بۇل كۇندەردە بىشكەك كوشەلەرىندە سونادايدان كوز تارتقان كوركەم بيلبورد-پلاكاتتار كوبەيە تۇسكەن. قىرعىز ەلىنىڭ ساياسي ومىرىنە قايتادان قان ءجۇگىرىپ, شىرايلانعان ءتۇرى بار. ونىڭ سەبەبى, الداعى 10 قازانعا بەلگىلەنگەن قىرعىزستان پارلامەنتى سايلاۋىنىڭ الامان بايگەسى سورەدەن شىعىپ, بولاشاق پارلامەنتتەگى ورىنداردان دامەلى پارتيالاردىڭ ۇگىت-ناسيحات جۇمىسىن باستاۋعا رەسمي تۇردە رۇقسات ەتىلدى.
سايلاۋ الدىنداعى ماڭىزدى ناۋقاندى زور قۇلشىنىس-جىگەرمەن بەلسەندى باستاپ كەتكەن پارتيالارعا كەلەر بولساق, ەلدەگى 150 پارتيانىڭ 29-ى بارلىق ءراسىمدى تالاپتاردان ءوتىپ, ورتالىق سايلاۋ كوميسسياسىندا زاڭدى ءتۇردە تىركەلدى. كوميسسيا توراعاسى ا.فاريەۆ سايلاۋ كۇنى 2 ميلليون 700 مىڭ سايلاۋشى داۋىس بەرەتىنىن ايتۋدا. ناق قازىر مىناۋ جەڭەدى دەپ, كوپ داۋىس الادى دەپ, جاڭاعى پارتيالاردىڭ ىشىنەن بىرەۋىن دارالاپ بولە-جارا اتاۋ قيىن. دەسە دە, “ميزامنىڭ تەمىر قالقانى” دەپ زاڭدىلىق اياسىنداعى ءىس-ارەكەتتى تۋ ەتكەن “ار-نامىس”, “اتامەكەن”, “اتا جول”, “اقسۇڭقار”, “قىرعىزستاننىڭ سوتسيال-دەموكراتيالىق” جانە باسقا پارتيالاردىڭ ەل ىشىندەگى تانىمالدىعى دا وسى ازىردەن قىلاڭ بەرىپ قالعانداي. بۇل پارتيالار ادال, ءادىل ءھام اشىق كۇرەستى تالاپ ەتىپ وتىر. قازىردەن باستاپ بيلىك ورىندارىنا, بىلايشا ايتقاندا, “اكىمشىلىك رەسۋرس” دەيتىندى ىسكە قوسىپ, الا قويدى بولە قىرقاتىن بولساڭىزدار, ول قىرعىز ەلىنىڭ بولاشاعىن ويلاعاندىققا جاتپايدى” دەپ الدىن-الا مالىمدەۋدە.
ءساۋىر ايىندا ب ۇلىنشىلىككە تولى دۇربەلەڭدى, ماۋسىمدا وشتاعى قايعىلى وقيعالاردى باستان كەشكەن قىرعىز ەلىندە تىنىشتىق پەن كەلىسىمدى قامتاماسىز ەتىپ, دەموكراتيالىق قوعامدى ورنىقتىراتىن جولداعى العاشقى ماڭىزدى قادامنىڭ ءبىرى وسى پارلامەنت سايلاۋى بولعالى وتىر. بۇل سايلاۋدىڭ تەڭ قۇقىقتى جانە دەموكراتيالىق ستاندارتتارعا سايكەس وتۋىنە حالىقارالىق قوعامداستىق تا ۇلكەن ءمان بەرۋدە.
سوعان وراي, بىشكەككە ارنايى جۇمىس ساپارىمەن كەلگەن ءىس باسىنداعى ەقىۇ توراعاسىنىڭ ارنايى وكىلى, قازاقستان رەسپۋبليكاسىنىڭ پارلامەنتى ءماجىلىسى توراعاسىنىڭ ورىنباسارى ءجانىبەك كارىبجانوۆ, بۇۇ باس حاتشىسىنىڭ ارنايى وكىلى ميروسلاۆ ەنشەمەن, ەۋرووداقتىڭ ورتالىق ازيا بويىنشا ارنايى وكىلى پەر مورەلمەن جانە ەقىۇ-نىڭ جانجالداردى بولدىرماۋ جونىندەگى ورتالىعىنىڭ جەتەكشىسى گەربەرت سالدەرمەن بىرلەسە وتىرىپ, قىرعىز رەسپۋبليكاسى بيلىك ورىندارىنىڭ باسشىلارىمەن بىرقاتار كەزدەسۋلەر وتكىزدى. بۇل كەزدەسۋلەردە رەسپۋبليكاداعى سايلاۋ الدىنداعى جاعداي كەڭىنەن تالقىلانىپ, ارنايى وكىلدەر ءوز تاراپىنان الداعى پارلامەنت سايلاۋىنىڭ ۇيىمشىلدىقپەن ءادىل ءوتۋىنىڭ ماڭىزدىلىعىن اتاپ كورسەتتى. ولار سونداي-اق ساياسي پارتيالاردىڭ وكىلدەرىمەن كەزدەسىپ, ولاردى ءوزارا تولەرانتتىلىققا جانە سايلاۋ الدىنداعى ناۋقاندى جۇرگىزۋ بارىسىندا ءوز باسەكەلەستەرىنە قۇرمەتپەن قاراۋعا شاقىردى. ەقىۇ جانە وعان مۇشە ەلدەر, اتاپ ايتقاندا, قازاقستان, رەسەي, اقش, تۇركيا جانە باسقالارى قىرعىزستان حالقى مەن ۇكىمەتىنە قاۋىپسىزدىك پەن تۇراقتى دامۋدى قامتاماسىز ەتۋ جولىندا, اتاپ ايتقاندا دەموكراتيالىق ينستيتۋتتاردى دامىتا ءتۇسۋ ءۇشىن, ادام قۇقىعىن قورعاپ, زاڭنىڭ ۇستەمدىگىن نىعايتا ءتۇسۋ ءۇشىن ءوز قولداۋى مەن گۋمانيتارلىق جانە تەحنيكالىق كومەگىن ودان ءارى جالعاستىرۋدا.
ج.كارىبجانوۆ باستاعان ەقىۇ دەلەگاتسياسى قىرعىزستاننىڭ وتپەلى كەزەڭدەگى پرەزيدەنتى روزا وتۋنباەۆامەن كەزدەستى. قىرعىز رەسپۋبليكاسىنىڭ باسشىسى الداعى سايلاۋدى دەموكراتيالىق تالاپتارعا ساي وتكىزۋ ءۇشىن بار كۇش-جىگەردى جۇمسايتىندىقتارىنا سەندىردى. سايلاۋعا ازىرلىك جانە ونى وتكىزۋ كەزەڭىنە ەقىۇ-نىڭ دەموكراتيالىق ينستيتۋتتارى جانە ادام قۇقىعى جونىندەگى بيۋروسى تاراپىنان 300-دەن استام باقىلاۋشى كەلەدى دەپ كۇتىلۋدە.
قورعانبەك امانجول – بىشكەكتەن.