سولتۇستىكقازاقستاندىق بانكيرلەر جىلدىڭ ءتورت مەزگىلىندە سپورت سپارتاكيادالارىن وتكىزۋدى داستۇرگە اينالدىرعان.
قىزىلجار ءوڭىرى بانك قىزمەتكەرلەرىنىڭ سالاماتتى ءومىر ءسۇرۋ سالتىن سپورتپەن تىعىز بايلانىستىرعانىنا 15 جىلدان استى. وسى ءبىر جاقسى ءداستۇر ۇلتتىق بانكى سولتۇستىك قازاقستان جەرگىلىكتى فيليالىنىڭ ديرەكتورى جومارت قاجىراحىموۆتىڭ وبلىستىق ميني-فۋتبول فەدەراتسياسىنا توراعا بولىپ سايلانۋىنان باستالدى. ول بىردە وسى سپورت تۇرىنەن بانكيرلەر اراسىندا جارىس وتكىزۋگە بەكىندى. العاشقى ءتۋرنيردى ءوزى جەتەكشىلىك ەتەتىن ۇجىمدا ۇيىمداستىردى. كوپشىلىكتىڭ قىزىعۋشىلىعى كۇتكەندەگىدەن دە اسىپ ءتۇستى. ءسويتىپ يگىلىكتى شارا باسقا بانك ءبولىمشەلەرى اراسىندا كەڭىنەن قانات جايدى. بانكير قىزدار دا دوپ تەبۋدى ۇيرەنىپ, جارىس كورىگىن قىزدىراتىن بولدى. بارلىق جاستاعى بانكيرلەردىڭ سپورتپەن شۇعىلدانۋىن كوزدەگەن جومارت ەندى ارىپتەستەرىمەن بىرلەسە وتىرىپ سپورتتىڭ باسقا تۇرلەرىن دە جانداندىرۋعا بەل شەشە كىرىستى. بۇقارالىق-سپورتتىق قوزعالىستى دامىتۋدىڭ ءىس-شارالارىن جاساپ, ميني-فۋتبولدان باسقا شاڭعى, ۆولەيبول, جەڭىل اتلەتيكا تۇرلەرى ەنگىزىلدى. سودان بەرى جىلدىڭ ءتورت مەزگىلىنە ىڭعايلاستىرىلعان سپورتتىق سپارتاكيادالار ون جىلدان بەرى ۇزبەي جالعاسىپ كەلەدى. بۇدان تىسقارى شاحمات, دويبى, ۇستەل تەننيسى, باسكەتبولدان دا تۋرنيرلەر وتكىزىلىپ تۇرادى.
بيىل سپورتتىق سپارتاكيادالاردىڭ قاي-قايسىسىنا بولسىن ەكىنشى دارەجەلى بانكتەردىڭ 17 فيليالىنان 400-دەن استام ادام قاتىسىپ, شىن مانىندەگى بۇقارالىق ءىس-شاراعا اينالدى. ءسوز اراسىندا مينيفۋتبولدىڭ اسا تارتىستى وتكەنىن ايتا كەتكەن ءجون. جومارت جەتەكشىلىك ەتەتىن ۇجىم ءوز تاريحىندا تۇڭعىش رەت چەمپيون اتانىپ, ۇنەمى بايگە ءتورىن بەرمەيتىن “حالىقتىق بانك, قازكوممەرتسبانك” سىندى بانك فيليالدارىن جەر قاپتىردى. دميتري تسىگانكوۆ قارسىلاستار قاقپاسىنا 24 گول سوعىپ, “ەڭ ۇزدىك شابۋىلشى” اتاعىن جەڭىپ الدى.
– ەلباسى دەنى ساۋ ۇلت – جالپىۇلتتىق مىندەت ەكەنىن اتاپ كورسەتكەن بولاتىن. ول تالاپتاردى ءجۇزەگە اسىرۋ ءار وتباسىدان, ءار ۇجىمنان باستاۋ الارى انىق. سالاماتتى ءومىر سۇرۋگە داعدىلانعان ادامدار بويلارىن اركەز سەرگەك ۇستايدى, جامان ادەتتەردەن اۋلاق بولادى. جاسىراتىنى جوق, ادامنىڭ دەنساۋلىعى ءوز قولىندا ەكەنىن كوپ جاعدايدا ەسكەرە بەرمەيمىز. “سالاماتتى قازاقستان” مەملەكەتتىك باعدارلاماسىنىڭ قابىلدانۋى انا مەن بالانىڭ دەنساۋلىعىن جاقسارتۋ, جالپى ءولىم مەن اسا قاۋىپتى اۋرۋلاردى بولدىرماۋ, الدىن الۋ, ادامنىڭ ءومىر جاسىن ۇزارتۋ, دەموگرافيالىق احۋالدى جاقسارتۋ سەكىلدى وتە ماڭىزدى ماقساتتاردان تۋعان. ءبىز دە وسىناۋ مەملەكەتتىك ءماسەلەگە ءوز ۇلەسىمىزدى قوسۋدى پارىز سانايمىز, – دەيدى سپورتتى ءومىرلىك سەرىك ەتكەن وبلىستىڭ باس بانكيرى.
بۇل جولعى سپارتاكيادا “سپورت پاديشاسى” – جەڭىل اتلەتيكاعا ارنالدى. ول “قۇس جولى” رەسپۋبليكالىق قايىرىمدىلىق قورىنىڭ دەمەۋشىلىگىمەن, “قازكوممەرتسبانكتىڭ” جەرگىلىكتى بولىمشەسىنىڭ /ديرەكتور ەرلان قوجابەرگەنوۆ/ ۇيىمداستىرۋىمەن جوعارى دەڭگەيدە ءوتتى. بانكيرلەر ەستافەتاعا, ءتۇرلى قاشىقتىقتارعا جۇگىرىپ, ۇزىندىققا سەكىرىپ, گىر كوتەرىپ كۇش سىناستى. يننا كۋريلو (“تسەنتركرەديت”) 60, 400 مەتر قاشىقتىققا جۇگىرۋدە, ۇزىندىققا سەكىرۋدە الدىنا جان سالمادى. ەرلەر اراسىندا ەۆگەني سيزيكوۆ / (“كاسپي بانك”), دميتري تسىگانكوۆ (“ۇلتتىق بانك”) جارقىراپ كوزگە ءتۇستى.
جالپىكوماندالىق ەسەپتە “تسەنتركرەديبانكتىڭ” پەتروپاۆلداعى بولىمشەسى (ديرەكتور رينات قوجاحمەتوۆ) ءبىرىنشى ورىندى جەڭىپ الدى. ول ءوز جۇلدەسىن (نوۋتبۋك) رەسپۋبليكالىق “ەگەمەن قازاقستان” گازەتىنىڭ وبلىستاعى تىلشىلەر قوسىنىنا سىيلادى. ءبىز بۇل قۇرمەتتى “وتانىمىزدىڭ باس گازەتىنە” كورسەتىلگەن ءىلتيپات جانە دە گازەتىمىزدىڭ تۇراقتى وقىرمانى ءارى جاناشىرى ج. قاجىراحىموۆتىڭ بەدەلى دەپ دەپ ۇقتىق. سوڭعى جىلدارى گازەتىمىزدى بانكيرلەردىڭ جازدىرتىپ الۋ قاراسىنىڭ مولايا تۇسكەنى بايقالادى. جومارت ورال ۇلىنىڭ ءوزى بىرنەشە جىلدان بەرى كوپ بالالى وتباسىلاردى, ەڭبەك ارداگەرلەرىن “ەگەمەنگە” تەگىن جازدىرتىپ كەلەدى.
– ەلباسى ءوز جولداۋىندا 30 پايىزعا دەيىنگى قازاقستاندىقتاردى بۇقارالىق سپورتقا تارتۋ مىندەتىن قويدى. بانكيرلەر اراسىندا ەكىنىڭ ءبىرى سپورتتىق شارالاردان تىس قالمايدى. بۇگىنگى جارىس – سونىڭ جارقىن كۋاسى, – دەيدى جارىستىڭ باستى ۇيىمداستىرۋشىسى, ورازا ۇستاپ, يماندىلىققا بەت بۇرعان ەرلان وسەرباي ۇلى.
سولتۇستىكقازاقستاندىق بانكيرلەردى ەل تاۋەلسىزدىگى مەرەكەسى قارساڭىندا وتەتىن تاعى ءبىر سپارتاكيادا توسىپ تۇر. ونى ۇيىمداستىرۋ “تسەسنابانكتىڭ” جەرگىلىكتى ءبولىمشەسىنە (ديرەكتورى قۇلبەك شوپانوۆ) جۇكتەلدى.
ءومىر ەسقالي, سولتۇستىك قازاقستان وبلىسى.