جۋىردا قۇقىق قورعاۋ ورگاندارىنىڭ بولاشاق وفيتسەرلەرىنىڭ قاتارى “قارجى پوليتسياسىنىڭ قاتارداعى قىزمەتكەرى” اتاعى بەرىلگەن قارجى پوليتسياسى اكادەمياسىنىڭ تىڭداۋشىلارىمەن تولىقتى. وسى كۇنى اكادەميانىڭ ءبىرىنشى كۋرسىنىڭ تىڭداۋشىلارى انت قابىلدادى.
بۇل بولاشاق قارجى پوليتسياسى جانە كەدەن ورگاندارى وفيتسەرلەرىنىڭ ومىرىندەگى ەڭ ماڭىزدى وقيعا بولىپ تابىلادى. اكادەميا تىڭداۋشىسى قاتارىنا رەسمي قابىلدانۋ الدىندا جالپى ءبىلىم بەرۋ مەكتەپتەرىندەگى بىرىڭعاي ۇلتتىق تەستىلەۋدەن ءوتۋ, اكادەميانىڭ مەديتسينالىق جانە پسيحولوگيالىق تەكسەرۋدەن, دەنە شىنىقتىرۋ دايىندىعىنان نورماتيۆتەر تاپسىرۋ, كەشەندى تەستىلەۋدەن تۇراتىن ءۇش دەڭگەيلىك كونكۋرستىق ىرىكتەۋدەن ءوتۋ قاجەت بولعان. مۇنان كەيىن اكادەمياعا تۇسكەندەر قىزمەتىن ءارى قاراي اتقارۋعا دايارلايتىن ءبىر ايلىق “جاس جاۋىنگەر كۋرسىن” وتكىزۋ, سونىمەن قاتار كۋرس بويىنشا دەنە شىنىقتىرۋ, ساپتىق دايىندىق جانە ماماندىققا كىرىسپە ساباقتارىن ءوتۋ جوسپارلانعان.
سالتاناتتى راسىمگە ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ توراعاسى, قارجى پوليتسياسىنىڭ گەنەرال-مايورى قايرات قوجامجاروۆ, توراعانىڭ ورىنباسارى مەن دەپارتامەنت باسشىلارى, پرەزيدەنت اكىمشىلىگىنىڭ, “نۇر-وتان” حدپ وكىلدەرى, سونىمەن قاتار تىڭداۋشىلاردىڭ اتا-انالارى مەن وزگە دە قوناقتار قاتىستى. قارجى پوليتسياسى اكادەمياسىنىڭ باستىعى, قارجى پوليتسياسىنىڭ پولكوۆنيگى م.باشيموۆ سالتاناتتى انت قابىلداۋ راسىمىنە ارنالعان شەرۋدى اشىپ, وقۋ الاڭىندا اكادەميا تىڭداۋشىلارىنىڭ قىزمەتتىك-وقۋ جاتتىعۋلارىنىڭ كورىنىستەرى كورسەتىلدى.
وتاننىڭ قۇقىق قورعاۋ ورگاندارىنا قىزمەت ەتۋدى جانە مەملەكەتتىڭ ەكونوميكالىق قاۋىپسىزدىگىن قورعاۋدى ءوزىنىڭ بورىشى دەپ ساناعان قارجى پوليتسياسى جانە كەدەن ورگاندارىنىڭ بولاشاق قىزمەتكەرلەرىن 4 جىل قاۋىرت وقۋ كۇتىپ تۇر. ەكونوميكالىق جانە سىبايلاس جەمقورلىق قىلمىستاردىڭ الدىن الۋعا, اشۋعا جانە تەرگەۋگە قاجەتتى زاڭ جانە ەكونوميكالىق ءبىلىمدى مەڭگەرگەن بۇگىنگى قاتارداعى قارجى پوليتسياسى قىزمەتكەرلەرى مەملەكەتتىڭ قۇقىقتىق ءتارتىپ پەن ەكونوميكالىق قاۋىپسىزدىگىنىڭ ءتيىمدىلىگىن ارتتىرۋعا ۇلەس قوسامىن دەگەن ىزگى نيەتىن ىسكە اسىرا الادى.
ءابدىراحمان قىدىربەك, استانا.