەنەرال-مايور يۋري پەتروۆ, تاجىكستان رەسپۋبليكاسى قارۋلى كۇشتەرى باس شتابى باس جەدەل باسقارماسىنىڭ باستىعى گەنەرال-مايور زاريف بوبوكالونوۆ قۇتتىقتادى.
وسى سارسەنبىدەن باستاپ اسكەري قىزمەتشىلەر دايىندىققا بەل شەشە كىرىسپەك. شارا شەڭبەرىندە 24 قىركۇيەك كۇنى وتەتىن وقۋ-جاتتىعۋدىڭ شەشۋشى كەزەڭىنە دەيىن بىرلەسكەن جاتتىعۋلاردىڭ تورتەۋىن وتكىزۋ كوزدەلىپ وتىر.
مۇحاربەك ماحامبەت, مايور.
جامبىل وبلىسى,
وتار ستانساسى,
ماتىبۇلاق اسكەري پوليگونى.