كەشە قازاق ەكونوميكا, قارجى جانە حالىقارالىق ساۋدا ۋنيۆەرسيتەتىندە اتالعان وقۋ ورنى رەكتورى, ەكونوميكا عىلىمدارىنىڭ دوكتورى, پروفەسسور, ۇلتتىق عىلىم اكادەمياسىنىڭ اكادەميگى عابدىعاپار سەيىتقاسىموۆتىڭ 70 جىلدىق مەرەيتويىنا ورايلاستىرىلعان ء“ححى عاسىرداعى الەمدىك جانە قازاقستان ەكونوميكاسىنىڭ دامۋ بارىسى مەن باسىم باعىتتارى” اتتى حالىقارالىق عىلىمي-تاجىريبەلىك كونفەرەنتسيا ءوتتى. وندا ەلىمىزدىڭ سونىمەن قاتار الىس-جاقىن شەتەلدەردەن بىلىكتى سالا عالىمدارى قاتىسىپ, پىكىر ساباقتاستىردى.
وسى شاراعا وراي عالىمنىڭ عىلىمي-مونوگرافيالىق تۋىندىلارى جانە وزگە دە اۆتورلارمەن ءبىرلەسىپ جازعان ەڭبەكتەرى مەن وقۋلىقتارى قويىلعان ارنايى كىتاپ كورمەسى ۇيىمداستىرىلدى. عابدىعاپار ساعيت ۇلىنىڭ ءومىرى مەن شىعارماشىلىعى جايىندا ۋنيۆەرسيتەتتىڭ قارجى كافەدراسىنىڭ مەڭگەرۋشىسى, ەكونوميكا عىلىمدارىنىڭ دوكتورى, پروفەسسور الدانىش نۇرىموۆ بايانداما جاسادى. پارلامەنت سەناتى توراعاسىنىڭ ورىنباسارى مۇحامبەت كوپەەۆ مەرەيتوي يەسىنە سەنات توراعاسىنىڭ جولداعان ارنايى قۇتتىقتاۋ حاتىن وقىپ بەرسە, ءماجىلىس دەپۋتاتى بەكەن ءالىمجانوۆ عالىمنىڭ سان قىرلى قاسيەتتەرىنە توقتالدى.
بۇل حالىقارالىق عىلىمي-ءتاجىريبەلىك كونفەرەنتسيانىڭ ءوتۋ بارىسى جايىندا ۋنيۆەرسيتەتتىڭ عىلىم جونىندەگى پرورەكتورى فيلوسوفيا عىلىمدارىنىڭ دوكتورى, پروفەسسور تولەۋعالي بورىباەۆ “كونفەرەنتسيانىڭ باستى ماقساتى, بىرىنشىدەن, ەلىمىزدىڭ ەكولوگيالىق ءال-اۋقاتىن جاقسارتۋ, ەكونوميكانىڭ باعىت-باعدارلارىن, سونىمەن قاتار ناقتى جۇزەگە اسىرۋ تەتىكتەرىنىڭ تەوريالىق, پراكتيكالىق جانە ادىستەمەلىك جولدارىن ۇسىنۋ بولىپ تابىلادى. ءححى عاسىردىڭ ەڭ باستى ماسەلەلەرى قارجىلىق داعدارىستان شىعۋ جولدارىن ىزدەستىرۋ دەسەك, اۋىل شارۋاشىلىعى ماسەلەلەرىن كوتەرۋ مەن جاڭارتۋدىڭ ءتيىمدى جولدارىن قاراستىرۋ دا عالىمدار نازارىنان تىس قالماق ەمەس. سوندىقتان وسىنداي ساۋالدارعا قاتىستى باسقوسۋدا ناقتى جاۋاپتار الىنادى دەپ ويلايمىن. جيىنعا قاتىسىپ وتىرعان شەتەلدىك عالىمدار حالىقارالىق كونفەرەنتسياعا جاقسى باعاسىن بەرەدى دەگەن سەنىمدەمىز” – دەدى.
اكادەميك عابدىعاپار سەيىتقاسىموۆتىڭ تىكەلەي جەتەكشىلىگىمەن جازىلعان وقۋلىقتار توپتاماسى ءبىلىم جانە عىلىم مينيسترلىگىنىڭ ۇسىنۋىمەن ەلىمىزدىڭ بارلىق وقۋ ورىندارىندا نەگىزگى وقۋلىق رەتىندە وقىتىلۋدا. ءار جىلدارى جارىققا شىققان 15 مونوگرافياسىنا دەگەن سۇرانىس بۇگىندەرى وتانىمىزدا عانا ەمەس, شەتەلدەردە, اتاپ ايتساق, رەسەي, گەرمانيا, يتاليا, لاتۆيادا قولدانىسقا ەنگەن. سونداي-اق اكادەميكتىڭ جەتەكشىلىگىمەن 5 عىلىم دوكتورى مەن 30-دان استام عىلىم كانديداتتارى ديسسەرتاتسيالارىن ءساتتى قورعاعان.
ءابدىراحمان قىدىربەك, استانا.